Dual PanelHamubahon ni Uhur ni si Saulus
1Ia si Saulus sai tong ope iondamkon ondam-ondam ampa pamunuhon dompak susian ni Tuhan in. Laho ma ia hubani sintua ni malim,
2ipindo ma humbani surat, siboanonni hu Damaskus bani parguruan na ijai ai, ase anggo adong jumpahsi siirikkon ugama ai, dalahi atap naboru pe, boi sangkutonni anjaha boanonni ai hu Jerusalem.
3Tapi sanggah i tongah dalan ia, mandohori huta Damaskus, sompong ma marsinalsal sondang hun langit, inggot hu bani,
4gabe tompas ma ia hu tanoh, anjaha ibogei ma sada sora, na marsahap hu bani, “Saul, Saul, mase pardakdakonmu Ahu?”
5Jadi nini ma, “Ise do Ham Tuhan?” Roh balos, “Jesus do Ahu, na pinardakdakmin.
6Tapi jongjong ma ho, masuki ma huta in, ijai pe patugahon bam sibahenonmu!”
7Ia hasomanni na saodoran ai, jonong do hansa, ai ibogei sidea do sora ai, tapi ise pe lang ididah.
8Jadi jongjong ma si Saulus hun tanoh ai; age pe bodak matani, aha pe lang ididah. Gabe itogu sidea mando ia, laho mambobansi hu Damaskus.
9Tolu ari dokahni seng marpangidah ia, anjaha seng mangan atap minum pe.
10Jadi adong ma sada susian i Damaskus, na margoran si Ananias. Ihatahon Tuhan in ma hu bani ibagas sada panonggoran, “Ale Ananias!” Balosni, “Ijon do ahu, Tuhan!”
11Jadi ihatahon Tuhan in ma hu bani, “Jongjong ma, laho ma ho hu dalan na margoran Dalan Sipintor, anjaha sungkun ma ijai, i rumah ni si Judas pasal sada halak na margoran si Saulus, na hun Tarsus. Jumpah ho do ia martonggo,
12anjaha domma ididah masuk sada halak, na margoran si Ananias, manampeihon tanganni bani, ase mulak marpangidah ia.”
13Tapi nini si Ananias ma mambalosi, “Tuhan, hubogei do humbani buei halak pasal buei ni na jahat, ibahen hubani halak na mapansing i Jerusalem.
14Ijon pe markuasa do ia humbani sintua ni malim, manangkuti haganup na mandilo goran-Mu.”
15Jadi nini Tuhan in ma hu bani, “Laho ma ho, ai ia do parugas pilihon-Ku laho mamboan goran-Ku hu lobei ni bangsa-bangsa, raja-raja ampa anak ni Israel.
16Ahu sihol patuduhkon hubani pasal buei ni sitaronon sidageionni halani goran-Ku.”
17Jadi laho ma si Ananias, imasuki ma rumah ai. Itampeihon ma tanganni hu bani, anjaha nini ma, “Ale Saul, saninangku, isuruh Tuhan in do ahu, ai ma Jesus, na nididahmu bani pardalananmu hujon, ase suang marpangidah ho, anjaha gok Tonduy Na Pansing ho.”
18Jadi mintor mangkatektek ma humbani matani songon sisik, gabe mulak ma ia marpangidah; dob ai jongjong ma ia lanjar tardidi.
19Anjaha mangan ma ia, gabe suang ma gogohni. Soh ope ia piga-piga dokah ijai rap pakon susian na i Damaskus ai.
Parambilanon ni si Saulus i Damaskus
20Anjaha mintor marambilan do ia ibagas parguruan-parguruan ai, isaksihon do Jesus, paboa Anak ni Naibata do Ia.
21Longang do haganup halak na mambogeisi, nini sidea do, “Ai lang ia do in, na mardakdak i Jerusalem haganup halak na mandilo Goran in? Na nilangkahkonni pe hujon, ai lang laho manangkuti anjaha mamboan sidea do hu sintua ni malim?”
22Tapi lambin margomos do si Saulus, gabe jut ma ibaen uhur ni Jahudi, na i Damaskus, marhitei hatorangan-hatorangan, paboa Jesus do Kristus in.
23Jadi, dob hun dokah, manriah ma halak Jahudi, laho mamunuhsi.
24Tapi tarbogei do hubani si Saulus tahi-tahi ni sidea ai. Gabe ijagai sidea ma sagala horbangan arian pakon borngin, ase boi bunuhon ni sidea ia.
25Tapi iarahkon susian ai ma ia borngin-borngin, anjaha itantan sidea ma ia ibagas karanjang hu darat ni tembok ai.
26Ase dob das ia i Jerusalem, isuba ma pasaorhon dirini bani susian ai, tapi haganup do sidea mabiar mangidahsi, ai seng porsaya sidea, na dob gabe susian ia.
27Tapi ijalo si Barnabas ma ia, anjaha iarahkon ma hubani apostel ai; ibaritahon ma bani sidea sonaha pangidahni bani Tuhan in, na marsahapkonsi, anjaha sonaha torang ni parambilanonni i Damaskus ibagas goran ni Jesus.
28Dob ai sai rap ma ia pakon sidea mardalani i huta Jerusalem, marhinsah ni uhur marambilan ibagas goran ni Tuhan in.
29Marsahap anjaha marsual do ia pakon halak Jahudi parhata Gorik; tapi martahi-tahi do sidea, sihol mambunuhsi.
30Dob tarbotoh ai bani sanina-sanina ai, itaruhkon sidea ma ia tuad hu Kesarea, lanjar isuruh ma laho hu Tarsus.
31Ase mardamei-damei ma kuria ai i sab Judea, Galilea ampa Samaria, anjaha lambin toguhni marparlahou ibagas biar bani Tuhan in, anjaha lambin roh bueini do sidea halani pangojur ni Tonduy Na Pansing.
Ipamalum si Petrus Sada Halak na Oyangon i Lidda
32Sanggah na mardalani ai si Petrus i tongah-tongah ni haganup sidea, laho do ia homa marayak halak na mapansing na i Lidda.
33Jadi jumpahsi ma ijai sada halak, na margoran si Eneas, na oyangon anjaha na tibal-tibal bani podomanni ualuh tahun dokahni.
34Jadi nini si Petrus ma hu bani, “Ale Eneas, ipamalum Jesus Kristus ma ho! Jongjong ma ho, anjaha patorsa ma podomanmu!” Jadi mintor jongjong ma ia.
35Anjaha haganup do pangisi ni Lidda ampa Tanoh Saron mangidahsi, gabe idompakkon sidea ma Tuhan in.
Ipagoluh si Petrus si Tabita i Joppe
36Ia i Joppe, adong do sada halak susian naboru, na margoran si Tabita, artini Balua, na surung mangkorjahon na madear ampa mambahen idop ni uhur.
37Boritan do ia bani panorang ai lanjar matei. Dob iparidi ia, inahkon ma bani kamar pardatas.
38Dohor do huta Lidda hun Joppe; jadi dob ibogei susian ai, na i Lidda do si Petrus, gabe isuruh sidea ma dua halak laho marayaksi, mangindohon bani, ase sapodas-podasni ia roh marayak sidea.
39Jadi mintor bingkat do si Petrus, mangkasomani sidea, anjaha dob das iboan ma ia hu kamar pardatas ai. Jadi marrohan ma hubani sagala na mabalu, tangis-tangis, anjaha ipatuduhkon sidea ma bani baju-baju ampa mantel, na pinauli ni si Tabita, sanggah rap ope ia pakon sidea.
40Jadi isuruh si Petrus ma sidea hu darat, anjaha manrogop ma ia laho martonggo. Idompakkon ma bangkei ai, lanjar nini ma, “Ale Tabita, jongjong ma!” Gabe ipabodak ma matani, anjaha dob ididah si Petrus, hundul ma ia.
41Isurdukkon si Petrus ma tanganni laho pajongjongkonsi. Dob ai idilo ma halak na mapansing ai ampa na mabalu ai, gabe iarahkon ma naboru ai manggoluh hu lobei ni sidea.
42Jadi sar ma barita ai i sab Joppe, gabe buei ma na porsaya bani Tuhan in.
43Hun dokah do ia marianan i Joppe, tondok bani sada halak, na margoran si Simon, tukang sipatu ai.