Dual PanelSeng Saud Dihut si Daud Marporang dompak Halak Israel
1Ipatumpu halak Palistim ma balani haganup i Apek; anjaha halak Israel marsaran do i lambung bah tubuh na i Jesreel.
2Sanggah na mamontas puanglima ni halak Palistim mambobahon balani marsasaratus pakon marsasaribu, anjaha si Daud pe pakon hasomanni mardalan do hampit pudi rap pakon si Akis,
3jadi nini raja-raja ni halak Palistim ai ma, “Aha do horja ni halak Heber on ijon?” Jadi nini si Akis ma dompak raja-raja ni halak Palistim ai, “Andai do si Daud, juakjuak ni si Saul, raja ni halak Israel; domma hira-hira dua tahun ia i lambungku, anjaha seng dong salah jumpah bani sadokah ia rap pakon ahu ronsi sadari on.”
4Tapi manggila ma raja-raja ni halak Palistim bani, nini sidea ma bani, “Suruh ham ma halak ai mulak, ase mulak ia bani ianan na dob tinuduhkonmu bani. Ulang ma dihut ia rap pakon hita marporang, ase ulang ia jadi imbang sanggah masa porang. Halani marhitei aha ia boi mardear pakon tuanni, anggo lang marhitei ulu ni halak na rap pakon hita on?
5Ai lang si Daud do na pinuji ni halak marhitei doding-doding, ʻMarribu-ribu do italuhon si Saul, tapi marlaksa-laksa do italuhon si Daud!ʼ”
6Dob ai idilo si Akis ma si Daud, nini ma hu bani, “Songon sintongni manggoluh Jahowa, na bonar maruhur do ho, anjaha dear do huahap anggo dihut ho rap pakon bala on, halani seng dong jumpah ahu na lang bujur ibagas ho, singgan ni parrohmu hu bangku ronsi sadari on. Tapi seng dear uhur ni raja-raja ni halak Palistim mangidah ho.
7Halani ai mulak ma ho, mulak ma ho mardamei-damei, ase ulang seda uhur ni raja-raja ni halak Palistim ibahen ho.”
8Nini si Daud ma dompak si Akis, “Aha dong na hubahen? Aha dong na salah iidah ham bani juakjuakmu, singgan ni dob roh ahu hu lobeimu ronsi sadari on, mambahen na so bulih dihut ahu marporang dompak munsuh ni tuanku?”
9Jadi nini si Akis ma mambalosi si Daud, “Hubotoh do, na bujur do ho bangku, songon malekat ni Naibata. Tapi domma ihatahon raja-raja ni halak Palistim, ʻSeng bulih ia rapkon hita dihut marporang.ʼ
10Halani ai patar girah ma ho laho pakon rayat ni tuanmu, na dihut rap pakon ho hujon; patar siangkonsi ari, laho ma hanima.”
11Jadi patarni ai girah sogod, bingkat ma si Daud rap pakon hasomanni, mulak hu tanoh ni halak Palistim. Tapi halak Palistim laho ma dompak Jesreel.