Alkitab Mobile SABDA
[VER] : [SIMALUNGUN]     [PL]  [PB] 
 <<  Bilangan 1 >> 

Bilangan ni Siimbang Munsuh i Israel

1Dob ai marsahap ma Jahowa hubani si Musa i halimisan Sinai, ibagas lampolampo partumpuan ai, bani ari sada bulan dua, padua-tahunkon dob luar sidea hun tanoh Masir, nini ma,

2“Suratkon ma bilangan ni ganup tumpuan ni halak Israel, marmarga-marga, mar sasaompung, domu hubani buei ni goran-goran, sagala dalahi, mar sasahalak;

3singgan na marumur dua puluh tahun pakon lobih hunjai, sagala na boi laho hu parporangan i Israel, maningon bilanganmu do sidea, ho pakon si Aron marguru hubani hulanan ni sidea.

4Anjaha maningon dong hasomanmu sahalak humbani ganup marga, ai ma gabe pambobai ni sidea na samarga.

5Anjaha on ma goran-goran ni sagala na mangkasomani hanima, Humbani Ruben, si Elisur, anak ni si Sedeur;

6humbani Simeon, si Selumiel, anak ni si Surisadai;

7humbani Juda, si Nahason, anak ni si Aminadab;

8humbani Isasar, si Natanael, anak ni si Zuar;

9humbani Zebulon, si Eliab, anak ni si Helon;

10humbani anak ni si Josep: humbani Efraim, si Elisama, anak ni si Amihud; humbani Manase, si Gamaliel, anak ni si Pedasur;

11humbani Benjamin, si Abidan, anak ni si Gideoni;

12humbani Dan, si Ahieser, anak ni si Amisadai;

13humbani Asser, si Pagiel, anak ni si Okran;

14humbani Gad, si Eliasap, anak ni si Deguel,

15humbani Naftali, si Ahira, anak ni si Enan.

16In ma halak na tardilo humbani tumpuan ai, pambobai ni marga-marga ni ompung ni sidea, kopala ni mar sasaribu halak do sidea i Israel.”

17Dob ai ipapulig si Musa pakon si Aron ma sagala dalahi na dob ginoranan ai,

18anjaha bani ari sada bulan dua, martumpu ma ganup tumpuan ai, laho manuratkon dirini mar samarga, mar sasaompung, romban hubani buei ni goran-goran, singgan ni na marumur dua puluh tahun pakon i atasni ai, mar sasahalak,

19songon tinonahkon ni Jahowa hubani si Musa. Jadi ibilangi ma sidea i halimisan dohorhon Sinai.

20Anak ni si Ruben, bunga tubuh ni si Israel, ginompar ni sidea mangihutkon partubuh ni sidea mar sasamarga, mar sasaompung, romban hubani buei ni goran-goran, mar sasahalak, sagala dalahi na marumur dua puluh tahun pakon i atasni ai, sagala na boi marporang:

21na tarbilang humbani marga Ruben ompat puluh onom ribu lima ratus halak.

22Humbani anak ni si Simeon, ginompar ni sidea, mangihutkon partubuh ni sidea, mar sasamarga, mar sasaompung, romban hubani buei ni goran-goran, mar sasahalak, sagala dalahi na marumur dua puluh tahun pakon i atasni ai, sagala na boi marporang:

23na tarbilang humbani marga Simeon, lima puluh siah ribu tolu ratus halak.

24Humbani anak ni si Gad, ginompar ni sidea mangihutkon partubuh ni sidea, mar sasamarga, mar sasaompung, romban hubani buei ni goran-goran, mar sasahalak, sagala dalahi na marumur dua puluh tahun pakon i atasni ai, sagala na boi marporang;

25na tarbilang humbani marga Gad, ompat puluh lima ribu onom ratus lima puluh halak.

26Humbani anak ni si Juda, ginompar ni sidea mangihutkon partubuh ni sidea mar sasamarga, mar sasaompung, romban hubani buei ni goran-goran, mar sasahalak sagala dalahi na marumur dua puluh tahun pakon i atasni ai, sagala na boi marporang:

27na tarbilang humbani marga Juda, pitu puluh ompat ribu onom ratus halak.

28Humbani anak ni si Isasar, ginompar ni sidea mangihutkon partubuh ni sidea, mar sasamarga, mar sasaompung, romban hubani buei ni goran-goran mar sasahalak, sagala dalahi na marumur dua puluh tahun pakon i atasni ai, sagala na boi marporang:

29na tarbilang humbani marga Isasar, lima puluh ompat ribu ompat ratus halak.

