Alkitab Mobile SABDA
[VER] : [SIMALUNGUN]     [PL]  [PB] 
 <<  2 Samuel 1 >> 

Ijalo si Daud Barita Pasal Parmatei ni si Saul ampa si Jonatan

1Jadi dob matei si Saul, anjaha si Daud pe domma mulak hun bani na mantaluhon halak Amalek, anjaha dua ari ma ia i Ziklag,

2jadi bani ari patoluhon, tonggor ma, roh ma sada halak hun bani parsaranan ni si Saul, marigat hiouni anjaha tanoh i atas ni uluni. Daskonsi ia hu bani si Daud, manrogop ma ia anjaha marsombah.

3Nini si Daud ma hu bani, “Na roh hunja do ho?” Nini ma hu bani, “Na maporus do ahu hun parsaranan ni halak Israel.”

4Dob ai nini si Daud ma hu bani, “Aha do na masa? Patugah ma bangku.” Nini halak ai ma, “Domma maporus bangsa ai hun parporangan, buei do hun bani bangsa ai na matei, anjaha si Saul pakon anakni si Jonatan domma matei.”

5Nini si Daud ma hu bani anak parana, na mamboan barita ai hu bani, “Sonaha pambotohmu, na dob matei si Saul pakon anakni si Jonatan?”

6Jadi nini anak garama, siboan barita ai ma hu bani, “Tudu ahu i Dolog Gilboa; mangunsandei do si Saul bani tanjani, anjaha manrohan gareta porang pakon siparhuda mangasaksi.

7Marhusor ma ia, iidah ma ahu, dob ai idilo ma ahu. Ningku ma mambalosi, ʻIjon do ahu!ʼ

8Nini ma hu bangku, ʻAi ise do ho?ʼ Ningku ma bani, ʻHalak Amalek do ahu.ʼ

9Dob ai nini ma hu bangku, ʻRoh ma ho hujon, tobak ma ahu, ai domma margonggong namin huahap, tapi ibagas ope hosahku.ʼ

10Jadi hupadohor ma hu bani, anjaha hubunuh ma ia, halani tangkas do hubotoh, seng anjai manggoluh be ia anggo domma pala runggang; dob ai hubuat ma sortali na i uluni ai pakon golang-golang na bani tanganni, anjaha huboan do ai nuan bani tuannami.”

11Dob ai ijolom si Daud ma bajuni, lanjar irigati ma ai; sonai do homa ibahen halak na rap pakonsi ai.

12Dob ai tangis-tangis ma sidea, anjaha marpuasa ronsi bodari, halani si Saul pakon si Jonatan, anakni ai, pakon halani bangsa ni Jahowa ampa halak Israel na radag ibahen podang.

13Dob ai nini si Daud ma hu bani anak parana na mamboan barita ai bani, “Hunja do ho?” Nini ma mambalosi, “Anak ni sada halak panginsolat do ahu, halak Amalek.”

14Nini si Daud ma hu bani, “Mase ma lang mabiar ho mardas tangan hu bani na mininakan ni Jahowa?”

15Dob ai idilo si Daud ma sada hun bani anak garama, nini ma, “Roh ma ho, bunuh ma ia!” Jadi ibunuh ma ia.

16Tapi nini si Daud do hu bani, “Marsapata hubam ma darohmu; pamanganmu do gabe saksi dompak ho, ai nim do, ʻAhu do mamunuh na mininakan ni Jahowa.ʼ”

Tangis-tangis ni si Daud halani si Saul pakon si Jonatan

17Dob ai itangiskon si Daud ma tangis-tangis on pasal si Saul pakon si Jonatan, anakni ai,

18anjaha ihatahon maningon ajarhononkon do ai hu bani halak Juda; tonggor ma, tarsurat do ai ibagas buku ni halak na bonar.

19Domma matei tarpantom hamuliaonmu, o Israel, tarpantom i atas buntu-buntu. Sonaha do parmatei ni halak na borani ai?

20Ulang patugah in i Gat, ulang mungmungkon in bani dalan-dalan i Askalon, ase ulang marmegah-megah boru ni halak Palistim, ase ulang marsurak-surak boru ni halak na so marsunat ai.

21Nasiam Dolog-dolog Gilboa! Ulang be namin turun namur barang udan bani nasiam, nasiam juma panggalangan. Ai ijin do mambuk gantar ni puanglima, gantar ni si Saul, sinjata ni halak na mininakan.

22Na so ongga mulak do namin panah ni si Jonatan hun bani daroh ni halak na timbul, hun bani taboh-taboh ni puanglima, anjaha podang ni Saul pe namin seng mulak, anggo lang dapotan.

23Ham Saul ampa Jonatan, na hinaholongan anjaha haudungan ni uhur! Sanggah manggoluh barang matei seng marsirang sidea; dorasan do sidea hun bani manuk-manuk nanggordaha, anjaha gogohan do sidea hun bani singa.

24Nasiam boru Israel tangisi nasiam ma si Saul, na mangkioui nasiam jenges bani sitora sigerger, na mambahen pakeian nasiam marjagar-jagar hun bani omas.

25Sonaha do parmatei ni puanglima i tongah-tongah ni parporangan! Si Jonatan matei tarpantom i atas buntu-buntu.

26Pusok do uhurhu halani ham, o Jonatan saninangku, holong tumang do ham bangku. Tobunan do holong ni uhurmu bangku hun bani holong ni naboru.

27Sonaha do parmatei ni puanglima pakon parmasab ni sinjata porang!


  Share Facebook  |  Share Twitter

 <<  2 Samuel 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel