Dual PanelJahowa do Sipaluah Halak na Masombuh
1Mase mandaoh-daoh Ham jongjong, ale Jahowa, marponop Ham bani panorang hasosakanku?
2Halani enjeng ni parjahat, pusok do iahap na masombuh. Sai tardapot ma sidea bani hajahaton na niranggini ai.
3Ai ihamogahkon parjahat do sura-sura ni uhurni, ipuji-ipuji untungni, anjaha iapasi Jahowa.
4Nini parjahat do marhasoman pangunsong ni igungni, “Seng anjai marlulu Ia, seng dong Naibata,” sonai do pingkiranni.
5Manjadi do sagala langkahni tongtong; magijangtu do humbani uhuman-Mu; iunsongkon igungni dompak imbangni.
6Nini ibagas uhurni, “Seng anjai morot ahu, seng anjai mangonai bangku hasunsahan marsundut-sundut.”
7Gok do bura-bura pakon sipaoto-oto ampa panokohon pamanganni; hagedukon pakon hajahaton do i toruh ni dilahni.
8Sai manggompangi do ia bani huta-huta; bani ianan na ponop ibunuhi halak na so marpipot, matani mangkahapi halak na galek.
9Marponop do ia manggompangi songon singa ibagas naporon, manggompangi ia laho manangkap halak na masombuh. Itangkap do halak na masombuh laho pamasukkonsi hubagas sidingni.
10Ipaunduk do dirini mardalan, jadi dapot sisilonni na gogoh ai ma halak na galek.
11Nini ibagas uhurni, “Ihalupahon Naibata do ai, iponopkon bohi-Ni, seng anjai idahon-Ni ai ronsi sadokah ni dokahni.”
12Jongjong ma Ham Jahowa, ale Naibatangku, surdukkon Ham ma tangan-Mu, ulang ma lupa Ham bani halak na masombuh!
13Mase ma mapas parjahat bani Naibata, anjaha nini ibagas uhurni, “Seng anjai luluhonon-Ni ai?”
14ididah Ham do ai tene, itatap Ham do halojaon pakon hasunsahan laho manangani ai. Bamu do marondos halak na galek, Ham do panolong bani halak na tading maetek.
15Ponggolhon Ham ma botohon ni halak parjahat pakon halak na jungkat, balaskon Ham ma hajahatonni, ase ulang adong be ia.
16Jahowa do raja sadokah ni dokahni; magou do sipajuh begu-begu humbani tanoh-Ni.
17Domma itangihon Ham Jahowa pangindoan ni uhur ni halak na masombuh, ipatotap Ham do uhur ni sidea, anjaha ipatiur Ham do pinggol-Mu,
18laho pasintong uhum bani halak na tading maetek pakon na nidorun, ase ulang inunut jolma na i tanoh on mambibiari.