Dual PanelBalos ni si Job na Paduahalihon bani si Sopar: Songon na Totap do Idahon Hadoharon ni Halak Silupahon Naibata
1Dob ai nini si Job ma mambalosi,
2“Tangi ma hanima bani hatangku, ai ma gabe pangapoh bangku hun bannima.
3Sabar ma hanima, ase marsahap ahu, anggo salpu ma ahu marsahap, age pe nunut hanima manrehei.
4Bani jolma do ahu na adu-adu ai? Mase ma lang unduk uhurhu?
5Dompakkon hanima ma ahu, anjaha hirjat ma, anjaha songom hanima ma pamangannima.
6Anggo hudingat ai, jadi gobir do ahu, manorgi ambulu ni angkulangku.
7Mase ma manggoluh halak parjahat, das bani na sayur matua anjaha lambin margogoh?
8Marsonang-sonang dakdanakni i lambungni, anjaha sombuh paidah-idah ginomparni.
9Marsonang-sonang do rumah ni sidea, seng marhabiaran, anjaha seng ongga mangonai simambu ni Naibata bani sidea.
10Manggargar jonggini, jadi-jadi maranaki lombuni, seng ongga molei.
11Isuruh sidea anakni mardalani doskon hulanan ni biribiri, anjaha manortor-nortori anakni.
12Mandoding sidea marpangiring gonrang ampa husapi, anjaha marolob-olob sidea pabogei-bogei tarompit.
13Manggoluh sidea ibagas na marsonang-sonang, anjaha ibagas damei tuad sidea hu nagori toruh.
14Nini sidea dompak Naibata, ʻLaho hun bennami! Seng marosuh hanami pabotoh-botoh dalan-Mu!
15Ise ma Ia Pargogoh Na So Tarimbang in, ase pabalos-balosannami Ia? Anjaha aha ma untung bennami, anggo martonggoi hanami Bani?ʼ
16Tonggor ma, lang ibagas tangan ni sidea hadoharon ni sidea. Sai daoh ma humbangku pingkiran ni halak parjahat.
17Ai gati do mintop suluh ni halak parjahat, anjaha sogop hamagouan bani sidea? Ai gati do iparoh Naibata hinamagou bani sidea ibagas Ringis-Ni?
18Songon anggala do sidea i lobei ni alogo, anjaha songon omei lapung pinurpurhon ni habahaba.
19Isimpan Naibata do papani bani ginompar ni sidea. Sai bani sidea sandiri ma namin ai ibalaskon Naibata, ase mangahap sidea ijai.
20Sai sompat ma namin ididah mata ni sidea sandiri hamagouan ni sidea ai, sidea sandiri ma namin minum humbani ringis ni Pargogoh Na So Tarimbang in.
21Ai ia ope na sari bani ginomparni, dob matei ia, dobkonsi gok bilangan ni bulanni?
22Ai jolma do na mangajarhon parbinotohan bani Naibata, Ia, siuhumi parnagori atas?
23Adong deba na matei ibagas hadoharon, marsonang-sonang anjaha mardamei-damei,
24sanggah gok taboh-taboh angkulani, anjaha gok utok-utok ope holiholini.
25Adong deba nari matei marpusok ni uhur tumang, seng ongga mandai hasonangan.
26Hape rap sidea modom ibagas orbuk, anjaha gilokni manrungkub sidea.
27Tonggor ma, hubotoh do pingkirannima in, ampa sura-suranima na sihol mangodoh ahu.
28Nini hanima, ʻIja do nuan rumah ni halak siparkuasa, anjaha ija do rumah ni halak parjahat?ʼ
29Naha, ai lang ongga isungkun hanima halak sipardalan daoh, anjaha seng tarporsou hanima hasaksian ni sidea ai,
30paboa seng marmara halak parjahat bani ari hamagouan, anjaha bansah sidea bani ari pambalason?
31Ise ma na mangkutuksi pasal parlahouni i lobeini? Anjaha ise ma na mambalaskon bani, domu hubani na binahenni ai?
32Dob itaruhkon ia hu tanoman, ibahen do parjaga bani tanomanni.
33Lampot marradagan i atasni tanoh himpal ni habungan ai, ganup jolma mangihut hun pudini, anjaha halak na dob parlobei humbani seng tarhira.
34Mase ma nunutonnima mangapoh ahu? Ah, soyani in pangapohnima bangku, anjaha balosnima ai, na so sintong hansa ai.”