Alkitab Mobile SABDA
[VER] : [SIMALUNGUN]     [PL]  [PB] 
 <<  Matius 16 >> 

Ipatugah Jesus Use Tanda na Masa bani si Jona

1Dob ai roh ma Parisei pakon Sadukei manlajou-Si, ipindo sidea do tanda hun langit sipatidakon-Ni bani sidea.

2Jadi nini ma dompak sidea, “Anggo bod ma ari, nini nasiam do, logou ma ari, ai gerger do langit.

3Anjaha sogod-sogod, laho roh do haba-haba sadari on, ai gerger do langit anjaha bonog. Ibotoh nasiam do manimbangi rupa ni langit, tapi tanda-tanda, na masa bani panorang on, seng ibotoh nasiam.

4Bangsa parjahat anjaha parbangkis mangindo tanda; tapi seng sibereon tanda bani sidea, sobali tanda ni si Jona.” Jadi misir ma Ia, itadingkon ma sidea.

Lumba-Lumba Pasal Ragi ni Parisei

5Jadi das ma susian-Ni hu dipar, lupa do hape sidea mamboan ruti.

6Ihatahon Jesus ma hubani sidea, “Pangkei anjaha jaga ma hanima dompak ragi ni Parisei pakon Sadukei.”

7Jadi isahapkon sidea ma ai samah sidea, nini ma, “Halani na so mamboan ruti ai do hita ai!”

8Tapi ibotoh Jesus do ai, gabe nini ma, “E hanima siotik haporsayaon! Mase ma isahap-sahapkon hanima na so mamboan ruti ai hanima?

9Seng ope iarusi uhurnima? Seng idingat hanima be na lima ruti bani na lima ribu halak ondi, anjaha piga bantei buei ni na teba ipatumpu hanima?

10Barang na pitu ruti bani na ompat ribu halak ondi, anjaha piga bantei buei ni na teba ipatumpu hanima?

11Sonaha, ai lang iarusi hanima, na so pasal ruti hatang-Kai bennima? Jaga ma hanima pasal ragi ni halak Parisei ampa Sadukei!”

12Jadi dapot uhur ni sidea ma, paboa sedo hape ragi ni Parisei pakon Sadukei na hinatahon-Ni ai sijagaon, tapi podah ni sidea do.

Hasaksian ni si Petrus: Kristus do Jesus

13Jadi dob das Jesus hu Nagori Kesarea Pilippi, isungkun ma susian-Ni, “Ai ise do Anak ni Jolma in, nini halak?”

14Jadi nini sidea ma, “Deba mangkatahon si Johannes Pandidi, na deba si Elias, na legan use si Jeremias barang sahalak humbani nabi-nabi ai.”

15Nini ma hubani sidea, “Ia hanima, ise do Ahu, nini hanima?”

16Jadi nini si Simon Petrus ma mambalosi, “Ham do Kristus, Anak ni Naibata na manggoluh in!”

17Dob ai nini Jesus ma mambalosi, “Martuah do ho, Simon, anak ni si Jona, ai sedo daging pakon daroh patalarhon in bam, tapi Bapang-Ku na i nagori atas ai do.”

18Ahu pe Huhatahon ma bam, “Si Petrus (batu gingging) do ho, anjaha i atas ni batu gingging ai do pajongjongon-Ku kuriang-Ku, anjaha horbangan ni nagori toruh pe seng boi taluhononni ai.

19Hubere pe bam anakkunsi ni Harajaon nagori atas in, anjaha aha na sinangkutmu i dunia on, tarsangkut ma age ai i nagori atas, anjaha aha na tinanggalanmu i tanoh on, tanggal ma ai i nagori atas.”

20Dob ai ipandang do susian-Ni ai, ase ulang ipatugah-tugah sidea bani halak, paboa Ia do Kristus.

Ilumbahon Pasal Sitaronon-Ni

21Hunjia nari ma ipungkah Jesus patugahkon hubani susian-Ni, na maningon laho do Ia hu Jerusalem, anjaha na maningon buei do Ia manaron humbani pangintuai-pangintuai, sintua ni malim ampa sibotoh surat, pala maningon bunuhon do Ia, tapi papuhoon do bani ari patoluhon.

22Jadi iarahkon si Petrus ma Ia, ihata ma Ia, nini ma, “Idop ma uhur ni Naibata Bamu, Tuhan! Ulang ma masa ai Bamu!”

23Tapi marhusor ma Jesus, nini ma dompak si Petrus, “Laho ma ho ne, bolis! Ai partolsuan do ho Bangku, ai seng na porlu bani Naibata iuhurhon ho, tapi na porlu bani jolma do.”

Pasal na Mangirikkon Jesus

24Jadi nini Jesus ma dompak susian-Ni, “Barang ise na sihol mangirikkon Ahu, iparnalang ma dirini, iporsan ma silangni, anjaha iirikkon ma Ahu!

25Ai barang ise na sihol manramotkon hosahni, na mangagouhon do ai, tapi barang ise na agouan hosah halani Ahu, ai do na jumpahan.

26Ai aha ma gunani bani jolma, age ganup dunia on bani, anggo magou do tonduyni? Aha ma tarbere jolma bahen tobus ni tonduyni?

27Ai na roh do magira Anak ni Jolma in ibagas hasangapon ni Bapa-Ni rap pakon malekat-Ni, jadi balaskonon-Ni ma bani haganup domu hubani horjani.

28Na sintong do na Huhatahon on bennima, adong do deba humbani na jongjong ijon, na so mandai hamatean, anggo seng ope ididah sidea roh Anak ni Jolma in ibagas harajaon-Ni.”


  Share Facebook  |  Share Twitter

 <<  Matius 16 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel