Dual PanelPasu-pasu bani Halak Siirikkon Hapentaran in
1Ale anakku, anggo ijalo ho hatangku anjaha iparimbagaskon ho titahku,
2tangi ho bani hapentaran anjaha itareihon ho uhurmu dompak pangarusion,
3tongon, anggo dilo-dilo ho bani pangarusion, ipamaling ho soramu mangindo hauhuron,
4anggo ipindahi ho ai songon na mangindahi pirak, anjaha i torihi ho ai songon bani arta na ponop,
5jadi arusanmu ma biar dompak Jahowa, anjaha jumpah ho habotohon pasal Naibata.
6Ai Jahowa do sibere hapentaran, humbani pamanganni do roh habotohon pakon hauhuron;
7Ia do sipasirsir pangurupion bani halak parpintor, Ia do gantar bani halak na bujur marparlahou.
8Ijaga do pardalan ni uhum, anjaha iramotkon do dalan ni halak na daulat Bani.
9Jadi arusanmu ma hapintoron pakon uhum, habonaron pakon sagala dalan na dear;
10ai roh ma hapentaran hubagas uhurmu, anjaha mantin ma habotohon bani tonduymu;
11uhur hapantason ma manramotkon ho, anjaha pangarusion siparjaga bam.
12Paluahonni do ho humbani dalan hamagouan, humbani halak sisahapkon na masambor,
13halak na manundalhon dalan hasintongan, laho mardalan bani dalan hagolapan,
14na marosuh mangkorjahon na marsambor anjaha na marmalas uhur bani tahi-tahi na jahat,
15halak na marlegot-legot pardalanni, na mardalan bani dalan hakahouan.
16Paluahonni do ho humbani parinangon ni halak, humbani parinangon na legan simantin sahap,
17na manadingkon hasoman haposoonni hinan, na mangkalupahon padan ni Naibatani.
18Ponop do rumahni hu hamatean, sonai age dalanni hu nagori toruh.
19Sagala na laho hu bani, seng mulak be, anjaha seng dapotsi be dalan hagoluhan.
20Mardalan ma ho bani dalan ni halak na bujur, anjaha totap ma ho bani dalan ni halak parpintor.
21Tongon halak parpintor do siiankon tanoh on, anjaha halak na daulat totap marianan ibagas,
22tapi halak parjahat ripasonkon do hun tanoh ai, anjaha halak sipangosei iorbat do hunjai.