Alkitab Mobile SABDA
[VER] : [SIMALUNGUN]     [PL]  [PB] 
 <<  1 Raja-raja 5 >> 

Parpadanan ni si Salomo pakon Raja Hiram Pasal Parhayu ni Rumah Panumbahan

1(5-15) Dob ai isuruh si Hiram, raja ni Tirus ma juakjuakni marayak si Salomo, dob ibogei, na dob iminaki ia gabe raja gantih ni bapani; ai holong do uhur ni si Hiram mangidah si Daud sadokah manggoluh ia.

2(5-16) Jadi martonah ma si Salomo hu bani si Hiram, nini ma,

3(5-17) “Ibotoh ham do, na so tarbahen bapangku si Daud pajongjong sada rumah bani goran ni Jahowa, Naibatani, halani hamunsuhon hun bani munsuhni inggot, paima mangunduk sidea ganup ibahen Jahowa hu toruh ni jampal ni naheini.

4(5-18) Tapi anggo nuan domma marhasonangan ahu inggot ibahen Jahowa Naibatangku; seng dong be imbang barang hasunsahan.

5(5-19) Halani ai marsura-sura do ahu pajongjong sada rumah bani goran ni Jahowa Naibatangku, songon na pinarbagah ni Jahowa hu bani bapa, si Daud, sanggah na hinatahon-Ni, ʻAnakmu, na sihol pahundulon-Ku bani paratasmu bahen gantihmu, maningon ia do pajongjong sada rumah bani goran-Ku.ʼ

6(5-20) Antong, hatahon ham ma halak na manroboh bangku hayu ares hun Libanon, husuruh pe juakjuakku mangkasomani juakjuakmu, anjaha hubere pe upah ni juakjuakmu songon na hinatahonmu; ai ibotoh ham do, seng dong i tongah-tongahnami na mambotoh manroboh hayu, songon halak Sidon.”

7(5-21) Jadi dob ibogei si Hiram hata ni si Salomo ai, malas tumang ma uhurni, nini ma, “Pinuji ma Jahowa sadari on, halani na dob binereni hu bani si Daud sada anak na pentar, manggomgom bangsa na bolon on.”

8(5-22) Dob ai isuruh si Hiram ma suruhanni marayak si Salomo, mangkatahon, “Domma hubogei tonah na pinadasmu; sirsir do ahu mambahen ganup sura-sura ni uhurmu, ai ma pasal hayu ares pakon hayu ingul ai.

9(5-23) Juakjuakku pe patuadkon hayu ai hun Libanon hu laut; dob ai husuruh pe na manrakitkon ai i laut das bani ianan na sihol hatahononmu bangku, ase ijai ipadarat ai anjaha ijalo ham; tapi maningon bahenonmu do na pinangindo ni uhurhu, ai ma mambere bohal bani pangisi ni rumahku.”

10(5-24) Jadi ibere si Hiram ma hu bani si Salomo hayu ares pakon hayu ingul ansa pinindoni ai,

11(5-25) anjaha si Salomo pe ibere ma hu bani si Hiram dua puluh ribu kor gandum anjaha dua puluh bat minak na pinoroh. Sonai ma ibere si Salomo ganup tahun hu bani si Hiram.

12(5-26) Ilayak-layakkon Jahowa do hapentaran hu bani Raja Salomo, songon na pinarbagah-Ni hinan hu bani; anjaha mardamei do si Salomo pakon si Hiram, mambahen parpadanan do sidea na dua.

13(5-27) Dob ai iharah Raja Salomo ma parrodi hun ganup Israel, buei ni parrodi ai tolu puluh ribu halak do.

14(5-28) Jadi isuruh raja ai ma sidea margantih-gantih hu Libanon, sapuluh ribu ibagas sabulan; sabulan ma sidea i Libanon dob ai dua bulan i rumahni bei; si Adoniram do kopala ni parrodi ai.

15(5-29) Ambahni ai adong do bani si Salomo pitu puluh ribu halak siparlanja anjaha ualuh puluh ribu halak sibarbar batu i dolog;

16(5-30) sobalini ai adong ope mandur na pinabangkit ni Raja Salomo mangatur horja ai, tolu ribu tolu ratus halak, na mardiateihon halak na marhorja ai.

17(5-31) Isuruh raja ai do homa sidea mangkurak batu na banggal anjaha na maharga, sibarbaron bahen onjolan ni rumah panumbahan ai.

18(5-32) Jadi rap marhorja ma tukang ni Raja Salomo rap pakon tukang ni Raja Hiram ampa halak Gebal mambarbar hayu pakon batu bahen haporluan ni rumah panumbahan ai.


  Share Facebook  |  Share Twitter

 <<  1 Raja-raja 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran