Dual Panel8. Pasal Galangan Bagah-bagah humbani Sada Dalahi
1Dob ai nini si Musa ma hubani kopala ni halak Israel mar sasamarga, “On do hata na tinonahkon ni Jahowa,
2ʻAnggo domma marbagah-bagah sada dalahi bani Jahowa barang marpadan marhitei bija, paboa maningon oromon ni uhurni atap aha, seng bulih ubahonni hatani, maningon romban hubani haganup hata na luar hun pamanganni bahenonni.ʼ
9. Pasal Galangan humbani Sada Anak boru Barang Parinangon
3Barang anggo marbagah-bagah sada naboru hubani Jahowa, barang marpadan, paboa maningon oromon ni uhurni barang aha, sanggah i rumah ni bapani, sanggah haposoonni,
4anjaha ibogei bapani do bagah-bagah barang padanni ai pasal sioromon ni uhurni ai, tapi ipasip bapani do ai, maningon totap do sagala bagah-bagahni, anjaha ganup padan pasal sioromon ni uhurni ai maningon totap do.
5Tapi anggo mintor iulangi bapani ai do ai, bani ari na binogeini sagala bagah-bagah ai, barang padanni ai, ai ma pasal sioromon ni uhurni ai, seng asi be bagah-bagah ai, anjaha marpangulaki do uhur ni Jahowa bani, halani na niulangan ni bapani ai do ia.
6Tapi anggo domma marparamangon ia, hape marutang bagah-bagah ia barang tarsor pamanganni marpadan pasal sioromon ni uhurni,
7anjaha ibogei paramangonni do ai namin, tapi ipasipkon do ai bani ari binogeini ai; halani ai maningon totap do padanni ai, anjaha padan pasal sioromonni ai maningon asi do.
8Tapi anggo iulangi paramangonni ai do ia bani ari na binogeini ai, gabe seng asi be bagah-bagahni ai barang padan na dob tarsor luar hun pamanganni pasal sioromon ni uhurni ai; jadi marpangulaki ma uhur ni Jahowa mangidahsi.
9(Tapi anggo bagah-bagah ni sada puang-puang na dob mabalu barang na dob binuangkon do, sagala padan na dob pinadankonni pasal sioromon ni uhurni ai, maningon asi do)
10Tapi anggo ibagas rumah ni paramangonni ia marbagah-bagah barang marpadan marhitei bija pasal sioromon ni uhurni,
11anjaha ibogei paramangonni do ai namin, tapi ipasipkon do ai lang iulangi ia, maningon asi do sagala bagah-bagahni ai anjaha sagala padan pasal sioromonni ai maningon asi do.
12Tapi anggo iparnalang paramangonni do ai bani ari na binogeini ai, jadi sagala na dob luar hun pamanganni, bagah-bagahni barang padanni pasal sioromon ni uhurni, seng asi be ai, halani na dob iparnalang paramangonni do ai anjaha marpangulaki ma uhur ni Jahowa mangidahsi.
13Sagala bagah-bagah pakon bija pasal sioromon laho paundukkon uhur, tarbahen paramangonni do patotapkon, tarbahen paramangonni do homa marnalangkon.
14Tapi anggo sip do paramangonni das bani ari na legan, jadi na patotapkon do ia ai bani haganup bagah-bagahni pakon bani ganup padanni pasal sioromonni ai, jadi asi ma ai, halani na sip ai do ia bani ari na binogeini ai.
15Tapi anggo iparnalang ai dob hundokah ai ibogei, maningon manginsonoh do ai bani.
16Ai ma aturan na tinonahkon ni Jahowa hubani si Musa pasal pardomuan ni sada dalahi hubani parinangonni, pakon pardomuan ni sada bapa hubani boruni sanggah haposoonni i rumah ni bapani.”