Alkitab Mobile SABDA
[VER] : [SIMALUNGUN]     [PL]  [PB] 
 <<  Kisah Para Rasul 10 >> 

Hamubahon ni Uhur ni si Kornelius

1Tapi adong ma i Kesarea sada halak, na margoran si Kornelius, kopala tentara bani pasukan Italia.

2Na daulat do ia anjaha na marhabiaran bani Naibata rap pakon ganup rumah tanggani. Buei do ia marsibere-bere bani bangsa in, anjaha tongtong do ia martonggo bani Naibata.

3Bani na sadari, hira-hira pukul tolu arian, ididah ma torang bani panonggoranni sada malekat ni Naibata, roh marayaksi anjaha marsahap hu bani, “Ale Kornelius!”

4Ikawahkon ma ia anjaha ihatahon ibagas biar, “Ai aha in Tuhan?” Gabe nini ma, “Ia tonggomu ampa idop ni uhurmu domma das ai hu lobei ni Naibata, anjaha idingat do ai.”

5Ai pe suruh ma halak hu Joppe mangalopi si Simon, na margoran homa si Petrus,

6na tondok bani si Simon, tukang sipatu ai, na marrumah i topi laut.

7Ase laho honsi malekat na marsahap pakonsi ai, idilo ma juakjuakni dua halak ampa sada tentara na daulat maruhur, na mangkasomanisi tongtong.

8Ipatugah ma haganup ai bani sidea, dob ai isuruh ma sidea hu Joppe.

Pangajari ni Naibata bani si Petrus Marhitei Panonggoran

9Patarni ai, sanggah i tongah dalan ope sidea marayak huta ai, naik do si Petrus hu kamar pardatas laho martonggo, ai ma hira-hira tongah arian.

10Gabe loheian ma ia, sihol mangan ma ia. Jadi sanggah na pasirsirhon ai sidea bani, marpanonggoran ma ia.

11Ididah ma buha langit, anjaha turun ma songon hiou bolag, martali bani suhi-suhini na ompat ai, itantan hu toruh.

12Ibagas ai adong do bagei ni siompat nahei ampa na manjulur i atas tanoh on ampa manuk-manuk na i awang-awang.

13Dob ai adong ma sada sora na marsahap hu bani, “Ale Petrus, jongjong ma, sayati anjaha pangan ma!”

14Jadi nini si Petrus ma, “Pantang Tuhan! Seng ongga hupangan na butak atap na so borsih.”

15Dob ai roh ma use sada sora paduahalihon, mangkatahon hu bani, “Na dob pinapansing ni Naibata ulang hatahon butak!”

16Tolu hali do masa sonai, dob ai mintor tarangkat ma hiou ai hu langit.

17Sanggah sungkun-sungkun ope si Petrus pasal arti ni panonggoran, na nididahni ai, domma jongjong i lobei ni labah ai suruhan ni si Kornelius, na mangindahi rumah ni si Simon ai.

18Idilohon sidea ma manungkun, atap ijai do tondok si Simon, na margoran si Petrus.

19Anjaha sanggah na marpingkir ai ope si Petrus pasal na nididahni ai, nini Tonduy in ma hu bani, “Adong do dua halak, na mangindahi ho!

20Jongjong ma ho, susur ma; laho ma ho rap pakon sidea, ulang sangsi uhurmu, ai Ahu do na marsuruh sidea!”

Ambilan ni si Petrus; Parsogop ni Tonduy Na Pansing bani Parbegu

21Jadi susur ma si Petrus manjumpahkon halak ai, nini ma, “Ahu do na pinindahan nasiam ai! Aha do halani ase roh nasiam?”

22Dob ai nini sidea ma, “Ia si Kornelius, sada kopala ni tentara, sada halak na pintor uhur anjaha sihabiari Naibata, na dear baritani bani haganup halak Jahudi, dapotan parentah do ia humbani sada malekat na mapansing, ase ialopi ham hu rumahni, laho manangihon hata hun bamu.”

23Jadi iarahkon ma sidea hu rumah, anjaha itamuei ma. Patarni ai bingkat ma ia rap pakon sidea, anjaha dihut do deba hasoman na hun Joppe mangkasomanisi.

24Patarni ai das ma sidea i Kesarea. Domma paima-imahon si Kornelius, anjaha domma ipatumpu diha-diha ampa huan-huanni.

