Dual PanelBalos ni si Stepanus
1Jadi nini sintua ni malim ai ma, “Atene, tongon do sonai?”
2Jadi nini si Stepanus ma, “Nasiam sanina ampa bapa-bapa, tangar nasiam ma lobei! Ipataridahkon Naibata na sangap in do diri-Ni hubani ompungta si Abraham, sanggah i Mesopotamia ia, sanggah lape ope ia marianan i Haran.
3Ihatahon do hu bani, ʻBungkas ma ho hun tanohmin ampa humbani sindohormu, laho ma ho hu tanoh sipatuduhonon-Ku bam!ʼ
4Jadi bungkas ma ia hun tanoh Kaldea, marianan ma ia i Haran. Dob matei bapani, isuruh Naibata ma ia pindah hunjai hu tanoh na niiankon nasiam on sonari.
5Seng ibere ope bani parbagianan ijai, sanjongkal pe lang, tapi iparbagah do, berehononni tanoh in bani, ase ia simada in ampa ginomparni, age pe seng dong anakni.
6Ai sonon do nini Naibata, ʻGabe panginsolat do ginomparmu i tanoh na legan; parjabolonon anjaha arsik-arsikon ni halak do sidea ompat ratus tahun dokahni.
7Dob ai uhumon-Ku do bangsa na binalosan ni sidea ai, nini Naibata,ʼ salpu ai bungkas ma sidea hunjai, anjaha sombahon ni sidea ma Ahu bani ianan on.
8Lanjar ibere ma bani sidea padan parsunaton. Dob sonai, tubuh ma bani si Abraham si Isak, bani si Isak tubuh si Jakob, anjaha bani si Jakob ompungta na sapuluh dua ai.
9Halani subil ni ompungta ai bani si Josep, ijual sidea do ia hu tanoh Masir. Tapi ihasomani Naibata do ia,
10ipaluah do ia humbani haganup hasunsahanni, anjaha ibere bani idop ni uhur ampa hauhuron i lobei ni Parao, raja ni Masir, gabe ipabangkit ma ia gabe panrajai ni tanoh Masir ampa haganup rumahni.
11Jadi masa ma lohei i sab tanoh Masir ampa tanoh Kanaan, na mangkorhon hasunsahan banggal, seng jumpahan sipanganon be ompungta.
12Anjaha dob ibogei si Jakob adong gandum i tanoh Masir, gabe isuruh ma hujai ompungta, ai ma na parlobei sahali.
13Bani na paduahalihon ipatandahon si Josep ma dirini bani saninani ai, gabe torang ma bani Parao pasal partuturan ni si Josep.
14Jadi isuruh si Josep ma na mangalop si Jakob ampa haganup na sapanganan bani, pitu puluh lima bueini.
15Ase tuad ma si Jakob hu tanoh Masir, dob ai matei ma ia rap pakon ompungta ai.
16Iboan sidea do ia hu Sikem, anjaha inahkon hu tanoman, na binoli ni si Abraham marhitei duit pirak humbani ginompar ni si Hemor i Sikem.
17Jadi dob lambin dohor panorang na pinarbagah ni Naibata, ai ma na binulawankon-Ni hinan bani si Abraham, lambin tambah anjaha manggargar ma bangsanta i tanoh Masir,
18paima bangkit sada raja na legan, na so manandai si Josep.
19Akal do ibahen mangagou bangsanta, gabe tarpaksa do ompungta mangambukkon dakdanak ni sidea na baru tubuh, ase ulang torus manggoluh.
20Bani panorang ai tubuh ma si Musa, anjaha marosuh do Naibata mangidahsi. Tolu bulan do ia iparmudu-mudu i rumah ni bapani,
21dob ai itaruhkon ma hu darat, tapi ibuat boru ni Parao ma ia, anjaha ipagodang-godang ma songon anakni sandiri.
22Iajarhon do hubani sagala hapentaran ni halak Masir, gabe margogoh ma ia bani hata ampa pambahenan.
23Dob marumur ia ompat puluh tahun, tubuh ma uhurni manonggor saninani, halak Israel.
24Anjaha sanggah ididah sada halak hona arsik, iurupi ma na hona arsik ai, iluluhon ma ia marhitei na mambunuh halak Masir ai.
25Iagan, dapot uhur ni saninani ai ma, paboa urupan ni Naibata ma sidea marhitei tanganni, tapi seng dapot uhur ni sidea ai.
26Patar ni ai, roh use ma ia, tudu sanggah maringori sidea, anjaha iojur ma sidea ase mardamei, nini ma, ʻNa marsanina do nasiam, mase maringori nasiam samah nasiam?ʼ
27Tapi itulak na marsalah ai do ia, nini, ʻIse pabangkit ho gabe panrajai ampa panguhum bannami?
28Ai sihol bunuhonmu do ahu, songon na binunuhmu halak Masir nantuari?ʼ
29Manangar hata ai lintun ma si Musa, laho manginsolat i tanoh Midian, anjaha tubuh ma dua anak bani ijai.
30Jadi dob salpu ompat puluh tahun, taridah ma sada malekat bani i halimisan ni Dolog Sinai, ibagas jilam ni apuy bani naporon.
31Longang do si Musa mangidah na nididahni ai, anjaha dob idohori laho papangkeihon, tarbogei ma sora ni Tuhan in,
32ʻAhu do Naibata ni ompungmu, ai ma Naibata ni si Abraham, si Isak pakon si Jakob.ʼ Jadi hitir-hitir ma si Musa, seng pag be ia papangkeihon.
