Dual PanelOjur-ojur Mansarihon Goluh, Age pe Seng Tontu na Masa-masa
1Padalan ma rutimu hu dipar ni laut, ai bani dokah-dokah ni ari, sai na jumpah ho do ai.
2Bahen ma ai marbagi pitu atap ualuh, ai seng ibotoh ho atap hasedaon aha do na sihol masa hu atas tanoh on.
3Anggo gok udan ma hombun, iduruskon ma ai hu atas tanoh on; anggo marumbak hayu, dompak dangsina atap dompak utara, bani ianan harumbakanni ai ma ai tibal.
4Halak na sai mardiateihon logou, seng saud martidah be ai, anjaha halak na patorih-torih hombun, seng saud be manabi.
5Songon na so boi botohonmu sonaha pardalanan ni logou, anjaha sonaha parjadi ni holiholi ibagas boltok ni parinangon na boratan rumah, sonai do homa seng ibotoh ho pambahenan ni Naibata na manjadihon haganup.
6Girah sogod ma saburhon bonihmu, anjaha bodari pe ulang mintor marsaran tanganmu, ai seng ibotoh ho atap na ija na dua ai manjadi, atap rap do haduasi ai manjadi.
7Matobu do na lihar ai, anjaha marosuh do mata mangidah mata ni ari.
8Tongon, anggo manggoluh jolma in marpuluh-puluh tahun, marmalas ni uhur ma ibagas haganupan ai; tapi idingat ma homa pasal ari na golap, buei do ai. Haganup na sihol masa, sisoya-soya do ai.
Patut do na Maposo Marmalas ni Uhur Sanggah Haposoonni
9Marmalas ni uhur ma, ale garama, sanggah panorang haposoonmu, anjaha megah ma uhurmu bani panorang haparanaonmu. Anjaha bahen ma domu hubani na sininta ni uhurmu, ampa domu hubani harosuh ni matamu, tapi botoh da, bani haganupan ai boanon ni Naibata do ho hu paruhuman.
10Padaoh ma uhur na sunsah humbagas uhurmu, anjaha paholang ma na masambor humbani angkulamu; ai panorang hadakdanakon ampa haposoon, laho salpu do ai.