25Sanggah na masuk ai si Petrus, ialo-alo si Kornelius ma ia, manrogop ma ia marsombah hu bani.

26Tapi itogu si Petrus ma ia, nini ma, “Jongjong ma ham, ahu pe jolma do.”

27Anjaha turut marsahapi masuk ma sidea, anjaha domma buei halak tumpu dapotsi ijai.

28Dob ai nini ma hubani sidea, “Ibotoh nasiam do, pantang do bani halak Jahudi marayak atap marsaor bani bangsa na legan. Tapi domma ipatuduhkon Naibata bangku, na so bulih goranon halak butak atap lang borsih.

29Halani ai do, ase lang manjua ahu roh, sanggah na ialopi ahu. Husungkun ma sonari, aha do halani, ase isuruh nasiam na mangalopi ahu?”

30Dob ai nini si Kornelius ma, “Ompat ari na salpu, sangkan sanggah sonari, ai ma pukul tolu, martonggo do ahu i rumah on, jadi jongjong ma i lobeihu sada halak parhiou na marsinalsal.

31Nini hu bangku, ?Ale Kornelius, itangihon Naibata do tonggomu anjaha idingat do sibere-beremu.

32Ai pe suruh ma hu huta Joppe na mandilo si Simon, na margoran si Petrus, tondok i rumah ni si Simon, tukang sipatu ai, i topi laut.?

33Jadi mintor husuruh ma na mangalopi ham, dear do pambahenanmu in, ai mintor roh do ham. Ai pe, domma tumpu hanami haganup ijon i lobei ni Naibata, sihol manangihon haganup na tinonahkon ni Tuhan in bamu.”

34Dob ai marsahap ma si Petrus, nini ma, “Domma tangkas ididah uhurhu, na so sididah bohi Naibata.

35Hun bani sagala bangsa tene, ijalo do sagala na mangkabiarisi anjaha na mangkorjahon hapintoron.

36Itongos do hata-Ni hubani anak ni Israel, anjaha iambilankon do damei marhitei Jesus Kristus; Ia do Tuhan ni haganup.

37Ibotoh nasiam do haganup na masa i sab tanoh Jahudi, mamungkah i nagori Galilea, dob salpu pandidion na binaritahon ni si Johannes,

38ai ma pasal Jesus, na hun Nasaret, na mininakan ni Naibata marhitei Tonduy Na Pansing ampa hagogohon. Mardalani do Ia mambahen na madear ampa pamalumkon haganup na siniaran ni setan, ai ihasomani Naibata do Ia.

39Hanami do saksi pasal haganup na binahen-Ni i tanoh Jahudi age i Jerusalem. Ibunuh sidea do Ia, igantungkon bani hayu.

40Ipapuho Naibata do Ia bani ari patoluhon, anjaha ipatalar do diri-Ni,

41Seng hubani haganup, tapi pitah hubani saksi-saksi do, na dob ipilih Naibata hinan, ai ma hanami, na rap mangan ampa minum pakon-Si dob puho Ia humbani na matei.

42Iparentahkon do bannami, mangambilankon anjaha manaksihon bani halak na mabuei, paboa Ia do in, na dob tinotapkon ni Naibata hinan, gabe panguhum bani na manggoluh ampa na matei.

43Haganup do nabi manaksihon pasal-Si, paboa jaloon ni sagala na porsaya Bani do hasasapan ni dousa marhitei goran-Ni.”

44Jadi sanggah ihatahon si Petrus hata ai, sogop ma Tonduy Na Pansing bani haganup na manangar hata ai.

45Haganup halak na porsaya ai, ai ma halak Jahudi, na roh mangkasomani si Petrus, longang do halani iuseihon do homa sibere-bere ni Tonduy Na Pansing bani halak parbegu.

46Ai ibogei do sidea marsahap bani hata na legan mamuji Naibata.

47Jadi nini si Petrus ma, “Ai pag ma diri mamandang didion halak on, na dob manjalo Tonduy Na Pansing songon hita?”

48Gabe ihatahon ma didion sidea marhitei goran ni Tuhan Jesus Kristus. Dob ai ielek-elek sidea ma ia, ase marianan lobei ia i tongah-tongah ni sidea piga-piga dokah.


  Share Facebook  |  Share Twitter

 <<  Kisah Para Rasul 10 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran