Dual PanelPuji-pujian bani Jahowa na Marpanatap bani Bangsa ampa Sagala na Mangkabiari-Si
1Haleluya. Dear do mandoding bani Naibatanta, tongon, jenges anjaha talup do puji-pujian sisonai.
2Jahowa do na pajongjong Jerusalem; Ia do na pahumpul halak Israel na merap in.
3Ia do na pamalumkon uhur na marosak, anjaha na mambaluti ugah ni sidea.
4Ia do na manotapkon bilangan ni bintang. anjaha idilo do ganup bani goranni.
5Banggal do Tuhanta anjaha margogoh tumang, seng tarsibar hapentaran-Ni.
6Jahowa do panotap bani halak na masombuh, tapi ipatoruh do halak parjahat das hu tanoh.
7Dodingkon ma bani Jahowa doding puji-pujian, dodingkon ma Naibatanami marhitei husapi,
8ai Ia do na manrungkub langit marhitei hombun, Ia na pasirsir udan bani tanoh, na patubuhkon poyon-poyon bani dolog-dolog;
9na mambere gagaton bani pinahan, sonai bani anak ni kawak, na siok-siok hu Bani.
10Seng dear uhur-Ni mangidah hagogohon ni huda, seng ihadearhon hae-hae ni dalahi.
11Marosuh do Jahowa bani halak na mangkabiari-Si, na marpangarapan bani idop ni uhur-Ni.
12Puji ma, ale Jerusalem, Jahowa; pasangap ma Naibatamu, ale Sion!
13Ai Ia do na patoguh oruk-oruk ni horbanganmu, ipasu-pasu do anakmu i tongah-tongahmu.
14Ibahen do nagorimu mardamei, ipabosur do ho bani gandum na mataboh.
15Ia do na manongos hata-Ni hu tanoh on, doras do mardalan tonah-Ni.
16Ia do na mambere salju songon wol, anjaha na manaburhon namur songon abuan.
17Ia do na manampakkon sira-sira-Ni songon batu ranggisgis, ise do na tahan bani borgohni?
18Itongos do hata-Ni gabe malala ma ai; ibahen do logou-Ni mangombus, jadi mabaor ma bah.
19Ipatugah do hata-Ni bani si Jakob, paraturan-Ni ampa titah-Ni bani Israel.
20Seng ibahen na sonai bani ganup bangsa, anjaha titah-Ni seng ibotoh sidea. Haleluya.