33Tapi nini Tuhan in ma hu bani, ʻTanggali ma sipatumin humbani naheimu, ai tanoh na susi do ianan hajongjonganmin.
34Domma tangkas Huidah hamarsikon na tinaron ni bangsang-Ku i tanoh Masir, domma Hutangar hoih-hoih ni sidea; anjaha turun do Ahu laho paluahkon sidea. Ai pe roh ma ho, sihol suruhon-Ku do ho hu tanoh Masir.ʼ
35Si Musa, na tinulak ni sidea ai, marhitei na mangkatahon, ʻIse pabangkit ho gabe panrajai ampa panguhum?ʼ Ia do isuruh Naibata, gabe panrajai ampa sipaluah marhitei malekat na nididahni ai bani naporon ai.
36Iarahkon do sidea bungkas, marhitei halongangan ampa tanda na binahenni ai i Tanoh Masir, i Laut Sigerger ampa halimisan ompat puluh tahun dokahni.
37Si Musa, ai ma na mangkatahon bani halak Israel, ʻPajongjongon ni Naibata do sada nabi bani nasiam, hun tongah-tongah nasiam songon ahu on.ʼ
38Ia do ai, bani kuria na i halimisan ai rap pakon ompungta ampa malekat ai, na marsahap pakonsi i Dolog Sinai. Ia do na manjalo hata na manggoluh sipadasonni hu banta.
39Tapi seng itangihon ompungta ia, itulak sidea do ia, anjaha mulak do uhur ni sidea hu Tanoh Masir.
40Ihatahon sidea do bani si Aron, ʻBahen ma bannami Naibata, na mambobai hanami, ai seng ibotoh hanami, atap aha do na masa bani si Musa, na dob mangarahkon hanami luar hun tanoh Masir.ʼ
41Jadi igana sidea ma ijia sada anak ni lombu, iboan sidea ma galangan bani gana-gana ai, anjaha marmalas ni uhur ma sidea halani bahen-bahenan ni tangan ni sidea ai.
42Tapi itundali Naibata ma sidea, ipaturut ma sidea marsombah bani na pinarnaibata ni sidea i langit ai, songon na tarsurat ibagas buku ni nabi-nabi, ʻAi adong do isombahkon nasiam Bangku galangan sisayaton ampa sibere-bere ibagas siompat puluh tahun na i halimisan ai, ale bangsa Israel?
43Ipausung-usung nasiam do rumah ni Molok ampa bintang ni naibata Rephan ampa gana-gana na binahen nasiam gabe sisombahon nasiam. Hu dipar ni Babel ope buangkonon-Ku nasiam.ʼ
44Adong do bani ompungta lampolampo hasaksian, usih songon na dob niaturhon ni Naibata hubani si Musa marhitei hata-Ni, ai ma, ase ibahen ai domu hubani usihan, na dob nididahni ai.
45Ai ma na ijalo ompungta, lanjar iboan rap pakon si Josua laho patundukkon bangsa-bangsa, na niusir ni Naibata i lobei ni ompungta ai, das hubani panorang ni si Daud.
46Jumpahan idop ni uhur do ia i lobei ni Naibata, gabe ipindo ma, ase ipalopas ia laho pasirsirhon ianan bani Naibata ni si Jakob.
47Tapi si Salomo do saud pajongjong rumah Bani.
48Tapi lang marianan Sitimbulan in ibagas rumah na pinauli ni tangan, songon na hinatahon ni nabi ai,
49ʻLangit do paratas Bangku, anjaha tanoh onjolan bani nahei-Hu. Rumah aha ma in, na sihol paulionmu Bangku,ʼ nini Tuhan in, ʻatap ianan aha ma na boi gabe parsaranan Bangku?
50Ai lang tangan-Ku do paulihon in ganup?ʼ
51E nasiam sihengkeng uhur, na so marsunat uhur ampa pinggolni, ilawan nasiam do tongtong Tonduy Na Pansing in; usih do nasiam songon ompung nasiam ai.
52Ise ma humbani nabi ai, na so pinarburu ni ompung nasiam? Ibunuh sidea do na manjaha pasal parroh ni Parpintor in, ai ma na dob tinahihon ampa na binunuh nasiam,
53nasiam sijalo titah in, na pinadas marhitei malekat, hape seng idalankon nasiam.”
Parmatei ni si Stepanus
54Mambogei ai marah tumang ma uhur ni sidea, harat-harat ipon ma sidea hu bani.
55Gok Tonduy Na Pansing ma si Stepanus; mangkawah ma ia dompak langit, gabe ididah ma hasangapon ni Naibata ampa Tuhan Jesus jongjong i siamun-Ni.
56Jadi nini ma, “Tonggor ma, huidah do mungkab langit, anjaha Anak ni Jolma in jongjong hampit siamun ni Naibata!”
57Jadi marsurak-surak ma sidea anjaha marsitutup pinggolni bei; lanjar rap ma sidea mandorabsi.
58Isarad sidea ma ia hu darat ni huta ai, anjaha ipargijig bani batu. Ia saksi-saksi ai, itibalhon bei do pakeianni i lobei ni sada garama, na margoran si Saulus.
59Sanggah na ipargijig sidea ai si Stepanus bani batu, dilo-dilo do ia, nini, “Ham Tuhan Jesus, jalo Ham ma tonduyhu!”
60Manrogop ma ia anjaha ipagomos ma sorani mangkatahon, “Ham Tuhan, ulang ma hira Ham dousa ni sidea in!” Jadi dob ihatahon sonai, matei ma ia.