Alkitab Mobile SABDA
[VER] : [SIMALUNGUN]     [PL]  [PB] 
 <<  Matius 26 >> 

1Ase dob marujung ihatahon Jesus haganup hata ondi, nini ma dompak susian-Ni,

2“Ibotoh hanima do, haduan ma pesta Paskah, ijai ma ondoskononkon Anak ni Jolma in, ase iparsilangkon.”

Manriah Sintua ni Malim ampa Pangintuai Sihol Mamunuh Jesus

3Martumpu ma ijia sintua ni malim ampa pangintuai ni bangsa ai hu rumah ni Sintua ni Malim Kayapas,

4manriah ma sidea atap akal ja do bahenon, laho manangkap Jesus ampa mamunuh-Si.

5Jadi ihatahon sidea ma, “Ulang ma bani pesta ai, ase ulang geor halak na mabuei in.”

Pamminakion bani Jesus i Betania

6Sanggah i huta Betania Jesus, i rumah ni si Simon, na gadamon ai,

7roh ma hu Bani sada naboru mamboan botol, na marisi minak na maharga tumang, lanjar iuseihon ma ai bani ulu-Ni, sanggah mangan Ia.

8Mangidah ai susian ai, sogam ma uhur ni sidea, nini ma, “Rugi ni in!”

9Boi do harga jualon in, anjaha bolini ai ibere bani na masombuh.

10Tapi ibotoh Jesus do ai, gabe nini ma dompak sidea, “Mase ma isunsahi hanima puang-puang on? Pambahenan na madear do na binahenni in Bangku.

11Ai tongtong do adong na masombuh rap pakon hanima, tapi anggo Ahu, seng tong-tong rap pakon hanima.

12Ai iuseihon pe minak ai bani angkulang-Ku, ibahen do ai na songon pananom-Hu.

13Sintong do na Huhatahon on bennima, ija pe iambilankon Ambilan Na Madear on i sab dunia on, baritahononkon do age na binahenni on, gabe pardingatan bani.”

Partahi-tahion ni si Judas

14Dob ai laho ma sada halak humbani na sapuluh dua ai, ai ma na margoran si Judas Iskariot, marayak sintua ni malim,

15nini ma, “Aha sihol bereon nasiam bangku, ase hupadas Ia bani nasiam?” Jadi igalar sidea ma bani tolu puluh duit pirak.

16Anjaha hunjia nari ipindahi uhurni ma panorang na dearhonsi, laho mantahihon Jesus.

Ipasirsir Panganan Paskah

17Bani ari parlobei ni mangankon ruti na so niigaran, roh ma susian ai bani Jesus, nini ma, “Ija do ipangindo uhur-Mu pasirsironnami Bamu panganon Paskah ai?”

18Jadi nini ma, “Laho ma hanima hu huta in, marayak si anu, anjaha hatahon ma hubani hata ni Guru in, ʻDohor ma panorang-Ku, ibagas rumahmu do Ahu sihol mangan Paskah rap pakon susian-Ku.ʼ”

19Jadi ibahen susian ai ma songon na hinatahon ni Jesus bani sidea, iugaskon sidea ma panganon Paskah ai.

Ipatalar Jesus Partahi-tahion ni si Judas

20Ase dob bod ari hundul ma Ia mangan rap pakon susian-Ni na sapuluh dua ai.

21Sanggah na mangan ai sidea, nini ma, “Sintong do na Huhatahon bennima: Sada hun bennima sihol mantahihon Ahu!”

22Jadi pusok tumang ma uhur ni sidea, gabe ipangkatahon sidea bei ma hu Bani, “Sedo ahu ai?”

23Jadi nini ma mambalosi, “Na manurdukkon tanganni rap pakon Ahu hubagas pinggan, ai ma na mantahihon Ahu.

24Tong do namin ujung ni Anak ni Jolma in, songon na dob tarsurat hinan, tapi bursik ma halak na mantahihon Anak ni Jolma in. Rahanan ma namin, ambit ulang tubuh jolma na sonai ai.”

25Dob ai si Judas pe, na mantahihonsi ai, marsahap ma, “Ai ahu do ai, Guru?” Jadi nini Jesus ma hu bani, “Ho do ai, songon na hinatahonmai.”

Horja Banggal Na Pansing

26Jadi sanggah na mangan ai sidea, ibuat Jesus ma ruti, ipasu-pasu ma, iponggoli anjaha ibere ma hubani susian-Ni, lanjar ihatahon, “Jalo hanima ma, anjaha pangan ma, daging-Ku do on!”

27Dob ai ibuat ma panginuman ai, ihatahon ma tarima kasih, ibere ma ai bani sidea, lanjar ihatahon, “Haganup ma hanima manginum hunjin!

28Ai daroh-Ku do on, daroh parpadanan, na niuseihon mangkopkop buei jolma, bahen hasasapan ni dousa.

29Tapi Huhatahon ma bennima, seng be inumon-Ku humbani sonari nari humbani buah ni hayu anggur on das hubani panorang ai, ijai ma inumon-Ku na baru rap pakon hanima ibagas Harajaon ni Bapang-Ku.”

Ilumbahon Jesus Pasal Pamorsouon ni si Petrus

30Jadi dob idodingkon sidea doding puji-pujian ai, luar ma sidea laho hu Dolog Jetun.

31Jadi nini Jesus ma dompak sidea, “Haganup do hanima sangsi Bangku saborngin on, ai tarsurat do, ʻLonsingan-Ku ma parmahan in, gabe marserak ma biribiri na sahulanan in.ʼ

32Tapi dob puho Ahu humbani na matei, lobeian-Ku ma hanima hu tanoh Galilea.”

33Jadi nini si Petrus ma mambalosi-Si, “Age pe ganup sidea sangsi Bamu, anggo ahu seng anjai sangsi.”

34Nini Jesus ma hu bani, “Sintong do hatang-Kon bam: Ibagas borngin on, paima martahuak dayok, tolu hali do Ahu parnalangonmu.”

35Nini si Petrus ma hu Bani, “Age pe ipamatei ahu rap pakon Ham, seng parnalangonku Ham.” Sonai do homa hata ni haganup susian ai.

Jesus i Getsemane

36Dob ai das ma Jesus rap pakon susian ai hu sada pohon na margoran Getsemane. Nini ma hubani susian-Ni, “Hundul ma hanima lobei ijon, sadokah laho Ahu martonggo ijai.”

37Jadi iarahkon ma rap pakon-Si si Petrus ampa anak ni si Sebedeus na dua ai. Sogop ma hu Bani pusok ni uhur ampa habulinsahon,

38gabe nini ma hubani sidea, “Pusok tumang do uhur-Hu, hira na matei do. Ijon ma hanima, anjaha puho ma hanima rap pakon Ahu.”

39Laho ma Ia otik dompak lobei, manrogop ma Ia martonggo, nini ma, “Ham Bapa, anggo boi, salpuhon Ham ma panginuman on hum Bangku! Tapi seng marguru hubani rosuh-Ku, tapi marguru bani rosuh-Mu do.”

40Dob ai mulak ma Ia hubani susian-Ni ai, tarpodom do sidea jumpah-Si, gabe nini ma dompak si Petrus, “Seng tarbahen hanima hape puho rap pakon Ahu pala sajam?

41Jaga ma anjaha puho ma, ase ulang masuk hanima hu parlajouan. Hinsah do namin tonduy, tapi galek do anggo daging.”

42Dob ai laho ma Ia paduahalihon martonggo, nini ma, “Ham Bapa, anggo seng boi salpu panginuman on, anggo na maningon inumon-Ku do, sai saud ma harosuh ni uhur-Mu.”

43Mulak ma Ia use, gabe jumpah-Si ma sidea tarpodom, ai borat do salibon ni sidea.

44Jadi itadingkon ma sidea, iulakkon ma martonggo patolu halihon, ihatahon ma hata nongkan ai.

45Dob ai laho ma Ia manjumpahkon susian-Ni ai, nini ma dompak sidea, “Nunutonnima ope modom ampa marsaran? Tonggor ma, domma dohor panorangni, ondoskononkon ma Anak ni Jolma in hu tangan ni pardousa.

46Jongjong ma hanima, laho ma hita! Tonggor ma, domma dohor na sihol mantahihon Ahu.”

Tartangkap Tuhan Jesus

47Sanggah na mangkatahon ai ope Ia, tonggor ma, roh ma si Judas, sada humbani na sapuluh dua ai, rap pakon buei halak na marpodang anjaha manjolom bogbog-bogbog, sinuruh ni sintua ni malim ampa pangintuai ni bangsa ai.

48Ia sipartahi-tahi ai domma ibere hinan tanda bani sidea, nini, “Ia in na husummah, ai ma Ia, tangkap nasiam ma!”

49Jadi mintor idohori ma Jesus, nini ma, “Tabi ma Bamu, Guru!” Lanjar isummah ma Ia.

50Tapi nini Jesus ma hu Bani, “Mangaha ho hujon, ambia?” Dob ai marrohan ma sidea, ilaluhon sidea ma tanganni bani Jesus laho manangkap-Si.

51Anjaha tonggor ma, sada halak humbani na mangirikkon Jesus palaluhon tanganni, isintak ma podangni, lanjar itampulhon ma ai bani sada halak juakjuak ni sintua ni malim, gabe mistak ma pinggolni.

52Jadi nini Jesus ma hu bani, “Sarungkon ma podangmin! Ai sagala na manampulhon podang, magou do bahenon ni podang.

53Ai na so tarbahen Ahu do, ninuhurmu, mangindo humbani Bapa, ase ipasirsir Bangku sonari lobih humbani sapuluh dua loksa malekat?

54Tapi sonaha ma saud na hinatahon ni surat in, na mangkatahon, paboa na maningon masa do sonon?”

55Bani panorang ai ma ihatahon Jesus bani halak na mabuei ai, “Songon na laho manangkap panrampok do nasiam roh manjumpahkon Ahu, marpodang anjaha manjolom bogbog-bogbog. Ari-ari do namin hundul Ahu i rumah panumbahan mangajari, tapi seng itangkap nasiam Ahu.

56Tapi masa do ganup on, ase jumpah na hinatahon ni nabi-nabi.” Jadi haganup ma susian-Ni ai manadingkon-Si, laho maporus.

Jesus i Lobei ni Pangadilan

57Ase dob itangkap sidea Jesus, iboan sidea ma Ia hubani sintua ni Malim Kayapas, ai domma martumpu ijai sibotoh surat ampa pangintuai-pangintuai.

58Tapi iirikkon si Petrus do Ia mandaoh-daoh das hu alaman ni sintua ni malim ai. Masuk ma ia hubagas lanjar hundul pakon juakjuak ai, laho mangidah atap sonaha ujungni.

59Tapi anggo sintua ni malim ai ampa haganup anggota ni Pangadilan Tinggi ai mangindahi hasaksian ladung do dompak Jesus, ase boi Ia marutang hosah.

60Tapi seng dong dapot sidea, age pe buei na mambere hasaksian ladung. Dobni adong ma dua halak,

61na mangkatahon, “Ihatahon halak on do: Tarbahen Ahu do manrumbakkon Rumah ni Naibata, anjaha pajongjongkon ai use ibagas tolu ari.”

62Jadi jongjong ma sintua ni malim ai, nini ma dompak-Si, “Ai seng balosan-Mu na sinaksihon ni sidea ai dompak Ho?”

63Tapi sai sip do Jesus. Dob ai nini sintua ni malim ai ma hu Bani, “Hupabija ma Ho bani Naibata na manggoluh in, ase ipatugah Ho bennami, barang na tongon do Ho Kristus, Anak ni Naibata!”

64Nini Jesus ma hu bani, “Songon na hinatahonmu ai ma tongon! Tapi Huhatahon ma bani nasiam, humbani sonari nari, idahon nasiam ma Anak ni Jolma in hundul i siamun ni Pargogoh in, anjaha roh i atas ni hombun ni langit.”

65Jadi irigatkon sintua ni malim ai ma bajuni, nini ma, “Iapasi do Naibata! Pindahan ope saksi? Tonggor ma, domma ibogei nasiam pangapasion-Ni in!

66Naha do ninuhur nasiam?” Jadi nini sidea ma mambalosi, “Maningon marutang hosah do Ia!”

67Jadi itijuri sidea ma bohi-Ni anjaha itenjui. Na legan mamastapi-Si, lanjar ihatahon,

68“Manjahai ma Ho bannami, ale Kristus, ise do na mamastap Ho?”

Pamorsouon ni si Petrus

69Ia si Petrus hundul do i darat i alaman ai. Jadi roh ma sada naboru manjumpahkonsi, nini ma, “Ho pe hasoman ni Jesus na hun Galilea ai do!”

70Jadi iporsou ma i lobei ni sidea haganup, nini ma, “Seng hubotoh na hinatahonmu ai!”

71Sanggah na luar ia hu horbangan ai, ididah sada naboru na legan ma ia, nini ma dompak halak na ijai ai, “On ma sada hasoman ni Jesus, na hun Nasaret ai!”

72Jadi iulaki ma mamorsou, pala marbija, “Seng hutandai Halak ai!”

73Tapi tongkin nari, marrohan ma na ijai ai manjumpahkon si Petrus, nini sidea ma dompaksi, “Tongon, dihut do ho sada humbani sidea, ai parsahapmai do patandahon ho!”

74Jadi mamura-murai ampa marbijai ma ia, nini ma, “Seng hutandai Halak ai!” Jadi mintor martahuak ma dayok.

75Gabe idingat si Petrus ma na hinatahon ni Jesus hu bani, “Paima martahuak dayok, tolu hali do porsouonmu Ahu.” Dob ai laho ma ia hu darat tangis sosombopon.


  Share Facebook  |  Share Twitter

 <<  Matius 26 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel