Alkitab Mobile SABDA
[VER] : [SIMALUNGUN]     [PL]  [PB] 
 <<  Wahyu 11 >> 

Isibar Rumah Panumbahan

1Dob ai ibere ma bangku sada buluh songon tungkot sibar-sibar anjaha nini ma, “Jongjong ma ho, sibar ma rumah ni Naibata pakon anjapanjap in ampa na marsombah ibagas in.

2Tapi alaman pardarat ni rumah panumbahan in ulang sibar, laosi ma in, ai domma iondoskon in bani bangsa sipajuh begu-begu. Dogei-dogeian ni sidea ma huta na pansing in ompat puluh dua bulan dokahni.”

Dua Saksi na Hona Bunuh Tapi Manggoluh Use

3Anjaha bereon-Ku do kuasa bani saksing-Ku na dua ai, ase manjahai sidea saribu dua ratus onom puluh ari dokahni, marhiouhon guni.

4Sidea ma na dua hayu jetun pakon na dua parsuluhan, na jongjong i lobei ni Tuhan simada tanoh on.

5Anggo adong na sihol mansedahon sidea, kaluar ma apuy humbani babah ni sidea mamboiskon munsuhni; anggo dong na sihol mansedahon sidea, sonai ma maningon matei sidea.

6Na markuasa do sidea mangkunsi langit, ase ulang roh udan sadokah panorang manjahai sidea. Na markuasa do sidea paubahkon bah gabe daroh anjaha mangkonahon bagei sitaronon bani tanoh in, atap sonaha hotopni ninuhur ni sidea.

7Anggo domma idobkon sidea hasaksian ni sidea, tangkog ma binatang ai hun ruang partoruh ai, laho marmunsuh dompak sidea, taluhononni ma sidea anjaha bunuhonni.

8Ragei ma bangkei ni sidea i alaman ni huta na banggal in, na margoran mangihutkon partonduyon Sodom pakon Masir, ijai do homa Tuhan ni sidea tarsilang.

9Jadi idahon ni buei bangsa, suku, hata pakon marga ma bangkei ni sidea tolu satongah ari dokahni, anjaha seng ilopas sidea tanomon bangkei ni sidea ai.

10Jadi sagala na mangiankon tanoh on, marmalas ni uhur ma anjaha marmegah-megah mangidah sidea, pala marsitongosan siluah samah sidea, halani nabi na dua on do sipangarsik-arsik hinan bani na mangiankon tanoh on.

11Dob salpu tolu satongah ari, sorap ma Tonduy hagoluhan na humbani Naibata bani sidea, jongjong ma sidea, jadi mabiar tumang ma sagala na mangidah sidea.

12Ibogei sidea ma sora na maling hun nagori atas, na mangkatahon bani sidea, “Naik ma hujon!” Jadi naik ma sidea hu nagori atas ibagas hombun, ididah munsuh ni sidea.

13Bani panorang ai masa ma lalou banggal, marumbak ma saparsapuluh ni huta ai, matei ma bani lalou ai pitu ribu halak, mabiar ma sagala na tading, anjaha ipasangap sidea ma Naibata na i nagori atas.

14Domma salpu bursik-bursik na paduahon; tonggor ma, barah ma roh hamagouan na patoluhon.

Tarompit na Papituhon: Puji-pujian bani Naibata na Bangkit gabe Raja

15Dob ai isompul malekat na papituhon ai ma tarompitni, jadi masa ma sora na gogoh i nagori atas, na mangkatahon, “Domma ondos bani Tuhanta pakon bani Kritus-Ni harajaon ni dunia on, manrajai ma Ia ronsi sadokah ni dokahni.”

16Ia sintua na dua puluh ompat ai, na hundul bani hotakni bei i lobei ni Naibata, manrogop ma marsombah bani Naibata.

17Nini sidea ma, “Na mangkatahon tarima kasih do hanami Bamu, Ham Tuhan Naibata, Sigomgom haganup, na dong sonari ampa na dob dong hinan, halani na dob ijalo Ham kuasa-Mu na banggal in anjaha bangkit Raja Ham.

18Manringis do sagala bangsa, gabe roh do ringis-Mu, jumpah ma panorangni, ase hona uhum sagala na dob matei lanjar mambere upah bani juakjuak-Mu, nabi-nabi ai, pakon halak na pansing ronsi sagala na mangkabiari goran-Mu, na etek ampa na banggal, sonai homa laho mansedahon siparseda tanoh in.”

19Dob ai ungkab ma rumah panumbahan ni Naibata i nagori atas, gabe taridah ma poti parpadanan-Ni ibagas rumah panumbahan ai, anjaha masa ma hilap, sora pakon longgur ampa lalou pakon sira-sira na banggal-banggal.


  Share Facebook  |  Share Twitter

 <<  Wahyu 11 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel