Dual PanelTonggo ni Sada Raja bani Jahowa; Mangindo Hamonangan ampa Hadoharon
1Humbani si Daud. Napuji ma Jahowa, dolog batu bangku, na mangajari tanganku marporang, sonai jari-jaringku marmunsuh;
2hagogohon ampa batar-batar bangku, bentengku ampa Sipaluah ahu, gantarhu ampa hatengeran ni uhurhu, na patundukkon bangsa-bangsa hu toruh ni kuasangku.
3Ham Jahowa, aha ma jolma in, ase ipardiatei Ham ia, anjaha anak ni jolma in, ase idingat Ham ia?
4Doskon logou tumang do jolma, ari-arini usih songon halinoh na mamontas.
5Ale Jahowa, ondun Ham ma langit-Mu anjaha turun ma Ham; jamah Ham ma dolog-dolog in, ase martimus.
6Sampakkon Ham ma hilap-Mu anjaha paerap Ham ma sidea; siarhon Ham ma panah-Mu anjaha pardakdak Ham ma sidea.
7Surdukkon Ham ma tangan-Mu hun datas, rotap Ham ma ahu, anjaha paluah Ham ma ahu humbani bah marbanggal, humbani kuasa ni halak na legan,
8na tongtong manluarhon hata ladung babahni. anjaha tangan siamunni tangan panipuon do.
9Ham Naibata, sihol dodingkononku do doding na bayu Bamu, anjaha sihol pujionku do Ham marhitei husapi sisapuluh tali.
10Ham sibere hamonangan bani raja-raja, anjaha na paluahkon si Daud, juakjuak-Mu, humbani podang hamagouan,
11rotap anjaha paluah Ham ma ahu humbani kuasa ni bangsa na legan, na tongtong manluarhon ladung babahni, anjaha tangan siamunni tangan panipuon do.
12Sai songon suan-suanan ma anakta, na dulas marganjang bani haposoonni, anjaha borunta songon basikah parsuhi, na niuhirhon bani rumah bolon.
13Sai gok ma tuanganta, padaratkon bagei-bagei ni sipanganon, marribu-ribu ma biribirinta, marlaksa-laksa bani sampalanta.
14Sai mombur-mombur ma lombunta, ulang mahua-mahua, ulang molei, anjaha ulang ma dong na tangis i alamanta.
15Martuah ma bangsa na sonin untungni, martuah ma bangsa, na mar-Naibatahon Jahowa.