Dual PanelRaja Joram Marporang dompak Halak Moab
1Ia si Joram, anak ni si Ahab, bangkit ma gabe raja manggomgom Israel i Samaria pasapuluh-ualuhtahunkon dob gabe raja si Josafat i Juda, anjaha sapuluh dua tahun do ia manrajai.
2Ihorjahon do sogam ni uhur ni Jahowa, tapi seng songon bapani barang inangni; ai ipadaoh do gana-gana Baal, na pinauli ni bapani hinan.
3Tapi longkot do uhurni hu bani dousa ni si Jerobeam, anak ni si Nebat, na mambahen Israel mardousa; seng surut ia hunjai.
4Ia si Mesa, raja ni Moab, sipiara biri-biri do; maningon galaronni do utang sombah hu bani raja ni Israel ibagas satahun saratus ribu anak ni biri-biri pakon ambulu ni saratus ribu biri-biri tunggal.
5Tapi dob matei si Ahab marbalik ma raja ni halak Moab hun bani raja ni halak Israel.
6Halani ai luar ma ijia Raja Joram hun Samaria, jadi iharah ma ganup halak Israel.
7Anjaha isuruh ma suruhanni marayak si Josafat, raja ni Juda, nini ma hu bani, “Domma marbalik raja ni Moab hun bangku; ra do ham laho pakon ahu mamorang Moab?” Jadi nini ma, “Ra do ahu, ia sonin bangsamu sonai do bangsangku, ia sonin hudamu sonai do homa hudangku.”
8Dob ai nini ma, “Hun dalan ja do hita tangkog?” Balos ni si Joram, “Hun dalan na i halimisan Edom.”
9Jadi bingkat ma raja ni Israel, pakon raja ni Juda ampa raja ni Edom. Jadi dob pitu ari sidea mardalan na maringgot ai, hurangan bah ma bala ai pakon pinahan na mangirikkon sidea ai.
10Dob ai nini raja ni Israel ma, “Domma idilo Jahowa hape raja na tolu on hujon laho mangondoskon sidea hubagas tangan ni halak Moab.”
11Jadi nini si Josafat ma, “Ai seng dong nabi ni Jahowa ijon, ase sungkun hita Jahowa marhiteihonsi?” Jadi ibalosi sahalak juakjuak ni Raja Israel ma ia, “Ijon do si Elisa, anak ni si Safat, siuseihon bah hu bani tangan ni si Elias.”
12Nini si Josafat ma, “Bani do tongon hata ni Jahowa.” Jadi rap tuad ma raja ni Israel, si Josafat pakon raja ni Edom marayaksi.
13Jadi nini si Elisa ma hu bani raja ni Israel, “Aha pardomuanku bam? Laho ma ham marayak nabi ni amangmu pakon inangmu.” Tapi nini raja ni Israel ma hu bani, “Ulang sonai, ai Jahowa do na mandilo raja na tolu on laho mangondoskon sidea hubagas tangan ni Moab.”
14Dob ai nini si Elisa ma, “Songon sintongni manggoluh Jahowa Zebaot, anjaha ahu jongjong marugas i lobei-Ni, ambit ulang si Josafat, raja ni Juda na hutatap, seng tataponku barang na kawahkononku ham.
15On pe, boan nasiam ma bangku sahalak parhusapi.” Jadi sanggah na marhusapi ai parhusapi ai, sogop ma tangan ni Jahowa hu bani.
16Jadi nini ma, “Sonon do hata ni Jahowa, ʻHurak nasiam ma lubang i habungan on!ʼ
17Ai sonon do hata ni Jahowa, Seng idahon nasiam roh udan barang logou, tapi maningon gok bah do habungan on, ase minum nasiam pakon bala nasiam ampa pinahan nasiam.
18Maotiktu ope ai, nini uhur ni Jahowa; ondoskonon-Ni ope halak Moab ai hubagas tangan nasiam.
19Maningon patundukon nasiam sagala huta na pinatoguh anjaha maningon robohon nasiam do sagala hayu na marbuah; maningon tambusan nasiam do haganup bah tubuh, anjaha tarulang bahen nasiam ganup juma na lambutan marhitei batu.
20Patarni ai, hira-hira panorang panggalangonkon bani galangan sipanganon, tonggor ma, roh ma bah hun Edom, gabe gok bah ma tanoh ai.”
21Dob ibogei ganup halak Moab barita ai, na dob tangkog raja-raja ai laho marporang dompak sidea, mintor iharah ma sagala na dob boi mamboan sinjata, hun bani siposonan das hu bani sitorasan, anjaha ipaodor ma sidea jongjong i parbalogan.
22Jadi sanggah puho sidea girah sogod, anjaha marsinalsal mata ni ari bani bah ai, iidah halak Moab ma bah i lobei ni sidea, gerger songon daroh.
23Jadi nini sidea ma, “Daroh do ai; tontu na marsiporangan do raja-raja ai, anjaha marsibunuhan. Halani ai, alo halak Moab, ayob ma taban-taban ai!”
24Tapi daskonsi sidea hu parsaranan ni halak Israel, luar ma halak Israel anjaha idorab ma sidea, gabe maporus ma sidea, anjaha inunut mambunuhi halak Moab ai.
25Iparseda sidea ma huta-huta, anjaha hu bani sagala juma na lambutan ipanggijigkon sidea bei ma batu, ronsi rungkub ai; itambusi sidea do sagala bah tubuh, anjaha iroboh sagala hayu na marbuah; pitah huta Kir-Hereset mando na tading martembok. Roh ma hujai parumbalang manginggoti lanjar manaluhon ai.
26Jadi dob iidah raja ni Moab, na so boi be ia monang, iharah ma pitu ratus halak siparpodang mandorab raja ni halak Edom, tapi seng tolap.
27Jadi ibuat ma anak bunga tubuhni, sirajahonon holi manggantihsi, gabe igalangkon ma ia bahen galangan situtungon i atas ni tembok ai. Jadi sogop ma songgot banggal bani Israel; surut ma sidea hun bani, anjaha mulak hu tanohni.