Dual PanelSi Asarya \@(si Usia)\@ Raja ni Juda
1Paduapuluh-pitutahunkon dob gabe raja i Israel si Jerobeam, bangkit raja ma i Juda, si Asarya anak ni si Amasia.
2Marumur sapuluh onom tahun do ia sanggah bangkit raja ia, anjaha lima puluh dua tahun do ia manrajai i Jerusalem; goran ni inangni, si Jekolyah do, hun Jerusalem.
3Ihorjahon do rosuh ni uhur ni Jahowa, songon na binahen ni si Amasia, bapani ai.
4Pitah panumbahan na i atas buntu-buntu do na so iparreong; sai tong ope manggalang anjaha manutung dahupa halak simbuei i atas ni panumbahan, na i atas ni buntu-buntu.
5Jadi ibogbog Jahowa ma raja ai, gabe gadamon ma ia das ronsi parmateini, gabe punjung ma ia marianan ibagas sada rumah, gabe si Jotam anak ni raja ai ma manrajai rumahni ampa manguhum bangsa parnagori in.
6Barita na legan ope pasal si Asarya pakon haganup na binahenni, ai lang tarsurat do ai ibagas buku Barita ni Raja-raja ni Juda?
7Dob ai modom ma si Asarya rap pakon ompungni, gabe itanom sidea ma ia i lambung ni ompungni, i huta ni si Daud, anjaha si Jotam anakni ai ma manrajai manggantihsi.
Si Sakarya Raja ni Israel
8Patolupuluh-ualuhtahunkon dob raja i Juda si Asarya, bangkit raja ma si Sakarya, anak ni si Jerobeam, manggomgom Israel i Samaria, onom bulan dokahni.
9Ihorjahon do sogam ni uhur ni Jahowa usih songon na binahen ni ompungni. Seng ipadaoh uhurni hun bani dousa ni si Jerobeam, anak ni si Nebat, na mambahen Israel mardousa.
10Martahi-tahi ma si Sallum, anak ni si Jabes dompaksi, lanjar ibunuh ma raja ai i Jibleam, gabe ia ma bangkit raja manggantihsi.
11Barita na legan ope pasal si Sakarya, tonggor ma, tarsurat do ai ibagas buku Barita ni Raja-raja ni Israel.
12On do hata, na binagahkon ni Jahowa hinan hu bani si Jehu, “Maningon anakmu do ronsi sundut paompatkon hundul i atas paratas ni Israel.” Jadi saud ma sonai.
Si Sallum Raja ni Israel
13Patolupuluh-siahtahunkon dob gabe raja i Juda si Usia, bangkit raja ma si Sallum, anak ni si Jabes, anjaha pitah sabulan do dokahni manrajai i Samaria.
14Ai tangkog do si Menahem, anak ni si Gadi hun Tirsah, anjaha das ma ia hu Samaria, ibunuh ma si Sallum, anak ni si Jabes i Samaria, gabe ia ma bangkit raja manggantihsi.
15Barita na legan ai ope pasal si Sallum pakon partahi-tahian na binahenni ai, tonggor ma, tarsurat do ai ibagas buku barita ni Raja-raja ni Israel.
16Ijai ma iparseda si Menahem huta Tapuah, anjaha ibunuhi ganup pangisini pakon nagori na masuk hujai, singgan ni Tirsa, halani seng ra sidea mangungkab horbanganni. Ibunuhi do sidea anjaha ilapah do ganup naboru na boratan rumah.
Si Menahem Raja ni Israel
17Patolupuluh-siahtahunkon dob gabe raja i Juda si Asarya, bangkit raja ma si Menahem, anak ni si Gadi, manggomgom Israel i Samaria, sapuluh tahun dokahni.
18Ihorjahon do sogam ni uhur ni Jahowa; seng ipadaoh uhurni sadokah manggoluh ia hun bani dousa ni si Jerobeam, anak ni si Nebat, na mambahen Israel mardousa.
19Roh do si Pul, raja ni Assur, mamorang tanoh ai, jadi ibere si Menahem ma saribu talenta pirak hu bani si Pul, ase iurupi ia pajonamkon harajaon ai bani.
20Halak Israel do ihatahon si Menahem manggugui duit ai, ai ma lima puluh sekel pirak sahalak, siberehonon hu bani raja ni Assur. Dob ai mulak ma Raja Assur, seng tading ia i nagori ai.
21Barita na legan ai ope pasal si Menahem rap pakon ganup na hinorjahonni, ai lang tarsurat do ai ibagas buku barita ni Raja-raja ni Israel?
22Dob ai modom ma si Menahem rap pakon ompungni, gabe si Pekaya, anakni ai ma bangkit raja manggantihsi.
Si Pekaya Raja ni Israel
23Palimapuluhtahunkon dob gabe raja i Juda si Asarya, bangkit raja ma si Pekaya, anak ni si Menahem, manggomgom Israel i Samaria, dua tahun dokahni.
24Ihorjahon do sogam ni uhur ni Jahowa; seng ipadaoh uhurni hun bani dousa ni si Jerobeam, anak ni si Nebat, na mambahen Israel mardousa.
25Dob ai martahi-tahi ma si Peka, anak ni si Remalya, puanglima ai mangimbangsi, rap pakon lima puluh halak hun Gilead hasomanni, ibunuh ma ia i Samaria, ibagas benteng rumah ni raja ai, sonai homa si Argob pakon si Arye; dob ibunuh, ia ma raja manggantihsi.
26Barita na legan ai ope pasal si Pekaya pakon ganup na binahenni, tonggor ma, tarsurat do ai ibagas buku barita ni Raja-raja Israel.
Si Peka Raja ni Israel
27Palimapuluh-duatahunkon dob gabe raja i Juda si Asarya, bangkit raja ma si Peka, anak ni si Remalya, manggomgom Israel i Samaria, dua puluh tahun dokahni.
28Ihorjahon do sogam ni uhur ni Jahowa; seng ipadaoh uhurni hun bani dousa ni si Jerobeam, anak ni si Nebat, na mambahen Israel mardousa.
29Sanggah panorang ni si Peka, raja ni Israel, roh ma si Tiglat-Pileser raja ni Assur, itaban ma Iyon, Abel-Bet-Maahat, Janoa, Kedes, Hazor, Gilead, Galilea pakon ganup tanoh Naftali, anjaha ibuang ma pangisini ai hu Assur.
30Dob ai martahi-tahi ma si Hosea, anak ni si Ela mangimbang si Peka, anak ni si Remalya, ibunuh ma ia, gabe ia ma bangkit raja manggantihsi, paduapuluhtahunkon dob raja si Jotam, anak ni si Usia.
31Barita na legan ai ope pasal si Peka pakon ganup na binahenni, tonggor ma, tarsurat do ai ibagas buku barita ni Raja-raja Israel.
Si Jotam Raja i Juda
32Paduatahunkon dob gabe raja i Israel si Peka, anak ni si Remalya, bangkit raja ma i Juda si Jotam, anak ni si Usia.
33Marumur dua puluh lima tahun do ia sanggah na bangkit raja ai, anjaha sapuluh onom tahun do ia marrajai i Jerusalem. Goran ni inang ni si Jerusa do, boru ni si Sadok.
34Ihorjahon do rosuh ni uhur ni Jahowa, romban hu bani na binahen ni si Usia bapani ai.
35Pitah panumbahan na i atas buntu-buntu seng iparreong; sai manggalang anjaha manutung dahupa ope halak simbuei i atas panumbahan na i atas buntu-buntu. Ia do na padearhon horbangan parhuluan bani Rumah ni Jahowa.
36Barita na legan ai ope pasal si Jotam pakon ganupan na hinorjahonni, ai lang tarsurat do ai ibagas buku barita ni Raja-raja ni Juda?
37Bani panorang ai ma ipungkah Jahowa marsuruh si Resin, raja ni Aram pakon si Peka, anak ni si Remalya mangimbang Juda.
38Dob ai modom ma si Jotam rap pakon ompungni, anjaha itanom ma ia i lambung ni ompungni, i huta ni si Daud, ompungni ai. Jadi si Ahas, anakni ai ma bangkit raja manggantihsi.