Dual PanelParmulak ni si Absalom
1Jadi dob ibotoh si Joab, anak ni si Seruya na dob masihol uhur ni raja ai mangidah si Absalom,
2jadi isuruh si Joab ma hu Tekoa mangalopi sada puang-puang na pantas maruhur hunjai, anjaha nini ma dompaksi, “Pakulah ma pusok uhurmu, anjaha pahei ham ma paheian pusok ni uhur, ulang ma marminak ham, tapi pakulah ham ma songon sada naboru na dob dokah manangisi na mateini.
3Dob ai laho ma ham marayak raja ai, anjaha hatahon ham ma hu bani romban hu bani hata on.” Iajari si Joab ma ia pasal hata sihatahononni.
4Dob das naboru na hun Tekoa ai hu bani raja ai, manrogop ma ia anjaha marsombah, nini ma, “Urupi ham ma, rajanami!”
5Nini raja ai ma hu bani, “Aha gatni bam?” Jadi nini ma, “Sada naboru na dob mabalu do ahu, domma matei paramangonku.
6Adong do bani jabolonmu naboru on dua anak, jadi martinggil ma sidea na dua i ladang, anjaha sahalak pe lang dong na manolahi sidea, marsibunuhan ma sidea gabe matei ma sahalak.
7Dob ai roh ma ganup hade-hade mangimbang jabolonmu naboru on, nini sidea ma, ʻBoan hujon halak sibunuh anggini ai, ase ibunuh hanami ia bahen abul ni anggini na binunuhni ai; sonai ma sihol bunuhon ni sidea homa sipanean ai.ʼ Sihol sasapkononkon ni sidea do mata ni aringku na tading ai, ase ulang adong teba bani paramangonkon goran barang sima-sima i atas tanoh on.”
8Dob ai nini raja ai ma dompak naboru ai, “Laho ma ham mulak hu rumahmu, hubere pe parentah pasal ham.”
9Nini naboru na hun Tekoa ai ma dompak raja ai, “Tuan, rajanami, manginsonoh hu bangku pakon hu bani ginompar ni bapa ma hajahaton ai; tapi borsih ma raja in pakon paratasni.”
10Dob ai nini raja ai ma, “Anggo adong barang ise na mangkatahon na sonaha ope bamu, boan ham ia hu lobeihu, ase ulang be inunut manunsahi ham.”
11Dob ai nini ma, “Sai mardingat ma raja in bani Jahowa, Naibatamu, ase ulang be idalankon sipambalas ai be pamunuhon, anjaha anakkai ulang isiapkon.” Nini raja ai ma mambalosi, “Songon sintongni manggoluh Jahowa, seng anjai marurus sada jambulan ni anakmu ai hu tanoh.”
12Dob ai nini naboru ai ma, “Santabi rajanami, lopas ham ma jabolonmu naboru on mangkatahon hata sangkababah hu bani tuanku.” Nini ma, “Hatahon ma!”
13Nini naboru ai ma, “Mase ma sonai paruhuranmu dompak bangsa ni Jahowa? Marhitei haputusan ni raja in, domma iuhum ham dirimu, halani seng ipalopas raja in mulak halak na pinabalini.
14Tongon maningon matei do hita ganup, anjaha usih do hita bani bah na durus hu tanoh, na so tarpatumpu be; tapi lang mintor ibuat Naibata hosah ni sada halak, tapi ipingkiri do dalan-dalan ase ulang lanjar bali hun bani halak na dob bali hinan.
15On pe, ase roh pe ahu mangkatahon hatangku hu bani raja in, halani ipambiarbiari halak do ahu; jadi nini uhur ni jabolonmu naboru on ma, ʻMarsahap ma ahu hu bani raja in, atap ra raja in mandalankon pangindoan ni jabolonni naboru on.ʼ
16Tontu ra do raja in manangihon anjaha paluahkon jabolonni naboru on hun bani tangan ni halak na sihol mangagou ahu rap pakon anakku hun bani parbagianan ni Naibata.