30Humbani anak ni si Zebulon, ginompar ni sidea mangihutkon partubuh ni sidea, mar sasamarga, mar sasaompung, romban hubani buei ni goran-goran, mar sasahalak, sagala dalahi na marumur dua puluh tahun pakon i atasni ai, sagala na boi marporang;

31na tarbilang humbani marga Zebulon, lima puluh pitu ribu ompat ratus halak.

32Humbani anak ni si Josep: Humbani anak ni si Efraim, ginompar ni sidea mangihutkon partubuh ni sidea, mar sasamarga, mar sasaompung, romban hubani buei ni goran-goran, mar sasahalak, sagala dalahi na marumur dua puluh tahun pakon i atasni ai, sagala na boi marporang;

33na tarbilang humbani marga Efraim ompat puluh ribu lima ratus halak.

34Humbani anak ni si Manase, ginompar ni sidea, mangihutkon partubuh ni sidea, mar sasaompung, romban hubani buei ni goran-goran, mar sasahalak, sagala dalahi na marumur dua puluh tahun pakon i atasni ai, sagala na boi marporang,

35na tarbilang humbani marga Manase, tolu puluh dua ribu dua ratus halak.

36Humbani anak ni si Benjamin, ginompar ni sidea mangihutkon partubuh ni sidea, mar sasamarga, mar sasaompung romban hubani buei ni goran-goran, mar sasahalak, sagala dalahi na marumur dua puluh tahun pakon i atasni ai, sagala na boi marporang,

37na tarbilang humbani marga Benjamin, tolu puluh lima ribu ompat ratus halak.

38Humbani anak ni si Dan, ginompar ni sidea, mangihutkon partubuh ni sidea, mar sasamarga, mar sasaompung, romban hubani buei ni goran-goran, mar sasahalak, sagala dalahi na marumur dua puluh tahun pakon i atasni ai, sagala na boi marporang,

39na tarbilang humbani marga Dan, onom puluh dua ribu pitu ratus halak.

40Humbani anak ni si Asser, ginompar ni sidea mangihutkon partubuh ni sidea, mar sasamarga, mar sasaompung, romban hubani buei ni goran-goran, mar sasahalak, sagala dalahi na marumur dua puluh tahun pakon i atasni ai, sagala na boi marporang,

41na tarbilang humbani marga Asser, ompat puluh sada ribu lima ratus halak.

42Humbani anak ni si Naftali, ginompar ni sidea, mangihutkon partubuh ni sidea, mar sasaompung, romban hubani bilangan ni goran-goran, mar sasahalak, sagala dalahi na marumur dua puluh tahun pakon i atasni ai, sagala na boi marporang,

43na tarbilang humbani marga Naftali, lima puluh tolu ribu ompat ratus halak.

44Ai ma ganup jolma na tarbilang, na binilang ni si Musa pakon si Aron, rap pakon kopala ni halak Israel na sapuluh dua halak ai, ganup sidea ihutan bani sidea na saompung.

45Ase haganup na tarbilang humbani halak Israel, mar sasaompung, singgan ni na marumur dua puluh tahun pakon i atas ni ai, sagala dalahi na boi marporang i Israel,

46sagala na tarbilang ai, onom ratus tolu ribu lima ratus lima puluh halak.

Lahoan ni Halak Levi

47Tapi anggo halak Levi, sidea na samarga, mar sasaompung, seng masuk bani bilangan ni sidea ai.

48Ai domma ihatahon Jahowa hubani si Musa,

49“Pitah marga Levi seng bulih bilanganmu, anjaha seng bulih patumpuon buei ni sidea i tongah-tongah ni halak Israel,

50tapi pabangkit ma halak Levi paturei-turei rumah panumbahan hasaksian ai ronsi ganup parugasni pakon sagala na masuk hujai; maningon sidea do na mangusung lampolampo ai ronsi ganup parugasni, anjaha sidea do na marugas ijai, anjaha marianan inggot ni lampolampo ai.

51Laho bingkat lampolampo ai, maningon halak Levi do na mandayok ai; anggo pajongjongon ma lampolampo ai, halak Levi do na pajongjong ai; anggo adong halak na legan mandohori ai, maningon marutang hosah do ia.

52Maningon mar saran halak Israel ganup bani parsarananni bei, anjaha ganup dohorhon mandera ni sidea bei.

53Tapi anggo halak Levi maningon inggot ni lampolampo hasaksian ai do sidea mar saran, ase ulang mangonai ringis hubani tumpuan ni halak Israel; ase maningon horjahonon ni halak Levi do sihorjahononni bani lampolampo hasaksian ai.”

54Jadi ibahen halak Israel ma romban hubani haganup na tinonahkon ni Jahowa hubani si Musa, sonai do ibahen sidea.


  Share Facebook  |  Share Twitter

 <<  Bilangan 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran