Alkitab Mobile SABDA
[VER] : [SIMALUNGUN]     [PL]  [PB] 
 <<  2 Samuel 3 >> 

1Dokah do marnunut porang ai i tongah-tongah ni ginompar ni si Saul pakon ginompar ni si Daud; lambin dokah lambin gogohni ma si Daud, tapi lambin galekni do anggo ginompar ni si Saul.

Anak ni si Daud

2Sanggah i Hebron si Daud, tubuh ma piga-piga anak bani: Bunga tubuhni si Ammon, na pinupus ni si Ahinoam, na hun Jesreel;

3anakni paduahon si Kileab, na pinupus ni si Abigail, parinangon ni si Nabal hinan, na hun Karmel; na patoluhon si Absalom, na pinupus ni si Maaka, boru ni si Talmai, raja hun Gesur;

4anakni paompatkon si Adonia, na pinupus ni si Hagit; anakni na palimahon si Sepatya, na pinupus ni si Abital;

5anakni na paonomkon si Jitream, na pinupus ni si Egla, parinangon ni si Daud. Ai ma anak, na itubuhkon bani si Daud i Hebron.

Partinggilan ni si Abner pakon si Isboset

6Sadokah masa porang i tongah-tongah ni ginompar ni si Saul pakon ginompar ni si Daud, lambin markuasa ma si Abner i rumah ni si Saul.

7Adong ma sada parinangon ni si Saul, na margoran si Rispa, boru ni si Aya. Sahali nini si Isboset ma dompak si Abner, “Mase iparayak ham parinangon ni bapa?”

8Jadi manringis tumang ma uhur ni Abner halani hata ni si Isboset ai, nini ma, “Ulu ni baliang ni Juda do ahu? Das bani sadari on bujur do pambahenku hu rumah ni si Saul, bapamu ondi, hu bani saninani pakon hu bani huan-huanni, anjaha seng huondoskon ham hu tangan ni si Daud, hape pag do ham sadari on manalahkon ahu halani panlangkahku dompak naboru ai?”

9Sonon ma bahenon ni Naibata hu bani si Abner, age lobih tene ibahen hu bani, anggo seng hubahen songon na binulawankon ni Jahowa hu bani si Daud,

10ai ma paminsahkon harajaon ai hun bani rumah ni si Saul, anjaha pajonamkon hotak harajaon ni si Daud i Israel pakon i Juda, singgan ni Dan ronsi Berseba.

11Sangkababah hata pe lang ibalosi si Isboset ai si Abner, halani biar ni uhurni mangidahsi.

12Dob ai isuruh si Abner ma suruhanni marayak si Daud, mangkatahon bani, “Ise do simada tanoh in? Marpadan ma ham pakon ahu, sai na hasomanan ni tanganku do ham laho mangarahkon ganup Israel bamu.”

13Jadi nini ma, “Dear! Ra do ahu marpadan pakon ham; tapi dong sada na huparsinta hun bamu, ai ma na so bulih idahonmu bohingku, anggo seng iboan ham lobei si Mikal, boru ni si Saul ondi, anggo sihol ham roh mangidah bohingku.”

14Ambahni ai isuruh si Daud ma suruhanni marayak si Isboset, anak ni si Saul ondi, mangkatahon bani, “Bere ma hu bangku parinangonku si Mikal in, na hubuat bahen parinangonku marhitei saratus sibur-sibur ni halak Palistim.”

15Dob ai isuruh si Isboset ma na mangalop naboru ai hun bani paramangonni, ai ma si Paltiel, anak ni si Lais.

16Lanjar itaruhkon paramangonni ai do ia, anjaha inunut tangis i pudi ni das hu Bahurim. Dob ai nini si Abner ma hu bani, “Laho ma ho mulak!” Jadi mulak ma ia.

17Dob ai manriah ma si Abner pakon pangintuai-pangintuai ni halak Israel, nini ma, “Domma dokah iparsinta nasiam si Daud gabe raja nasiam.

18Antong pasaud nasiam ma ai sonari, ai domma ihatahon Jahowa hu bani si Daud, ʻManingon marhitei tangan ni si Daud, jabolon-Kin, paluahon-Ku bangsang-Ku halak Israel hun tangan ni halak Palistim pakon hu tangan ni ganup munsuh ni sidea.ʼ”

19Sonai homa do ihatahon si Abner hu bani halak Benjamin. Dob ai laho ma si Abner hu bani si Daud i Hebron, laho mangkatahon hu bani barang aha na dob pinutuskon ni halak Israel pakon ganup ginompar ni si Benjamin.

20Jadi dob das si Abner hulobei ni si Daud i Hebron odor pakon dua puluh halak hasomanni, ibahen si Daud ma ambangan ni si Abner pakon hasomanni ai.

21Dob ai nini si Abner ma dompak si Daud, “Laho ma ahu sihol patumpuhon bani tuanku, raja in, haganup halak Israel, ase marpadan sidea pakon tuanku, ase ham ma manggomgom haganup romban hu bani rosuh ni uhurmu.” Jadi ihatahon si Daud ma laho si Abner, gabe laho ma ia ibagas damei.

Ibunuh si Joab si Abner

22Tudu ijia roh ma juakjuak ni si Daud pakon si Joab hun partabanan, anjaha buei do iboan sidea taban-taban. Tapi lang be i lambung ni si Daud i Hebron si Abner ai, ai domma ihatahon si Daud ia mulak mardamei-damei.

23Jadi dob das si Joab rap pakon ganup bala hasomanni ai, dong ma na patugahkon hu bani si Joab sonon, ʻRoh do si Abner, anak ni si Ner, mangadap raja in anjaha ibere do ia use laho ibagas damei.ʼ

24Dob ai iparayak si Joab ma raja ai, nini ma, “Aha do na binahenmu in? Tonggor ma, roh do hape si Abner hu lobeimu; mase ma ipaturut ham ia laho ibagas damei?

25Ai lang ibotoh ham do paruhuron ni si Abner, anak ni si Ner ai; ase roh pe ia na sihol mangoto-otoi ham do, sihol mambotoh sagala pambahenanmu do?”

26Dob ai luar ma si Joab, itadingkon ma raja ai; isuruh ma suruhanni mangayaki si Abner, gabe iboan sidea ma ia mulak hun parigi na i Sira; tapi seng ibagas botoh ni si Daud ai.

27Jadi dob mulak si Abner hu Hebron, iarahkon si Joab ma ia manirpang hu tongah-tongah ni horbangan ai, ipakulah sihol dong husipkononni padua-dua hape itobak ma ia ijai, hona boltokni, lanjar matei, laho mambalaskon daroh ni si Asahel saninani ai.

28Jadi dob ibogei si Daud na masa ai, nini ma, “Seng marsalah ahu pakon harajaonkin i lobei ni Jahowa sadokah ni dokahni pasal daroh ni si Abner, anak ni si Ner ai.

29Sai marsapata hu bani ulu ni si Joab ma ai pakon hu bani ganup ginompar ni bapani; ulang ma maronti namin hun bani ginompar ni si Joab na rojanon, na gadamon, na tempang martungkot-tungkot, na matei ibuat podang pakon na hurangan sipanganon.”

30Ase ibunuh si Joab pakon si Abisai, anggini ai pe si Abner, halani na binunuhni ai do si Asahel, anggi ni sidea ai, i Gibeon sanggah marporang.

31Dob ai nini si Daud ma hu bani si Joab pakon hu bani haganup na rap pakonsi ai, “Rigati nasiam ma hiou nasiam bei, anjaha sorungkon nasiam ma hiou guni, anjaha tangis ma nasiam mardalan i lobei ni si Abner!” Raja Daud sandiri pe mardalan do hun pudi ni na mangusung ai.

32Jadi laho mananom si Abner ai sidea i Hebron, ipagogoh raja ai ma sorani tangis i lambung ni tanoman ni si Abner; tangis do homa halak simbuei ai.

33Itangisi raja ai ma si Abner, nini ma, “Mintor songon parmatei ni halak na oto ma parmatei ni si Abner?

34Seng hona sangkut tanganmu, seng hona bayang naheimu; songon halak na matei ibunuh panamun, sonai do hape parmateimu.” Dob ai tangis ma use simbuei ai halanisi.

35Dob ai roh ma halak simbuei ai mangelek-elek si Daud ase mangan namin, sanggah siang ope ari; tapi nini si Daud ma marbija, “Sai ibahen Naibata ma sonai hu bangku, age itambahi ope, anggo hupangan ruti barang aha na legan, anggo lape sundut mata ni ari.”

36Jadi dob iidah halak simbuei ai, dear ma uhur ni sidea pasal ai, rosuh do uhur ni ganup na mabuei ai mangidah ganup na binahen ni raja ai.

37Jadi mangahap ma haganup halak Israel sadari ni ai, na so ibagas botoh ni raja ai hona bunuh si Abner, anak ni si Ner ai.

38Dob ai nini raja ai ma hu bani juakjuakni, “Ai lang ibotoh nasiam sada halak pamimpin, na bolon matei sadari on i Israel?

39Tapi anggo ahu magalektu ope, age pe domma iminaki gabe raja, tapi halak on, anak ni si Seruya, gogohan do sidea hun bangku. Sai ibalaskon Jahowa do hu bani sibahen hajahaton, romban hu bani hajahatonni.”


  Share Facebook  |  Share Twitter

 <<  2 Samuel 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel