Alkitab Mobile SABDA
[VER] : [SIMALUNGUN]     [PL]  [PB] 
 <<  1 Timotius 1 >> 

Tabi bani si Timoteus

1Hun bani si Paulus, apostel ni Kristus Jesus, marhitei parentah ni Naibata Sipaluah hita ampa Kristus Jesus Pangarapanta,

2hubani si Timoteus, anakku na botul ibagas haporsayaon, idop ni uhur, holong ni uhur ampa damei ma bamu humbani Naibata Bapa ampa Kristus Jesus Tuhanta!

Golpa-golpa Manjaga Hapansingon ni Ambilan Na Madear; Pasal Tujuan ni Titah

3Sanggah na bingkat ahu hu Makedonia, domma huhatahon bamu, ase soh ham lobei i Epesus, laho palumbahon deba halak, ase ulang ipodahkon pangajaran na legan,

4ulang ra saor bani turi-turian barang bani tarombo-tarombo na so marbona marujung, na patubuhkon buenan parsalisihan marimbang parsombahon bani Naibata ibagas haporsayaon.

5Ia tujuan ni titah in, in ma holong na roh humbani uhur na borsih ampa panggora ni uhur na madear ampa haporsayaon na pitah.

6Deba halak, halani manlembang hunjai, marbalik do bani hata-hata na lumei,

7marsura-sura do gabe guru bani titah in, age pe seng iarusi na hinatahon ni sidea atap na sinaksihon ni sidea pe.

8Tapi ibotoh hita do, dear do titah in, anggo domu hubani tujuanni ipargunahon in,

9marhitei na mambotoh, sedo bani halak parpintor ibere titah in, tapi bani na so martitah ampa na so pambalosi do, bani na so marnaibata ampa pardousa, bani halak na so pansing ampa na mabutak, bani halak sibunuh bapani ampa sibunuh inangni, sibunuh jolma,

10bani panriah-riah, na marjolmahon dalahi, pamangus, parladung, sibijahon na so tongon, ampa haganup na legan na marlawanan dompak pangajaran na sintong in,

11na maronjolan hubani Ambilan Na Madear, na niondoskon bangku, ai ma pasal hasangapon ni Naibata na martuah in.

Pasal Pangidopi ni Naibata bani si Paulus

12Mangkatahon tarima kasih do ahu bani na margogohi ahu, in ma Kristus Jesus Tuhanta in, ai ihira do ahu hatengeran ni uhur, gabe ipabangkit do ahu bani horja parugason on,

13ahu, sipanrisai, siparburu ampa siunsagahkon gogohku hinan. Tapi jumpahan idop ni uhur do ahu, ai ibagas na so hubotoh do huhorjahon ai, ibagas na so parsaya,

14anjaha linir do bangku idop ni uhur ni Tuhanta rap pakon haporsayaon ampa holong na ibagas Kristus Jesus.

15Hatengeran ni uhur do hata on anjaha talup jaloon, “Domma roh Kristus Jesus hu tanoh on, laho paluahkon pardousa, anjaha ahu ma pardousa sibanggalan.”

16Tapi halani on do ase jumpahan idop ni uhur ahu, sihol parlobei ibagas diringku patidakon ni Kristus Jesus lumbang ni uhur-Ni na gok in, gabe usihan bani na sihol porsaya Bani, ase bani hagoluhan na sadokah ni dokahni.

17Hamuliaon ampa hasangapon sisadokah ni dokahni ma bani Raja na marmulia in, Naibata na manongtong, na so boi idahon, na Sasada in! Amen.

Ojur-ojur hubani si Timoteus

18Tonah on huondoskon do bamu, ale anakku Timoteus, romban hubani hata panjahaion hinan pasal ham, ase domu hujai iporangkon ham porang na madear in,

19ibagas haporsayaon ampa panggora ni uhur na borsih. Marhitei na mangambukkon ai, adong do deba na harom ibagas haporsayaon,

20songon si Himeneus ampa si Aleksander, na dob huondoskon hubani sibolis, ase marhitei ai hona ajar sidea, gabe seng be manrisai sidea.


  Share Facebook  |  Share Twitter

 <<  1 Timotius 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel