Dual PanelKopala Porang pakon Gamot Bolon na Legan
1On ma halak Israel mangihutkon bilangan ni sidea, kopala ni mar sasaompung, kopala ni sisaribu pakon sisaratus halak, sonai homa sagala gamot-gamot na marugas bani raja ai ibagas sagala horja bani ganup bagian, na margantih-gantih sasabulan ibagas na satahun; anjaha ganup bagian dua puluh ompat ribu halak do bueini.
2Kopala ni parbagian na parlobei bani bulan sada, ai ma si Jasobeam, anak ni si Sabdiel; dua puluh ompat ribu halak do bueini na masuk hu parbagianan ai.
3Humbani ginompar ni si Perez do ia, kopala ni haganup pambobai ni bala do ia bani bulan sada.
4Ia kopala ni parbagianan bani bulan dua ai ma si Dodai, halak Ahohi, anjaha masuk hubani parbagiananni do kopala Miklot; dua puluh ompat ribu halak do masuk bani parbagiananni ai.
5Kopala na patoluhon bani bulan tolu, ai ma si Benaya, anak ni malim Joyada; dua puluh ompat ribu halak do masuk bani parbagiananni ai.
6Si Benaya, ai ma sahalak humbani puanglima na tolu puluh halak ai, lanjar ia do kopala ni na tolu puluh halak ai; anjaha masuk hubani parbagiananni ai do anakni, si Amisabad.
7Na paompatkon, bani bulan ompat, ai ma si Asahel, anggi ni si Joab, anjaha si Sebaya, anakni ai do manggantihsi; dua puluh ompat ribu halak do masuk hubani parbagiananni ai.
8Na palimahon bani bulan lima, ai ma kopala Samhud, halak Jisrahi; dua puluh ompat ribu halak do masuk hubani parbagiananni ai.
9Na paonomhon bani bulan onom, ai ma si Ira, anak ni si Ikkes, halak Tekoa; dua puluh ompat ribu halak do masuk hubani parbagiananni ai.
10Na papituhon, bani bulan pitu, ai ma si Heles, halak Peloni, humbani ginompar ni si Efraim; dua puluh ompat ribu halak do masuk hu parbagiananni ai.
11Na paualuhkon, bani bulan ualuh, ai ma si Sibbekai, halak Husati, humbani halak Serahit, dua puluh ompat ribu halak do masuk hubani parbagiananni ai.
12Na pasiahkon bani bulan siah, ai ma si Abieser, hun Anatot, humbani ginompar ni si Benyamin; dua puluh ompat ribu halak do masuk hubani parbagiananni ai.
13Na pasapuluhkon bani bulan sapuluh, ai ma si Mahar ai na hun Netofa, humbani halak Serahit, dua puluh ompat ribu halak do masuk hubani parbagiananni ai.
14Na pasapuluhsadahon bani bulan sapuluh-sada, ai ma si Benaya, halak Piratoni, humbani ginompar ni si Efraim; dua puluh ompat ribu halak do masuk hubani parbagiananni ai.
15Na pasapuluhduahon bani bulan na pasapuluh-duahon, ai ma si Heldai, halak Netofati, humbani ginompar ni si Otniel; dua puluh ompat ribu halak do masuk hubani parbagiananni ai.
16Ia kopala ni marga ni Israel sada-sada ai ma: Bani marga Ruben, si Elieser, anak ni si Sikri; bani marga Simeon, si Sepatya, anak ni si Maaka;
17bani marga Levi, si Hasabya, anak ni si Kemuel; bani ginompar ni si Aron, si Sadok;
18bani marga Juda, si Elihu, sada humbani sanina ni si Daud; bani marga Isasar, si Omri, anak ni si Mikael;
19bani marga Sebulon, si Jismaya, anak ni si Obaja; bani marga Naftali, si Jerimot, anak ni si Asriel;
20bani ginompar ni Efraim si Hosea, anak ni si Asasya; bani na satongah marga Manasse, si Joel, anak ni si Pedaya;
21bani satongah marga Manasse na i Gilead, si Jiddo, anak ni si Sakaria; bani marga Benyamin, si Jehasiel, anak ni si Abner;
22bani marga Dan, si Asareel, anak ni si Jeroham. Ai ma kopala ni marga ni Israel.
23Tapi lang dihut ibilangi si Daud halak na marumur i toruh ni dua puluh tahun, halani na dob iparbagah Jahowa, pabueionni do halak Israel, songon bintang na i langit.
24Domma namin ipungkah si Joab, anak ni si Seruya, mamilangi, tapi seng dob ope ibahen; ai sogop do papa bani halak Israel marhalanihon ai, halani ai do ase seng isuratkon bilangan ai hu bagas buku barita ari-ari ni Raja Daud.
25Ia haondosan ni ganup ugas-ugas ni raja ai, ai ma si Asmawet, anak ni si Adiel; anjaha haondosan ni ugas-ugas na i talun, na i kota, na i huta pakon na i benteng, ai ma si Jonatan, anak ni si Usia;
26haondosan ni halak siparhorja i juma, na manlahoi tanoh ai, ai ma si Esri, anak ni si Helub;
27haondosan ni pohon anggur, ai ma si Simei, halak Rama; haondosan ni anggur na sinimpan i pohon anggur, ai ma si Sabdi halak Sipmi;
28haondosan ni hayu jetun pakon hayu ara na i habungan, ai ma si Baal-Hanan, halak Geder ai, anjaha haondosan ni minak, ai ma si Joas;
29haondosan ni lombu na manampal i Saron, ai ma si Sitrai, halak Saron; haondosan ni lombu na i habungan, ai ma si Sapat, anak ni si Adellai;
30haondosan ni unta, ai ma si Obil, halak Ismael; haondosan ni halode boru-boru, ai ma si Jehdeya, halak Meronot;
31haondosan ni biri-biri ampa hambing, ai ma si Jasis, halak Hagari. Ai ma ganup gamot haondosan ni ugas-ugas ni Raja Daud.
32Ia si Jonatan, mangkela ni si Daud, ai ma panuturini, sada dalahi na pantas maruhur anjaha na pentar; ia si Jehiel, anak ni si Hakmoni, ai ma hasoman ni anak ni raja ai.
33Si Ahitopel pe panuturi ni raja ai do, anjaha si Husai, halak Arki ai, ai ma huan-huan ni raja ai.
34Na manggantih si Ahitopel, ai ma si Joyada, anak ni si Benaya, pakon si Abyatar. Si Joab, ai ma kopala ni bala ni raja ai.