Dual PanelGamot-gamot ni si Salomo
1Jadi Raja Salomo ma manggomgom haganup Israel.
2Anjaha on ma juakjuak bolonni: Si Asarya, anak ni si Sadok, malim;
3si Elihorep pakon si Ahia, anak ni si Sisa, juru tulisni; si Josafat, anak ni si Ahilud, panuturuni;
4si Benaya, anak ni si Joyada, pambobai ni bala; si Sadok pakon si Abyatar, malim;
5si Asarya, anak ni si Natan, kopala ni gamot-gamot; si Sabud, anak ni si Natan, malim anjaha huan-huan ni raja ai;
6si Ahisar, pangintuai ni rumah bolon; si Adoniram, anak ni si Abda, kopala ni panrodi.
7Ambahni ai ipabangkit si Salomo do sapuluh dua halak juakjuakni na mangatur ganup halak Israel, laho pasirsirhon sipanganon hu bani raja ai pakon hu bani pangisi ni rumahni; ganup sidea marhorin pasirsirhon haporluan sabulan ibagas satahun.
8On ma goran-goran ni sidea: Anak ni si Hur i Dolog Efraim;
9anak ni si Deker, i Makas, i Saalbim, i Betsemes, i Elon pakon i Bethanan;
10anak ni si Hesed i Arubod, masuk hu bani do homa Soko pakon ganup tanoh Heper;
11anak ni si Aminadab, bani ganup tanoh buntu Dor, si Tapat, boru ni si salomo do parinangonni;
12si Baana, anak ni si Ahilud i Taanak, Megiddo pakon ganup Betsean, ai ma dohorhon Sartan i kehen ni Jesreel, hun Betsean, das hu Abelmehola, das hu dipar ni Jokmeam;
13anak ni si Geber, i Ramot na i Gilead; masuk hu bani do huta ni si Jair, anak ni si Manasse na i Gilead; masuk hu bani do homa nagori Argob, na i Basan, onom puluh huta, martembok anjaha manransang-ransang tombaga;
14si Ahinadab, anak ni si Iddo i Mahanaim;
15si Ahimaas, i Naftali; ibuat do si Basmat boru ni si Salomo bahen parinangonni;
16si Baana, anak ni si Husni, i Asser pakon i Bealot;
17si Josafat, anak ni si Parua, i Isasar;
18si Simei anak ni si Ela, i Benjamin;
19si Geber, anak ni si Uri i Gilead, tanoh ni si Sihon, raja ni halak Amori pakon si Og, raja ni Basan; sahalak do na mamarentah tanoh ai.
20Buei tumang do halak Juda pakon Israel, songon horsik na i topi ni laut hinabueini; mangan minum anjaha marmalas ni uhur do sidea.
Habanggalon ni si Salomo
21(5-1) Si Salomo do na manggomgom ganup harajaon singgan ni Bah Eufrat das hu tanoh ni halak Palistim, das hu parbalogan ni tanoh Mesir; iboan sidea do sohei anjaha pambalosi do sidea bani si Salomo sadokah goluhni.
22(5-2) Bohal na porlu bani si Salomo ibagas sadari, ai ma tolu puluh kor nitak na lumat pakon onom puluh kor nitak na somal,
23(5-3) sapuluh lombu na pinamombur, dua puluh lombu na hun sampalan, saratus biri-biri, legan ni ursa, bedar, balua pakon pinahan marbagei-bagei na pinamombur.
24(5-4) Ai igomgomi do ganup tanoh na hampit dipar ni Bah Eufrat, singgan ni Tipsa das hu Gasa, igomgomi do haganup raja na hampit dipar ni bah ai; mardamei do ia ampa na inggotsi ganup.
25(5-5) Jadi marhasonangan ma Juda pakon Israel marianan, ganup i toruh ni hayu anggurni bei pakon i toruh ni hayu arani, singgan ni Dan das hu Berseba, sadokah manggoluh Raja Salomo.
26(5-6) Ambah ni ai adong do ompat puluh ribu huda sitarik gareta pakon sapuluh dua ribu bala parhuda.
27(5-7) Anjaha juakjuakni sipangatur ondi pasirsirhon bohal bani Raja Salomo pakon bani haganup halak na roh mangan ampa raja Salomo, ganup sabulan bei, seng dong na hurang.
28(5-8) Sonai homa gandum pakon gagaton bani huda sitarik gareta pakon huda ajakan, iboan sidea do bani ianan na mangkaporluhon ai, ganup romban hu bani na dob pinarentahkon bani.
29(5-9) Anjaha ilayak-layakkon Naibata do hu bani si Salomo hapentaran pakon pangarusion na bagas tumang pakon buei pambotoh, usih songon horsik na i topi ni laut bueini,
30(5-10) gabe i atasi hapentaran ni si Salomo ma hapentaran ni sagala halak parhapoltakan pakon hapentaran ni halak Masir.
31(5-11) Pentaran ia tene hun bani ganup jolma, pentaran hun bani si Etan halak Esrahi, pakon si Heman, si Kalkol ampa si Darda anak ni si Mahol, gabe tarmurmur ma ia bani ganup bangsa sipajuh begu-begu inggot.
32(5-12) Adong do tolu ribu umpamani, anjaha saribu lima do buei ni dodingni.
33(5-13) Ibotoh do mansahapkon pasal hayu, hun bani hayu ares na i Libanon das hu bani isop na dong tubuh bani tembok; ibotoh do homa mansahapkon pasal pinahan-pinahan, manuk-manuk, gilok-gilok pakon dengke.
34(5-14) Jadi marrohan ma halak hun bani ganup bangsa sihol mambogei hapentaran ni si Salomo, hun bani ganup raja na i tanoh on, na mambogei barita ni hapentaranni ai.