Alkitab Mobile SABDA
[VER] : [SIMALUNGUN]     [PL]  [PB] 
 <<  Keluaran 9 >> 

Uhum Palimahon: Bunrung ni Pinahan

1Dob ai nini Jahowa ma dompak si Musa, “Laho ma ho marayak Parao, hatahon ma hu bani, ?Sonon do hata ni Jahowa Naibata ni halak Heber: Lopas ma laho bangsang-Ku, ase isombah sidea Ahu.

2Ai anggo mangengkar ho manlopas sidea laho anjaha ijolomi ho ope sidea,

3tonggor ma, mangonai ma tangan ni Jahowa hubani pinahanmu na i sampalan, hubani huda, halode, unta, lombu pakon biribiri, hona bunrung na parah tumang.

4Tapi papuligon ni Jahowa do pinahan ni halak Israel ididah pinahan ni halak Masir, gabe seng dong matei ididah pinahan ni Israel age sada.?”

5Dob ai ibuhul Jahowa ma panorangni, nini ma, “Patar ma bahenon ni Jahowa na hinatahon-Ni ai i tanoh in.

6Jadi patarni ai, ibahen Jahowa ma sonai; marmateian ma ganup pinahan ni halak Masir, tapi ididah pinahan ni halak Israel seng dong na matei age sada.

7Isuruh Parao ma na manorih, tonggor ma, seng dong na matei age sada ididah pinahan ni Israel. Tapi lanjar hengkeng do uhur ni Parao, seng ilopas laho bangsa ai.”

Uhum na Paonomkon: Sanggul na Birong

8Dob ai nini Jahowa ma dompak si Musa pakon si Aron, “Buat hanima ma sirabun hun tataring gok tangannima, anjaha isaburhon si Musa ma ai dompak langit i lobei ni Parao.

9Gabe orbuk na alus ma ai i sab tanoh Masir, gabe sanggul na birong bani jolma pakon pinahan, gabe bayoh na mapultak bani sab tanoh Masir.”

10Jadi ibuat sidea ma sirabun hun tataring, laho ma sidea hu lobei ni Parao, isaburhon si Musa ma ai dompak langit, jadi gabe bayoh na mapultak ampa sanggul na birong ma ai bani jolma pakon pinahan.

11Lang tarbahen datu ai be jongjong i lobei ni si Musa, halani bayoh ai, ai hona bayoh do datu ai pakon ganup halak Masir.

12Tapi ipahengkeng Jahowa do uhur ni Parao, gabe seng itangihon sidea, songon na hinatahon ni Jahowa hinan hubani si Musa.

Uhum na Papituhon: Udan Sira-sira

13Dob ai nini Jahowa ma dompak si Musa, “Pagirah ma girah sogod puho laho jongjong i lobei ni Parao, hatahon ma hu bani, ?Sonon do hata ni Jahowa Naibata ni halak Heber: Lopas ma bangsang-Ku laho, ase isombah sidea Ahu.

14Anggo sahali on, parohon-Ku ma ganup uhum-Ku hubagas uhurmu, hubani juakjuak pakon hubani bangsamu, ase itanda ho, na so adong songon Ahu i sab tanoh on.

15Sonari pe boi do pagostongon-Ku tangan-Ku laho mangkonahon hubam pakon hubani bangsamu sampar ase bois ho hun tanoh on;

16tapi halani on do ase Hupajongjong ho, ase Hupataridahkon hubam gogoh-Ku, anjaha ase tarambilan goran-Ku hu sab tanoh on.

17Sai inunut ho ope mangimbang bangsang-Kin, seng ilopas ho sidea laho.

18Tonggor ma, sonon patar parohon-Ku ma udan sira-sira na doras tumang, songon na seng ongga masa i tanoh Masir, olat ni ari parjonamni ronsi nuan.

19On pe suruh ma na patumpuhon pinahanmu, haganup na dong bam i sampalan halani haganup jolma pakon pinahan na jumpah i sampalan, na so ipatumpu hu rumah, buaton ni udan sira-sira ma ai, gabe matei.

20Barang ise ididah juakjuak ni Parao na mangkabiari hata ni Jahowa, isuruh ma lintun jabolonni pakon pinahanni hu rumah.

21Tapi barang ise na so mardiateihon hata ni Jahowa, ipaturut ma jabolonni pakon pinahanni i sampalan.?”

22Dob ai nini Jahowa ma dompak si Musa, “Pagostong ma tanganmu dompak langit, ase roh udan sira-sira hu sab tanoh Masir, hubani jolma, pinahan pakon hubani ganup suan-suanan i tanoh Masir.”

23Jadi ipagostong si Musa ma tungkotni dompak langit, gabe iparoh Jahowa ma longgur pakon udan sira-sira, anjaha roh ma homa apuy hu tanoh on. Dob ai iparoh Jahowa ma udan sira-sira hu tanoh Masir,

24masa ma udan sira-sira, anjaha apuy pe gara do i tongah-tongah ni udan sira-sira ai, jangin tumang, seng ongga ope sonai masa i sab tanoh Masir, olat ni na dob sada bangsa Masir.

25Ibasbas udan sira-sira ai ma haganup na i talun i sab tanoh Masir, jolma pakon pinahan; sonai homa ibasbas udan sira-sira ai do sagala suan-suanan na i juma, anjaha sagala hayu na i harangan mangkarumbak do.

26Pitah i tanoh Gosen, na niianan ni halak Israel, seng masa udan sira-sira.

27Dob ai isuruh Parao ma na mandilo si Musa pakon si Aron, nini ma dompak sidea, “Domma mardousa ahu sahali on; na pintor do Jahowa, tapi anggo ahu pakon bangsangku parpipot do.

28Martonggo ma hanima hubani Jahowa, maparahtu do longgur ni Jahowa pakon udan sira-sira in. Hulopas pe hanima laho, ulang tading ijon be hanima.”

29Nini si Musa ma dompaksi, “Mandaratkonsi ahu hun huta in, paherbangonku ma tanganku dompak Jahowa; maronti ma sora ni longgur anjaha udan sira-sira in pe seng roh be, ase itanda ham gok bani Jahowa do tanoh on.

30Tapi anggo ham pakon juakjuakmu hubotoh hinan do na so mabiar nasiam mangidah Naibata Jahowa.

31Ia kapas pakon omei ripas do, ai runsang ope omei, anjaha marbunga kapas.

32Tapi seng ripas anggo gandum pakon dali, halani pudian do ai.”

33Dob ai luar ma si Musa hun lobei ni Parao hu darat ni huta ai, ipaherbang ma tanganni dompak Jahowa; gabe maronti ma sora ni longgur pakon udan sira-sira ai, anjaha udan pe seng roh be use hu tanoh ai.

34Tapi dob ididah Parao, na dob maronti udan, sira-sira pakon longgur ai, inunuti ma mardousa, ipahengkeng ma uhurni, sonai homa juakjuakni.

35Lanjar hengkeng do uhur ni Parao, seng ilopas laho halak Israel songon na hinatahon ni Jahowa hinan marhitei si Musa.


  Share Facebook  |  Share Twitter

 <<  Keluaran 9 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran