Dual Panel(Sambatni)
1Bani jolma do uhur panimbangion, tapi humbani Jahowa do roh sisahapkonon ni dilah.
2Haganup dalanni borsih do ninuhur ni halak, tapi Jahowa do siantan uhur.
3Ondoskon ma bani Jahowa sagala horjamu, ase saud haganup sura-suramu.
4Haganup do ijadihon Jahowa domu hubani sura-sura-Ni, age parjahat ai, ase hona uhum.
5Hagigi ni Jahowa do halak sigijang uhur; tongon seng anjai lang hona uhum ia.
6Marhitei holong ampa habujuron do salosei hasalahan, anjaha marhitei biar bani Jahowa boi do tarsimbili halak hajahaton.
7Anggo marosuh Jahowa mangidah parlahou ni sada halak, munsuhni pe ipadamei do hu bani.
8Rahanan do na otik ibagas hapintoron, ase pansarian na buei, na so tiba dalanni.
9Uhur ni jolma marpingkir-pingkir pasal dalanni, tapi Jahowa do na manontuhon langkahni.
10Haputusan na humbani Naibata do bani bibir ni raja, bani paruhuman seng anjai lepak sahapni.
11Kilo ampa timbangan na sintong, Jahowa do simadasi; Ia do na mangadongkon haganup batu timbangan.
12Hagigi ni raja, ai ma mangkorjahon hajahaton, ai marhitei hapintoron do totap paratasni.
13Harosuh ni raja, ai ma bibir hasintongan, anjaha parsahap na sintong do ihaholongi.
14Ringis ni raja, suruhan hamatean do ai, tapi mahombun do ai ibahen halak na pentar.
15Minar ni bohi ni raja pagoluhkon, anjaha halayakonni doskon hombun na manorap bani logou ni ari.
16Jumpahan hapentaran, dearan do ai humbani omas, dapotan hauhuron, harganan humbani pirak.
17Dalan ni halak parpintor daoh do ai humbani hajahaton, anjaha na mangkargahon goluhni, ijaga do langkah-langkahni.
18Parlobei ni hasedaon ai ma gijang ni uhur, anjaha pangenjengon do parlobei ni hadabuhon.
19Dearan do martoruh ni uhur rapkon na masombuh, ase marbagi taban-taban rap pakon halak na jungkat.
20Halak na marimbagaskon hata, dapotan na madear, anjaha martuah do halak na marhatengeran bani Jahowa.
21Halak siparuhur igoran do ai na pentar, anjaha mantin ni panluar mambahen margogoh podah.
22Bah tubuh hagoluhan do uhur hapantason bani parsimada ai, tapi haotoon do ajar ni halak na bodoh.
23Uhur ni na pentar papandei pamanganni, anjaha itambah do podah bani bibirni.
24Songon manisan ni lobah do hata na lamlam, mantin bani uhur, anjaha tambar bani holi-holi.
25Adong do dalan, pintor do ai ninuhur ni halak, hape ujungni gabe hamatean do.
26Lohei ni si parhorja manjuljulsi marhorja, ai pamanganni do sipamaksa bani.
27Halak parjahat paranggi-ranggi hamagouan, anjaha songon apuy na gara do bibirni.
28Halak sipanggeori pabolag paringoran, anjaha siparrisai manirang na marhuan.
29Dalahi sipangodoh-odoh pakahou hasomanni, anjaha ibobai do ia bani dalan na so madear.
30Halak na pahirdop-hirdop matani, sipingkiri na masambor do ai, anjaha sipangemngem pamanganni, ai ma sihorjahon hajahaton.
31Uban, ai ma sortali hamuliaon, jumpah do ai marhitei goluh na pintor.
32Dearan do parsabar humbani puanglima, anjaha na marrajai dirini humbani sipatunduk huta.
33Ihursuk-hursuk pe ruji-ruji ibagas abingan, tapi humbani Jahowa do roh haputusan.