17Ambahni ai nini uhur ni jabolonmu naboru on do, ʻAndohar hata ni tuanku, raja in, pasonang uhurhu; ai songon malekat ni Naibata do tuanku, na mambotoh aha na madear atap na masambor; sai ihasomani Jahowa Naibata ma ham.ʼ”
18Dob ai nini raja ai ma mambalosi naboru ai, “Ulang ma porsou bangku hata na sihol sungkunonku bam.” Nini naboru ai ma, “Antong, marsahap ma hita, rajanami.”
19Dob ai nini raja ai ma, “Ai lang si Joab do na manranggi haganupan in?” Nini naboru ai ma mambalosi, “Songon sintongni manggoluh ham, tuannami anjaha rajanami, seng dong manlembang hu siamun barang hu sambilou hun bani na hinatahon ni tuanku; juakjuakmu si Joab do na mangkatahon ahu, ia do na mangaturhon ganup hata ai hubagas pamangan ni jabolonmu naboru on.
20Mambahen marlimbaga pe parsahapan ai lanjar binahen ni juakjuakmu si Joab do, tapi na pantas maruhur do tuannami songon pantas ni uhur ni sada malekat ni Naibata, na mabotoh haganup na masa i tanoh on.”
21Dob ai nini raja ai ma dompak si Joab, “Tonggor ma, domma hubahen romban hu bani hatamon; antong, laho ma ho, boan ma mulak garama ai, si Absalom ai.”
22Jadi manrogop ma si Joab anjaha marsombah, ipasu-pasu ma raja ai, anjaha nini ma, “Sadari on ma hubotoh, na dob dapotan idop ni uhur do ahu, juakjuakmu i lobeimu, alo rajanami, halani ibahen raja in romban hu bani pangindoan ni juakjuakni.”
23Dob ai laho ma si Joab hu Gesur, anjaha iboan ma si Absalom hu Jerusalem.
24Tapi nini raja ai ma, “Mulak ma lobei ia hu rumahni, seng bulih ope idahonni bohingku.” Jadi mulak ma si Absalom hu rumahni, tapi anggo bohi ni raja ai seng boi ope idahonni.
25Tapi seng dong bani sab Israel na sonai tarmurmurni halani jengesni songon si Absalom; hun bani jampal ni naheini das hu pakpak ni uluni, seng dong tikasni.
26Anjaha sanggah iparasipkon jambulan ni uluni (ai somal do ai iparasipkon bani ujung ni ganup tahun, anggo maborattu ma ai bani, iparasipkon ma ai), itimbang do jambulan ni uluni ai, dua ratus sekel boratni bani timbangan ni raja ai.
27Dob ai tubuh ma bani si Absalom tolu anak, anjaha sada boru na margoran si Tamar; sada naboru sijenges rupa do ia.
28Dua tahun ma si Absalom marianan i Jerusalem, tapi lanjar seng ongga dong iidah bohi ni raja ai.
29Jadi isuruh si Absalom ma na mangalopi si Joab, laho marsuruhsi hu bani raja ai, tapi seng ra roh si Joab hu bani. Dob ai isuruh ma use paduahalihon, tapi lanjar do seng ra ia roh.
30Dob ai nini ma dompak juakjuakni, “Tonggor nasiam ma, i lambung ni jumangku do juma ni si Joab, anjaha margandum do ia ijai; laho ma nasiam anjaha surbuy nasiam ma juma ai.” Jadi isurbuy juakjuak ni si Absalom ma juma ai.
31Jadi laho ma si Joab marayak si Absalom hu rumahni, nini ma hu bani, “Mase ma isurbuy juakjuakmu jumangkai?”
32Dob ai nini si Absalom ma dompak si Joab, “Tonggor ma, domma husuruh na mangalopi ham, mangkatahon, ʻRoh ma ham hujon, ase husuruh ham marayak raja in, laho manungkunsi.ʼ Mase ma roh ahu hun Gesur? Rahanan do bangku, ijai ope ahu sonari. On pe sihol do idahonku bohi ni raja in; anggo marsalah ope ahu, ibunuh raja in ma lah ahu.”
33Dob ai laho ma si Joab marayak raja ai, anjaha ipatugah ma ai bani; jadi idilo ma si Absalom. Daskonsi ia hu bani raja ai, manrogop ma ia marsombah i lobei ni raja ai; jadi isummah raja ai ma si Absalom.