Dual PanelBalos ni si Job na Patoluhalihon bani si Bildad:; Ise ma na Boi Mandadap Habanggalon ni Naibata?
1Dob ai nini si Job ma mambalosi,
2“Dear ni pambahenmin tene, mangurupi halak na so margogoh, anjaha itungkol ho do tangan na so margolle!
3Dear ni pamodahimin bani halak na hurang uhur, anjaha bueini in pingkiran na bagas ipabotohkon ho!
4Ise do na pabotohkon parsahapan on bam? Anjaha tonduy ni ise do na luar humbam?
5Mangidah-Si gobir do tonduy ni na dob matei, na i toruh ni laut bolag ampa na mangingani ai.
6Tidak do nagori toruh i lobei ni Naibata, anjaha urung habeguon seng martutup.
7Ia do na paherbangkon langit parutara i atas ni na lumei, anjaha Ia do manggantungkon tanoh i atas ni na lang.
8Ia do na manampin bah ibagas hombunni, anjaha seng marigat hombun ai ibahen.
9Ia do na manrungkub bohi ni paratas-Ni, anjaha ipaherbang i atas ni hombun-Ni.
10Ia do mamasuk parbalogan ni bah inggot, tontang parbalogan ni na siang pakon na golap.
11Rebad-rebad do tiang ni langit, anjaha songgotan halani ondam-ondam-Ni.
12Ipaminop do laut marhitei hagogohon-Ni, anjaha marhitei hapentaran-Ni ipatunduk Rahab.
13Marhitei hosah ni siang ibahen langit, anjaha tanganni mamantom ulog na lingkat.
14Tonggor ma, sisi ni dalanni tumang ope in, anjaha sada husip tumang ope na binogeita in hun Bani. Ise ma na mangasup mangarusi longgur ni hagogohonni ai?”