Alkitab Mobile SABDA
[VER] : [SIMALUNGUN]     [PL]  [PB] 
 <<  2 Raja-raja 1 >> 

Ilumbahon si Elias Parmatei ni si Ahasya

1Jadi dob matei si Ahab, marbalik ma halak Moab hun bani halak Israel.

2Bani na sahali madabuh ma si Ahasya hun jaring-jaring ni kamarni pardatas i Samaria, pala boritan ia. Dob ai isuruh ma suruhanni, nini ma hu bani sidea, “Laho ma nasiam manungkun Baal-Sebub, naibata ni Ekron, atap na malum do ahu hun bani naboritkon.”

3Tapi domma marsahap hinan malekat ni Jahowa hu bani si Elias, halak Tisbi ai, “Bingkat ma ho manjumpahkon suruhan ni raja ai, na hun Samaria, anjaha hatahon ma hu bani sidea, ʻSeng dong gakni Naibata i Israel, ase laho nasiam manungkun Baal-Sebub, naibata ni Ekron?ʼ

4Halani ai, sonon do hata ni Jahowa, ʻSeng bulih turun be ho hun bani podoman hatibalanmin, tapi maningon matei ma ho.ʼ” Dob ai laho ma si Elias.

5Jadi dob mulak suruhan ai hu bani raja ai, nini ma hu bani sidea, “Mase mulak nasiam?”

6Nini sidea ma mambalosisi, “Adong do sada halak na manjumpahkon hanami, anjaha nini do hu bannami, Mulak ma nasiam hu bani raja na marsuruh nasiam, hatahon nasiam ma hu bani: Sonon do hata ni Jahowa, ʻSeng dong gak ni Naibata i Israel, ase isuruh ho na manungkun Baal-Sebub, naibata ni Ekron? Halani ai seng bulih be ho turun hun podoman hatibalanmin, tapi maningon matei ma ho.ʼ”

7Dob ai nini ma hu bani sidea, “Sonaha do rupa ni halak na manjumpahkon nasiam ai pakon na patugahkon hata on bani nasiam?”

8Nini sidea ma mabalosisi, “Marhiou na marambulu do halak ai, anjaha margondit hulingkuling do ia bani binongeini.” Jadi nini ma, “Si Elias, halak Tisbis ai do ai.”

9Dob ai isuruh raja ai ma hu bani pambobai ni silima puluh halak rap pakon balani silima puluh halak ai. Jadi tangkog ma ia hu bani si Elias, na hundul-hundul i atas ni sada buntu-buntu, nini ma hu bani, “Ham halak ni Naibata, ihatahon raja in, ʻTurun ma ham!ʼ”

10Tapi nini si Elias ma mambalosi pambobai ni silima puluh halak ai, “Anggo halak ni Naibata do ahu, sai madabuh ma apuy hun nagori atas, anjaha ipangan ma ho pakon balamu silima puluh halak in.” Jadi madabuh ma apuy hun nagori atas, anjaha ipangan ma ia pakon balani silima puluh halak ai.

11Dob ai isuruh raja ai ma use pambobai ni silima puluh halak rap pakon balani lima puluh halak. Tangkog ma ia, anjaha nini ma hu bani, “Ham halak ni Naibata, sonon do parentah ni raja in, ʻPodas ma ham tuad!ʼ”

12Tapi nini si Elias ma mambalosi sidea, “Anggo halak ni Naibata do ahu, sai madabuh ma apuy hun nagori atas, anjaha ipangan ma ho pakon balamin silima puluh halak in!” Jadi madabuh ma apuy hun nagori atas, anjaha ipangan ma ia pakon balani silima puluh halak ai.

13Dob ai iulaki raja ai ma use marsuruh pambobai ni silima puluh halak rap pakon balani lima puluh halak. Dob das pambobai ni silima puluh halak ai i atas, marrogop ma ia marsombah i lobei ni si Elias, anjaha ielek-elek ma ia, “Ham halak ni Naibata, harga ma bahen ham hosahku pakon hosah ni jabolonmu, silima puluh halak on.

14Tonggor ma, madabuh do apuy hun nagori atas, anjaha ipangan haduasi pambobai ni silima puluh halak ai, on pe harga ma bahen ham hosahkon.”

15Dob ai nini malekat ni Jahowa ma hu bani si Elias, “Tuad ma ham rap pakonsi; ulang ma ham mabiar mangidahsi.” Jadi bingkat ma ia tuad rap pakon pambobai ai marayak raja ai,

16anjaha nini ma hu bani, “Sonon do hata ni Jahowa, Halani isuruh ho suruhanmu manungkun hu bani Baal-Sebub, naibata ni Ekron ai, seng dong be gak ni Naibata i Israel, na boi panungkunan? Halani ai seng boi be ho turun hun bani podoman hatibalanmin, maningon matei ma ho.”

17Jadi matei ma ia, romban hu bani hata ni Jahowa, na dob nilumbahon ni si Elias hinan. Jadi bangkit raja ma anggini si Joram manggantihsi, halani seng dong anak ni si Ahasya. Ai masa padua tahunkon dob gabe raja si Joram anak ni si Josafat i Juda.

18Barita na legan ai pasal si Ahasya pakon na binahenni, ai lang tarsurat do ai ibagas buku Barita ni Raja-raja Israel?


  Share Facebook  |  Share Twitter

 <<  2 Raja-raja 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran