Dual PanelIhatahon Jahowa si Jeremia Luar humbani Adat ni Bangsa Siraseionkon ai
1Jadi roh ma hata ni Jahowa hu bangku sonon,
2“Ulang ma ho mambuat boru, anjaha ulang ma dong bam anak atap boru bani ianan on.
3Ai sonon do hata ni Jahowa pasal anak ampa boru na tubuh bani ianan on, ampa pasal parinangon na manubuhkon sidea ampa pasal paramangon sisuan sidea bani nagori on,
4ʻManingon matei do sidea halani sampar; seng dong na manangisi atap na mananom; gabe napu do sidea bani sisik ni tanoh in. Rasei do sidea bahenon ni podang pakon lohei, anjaha bangkei ni sidea gabe sipanganon bani manuk-manuk na i awang-awang ampa binatang na i talun.ʼ
5Ai sonon do hata ni Jahowa, ʻUlang ma masuki rumah parhoruon, laho tangis ijai atap laho mangapohi sidea, ai domma Hupadaoh damei-Hu humbani bangsa on, nini Jahowa, sonai idop ni uhur-Hu ampa holong ni atei-Hu.ʼ
6Na magodang atap na etek-etek maningon do matei i nagori on, seng dong na mananom atap na manangisi sidea, seng dong na marariki angkulani atap na manlepong uluni halani sidea.
7Seng dong na mamboan ruti, laho mangapoh halak na mateian, anjaha seng dong na mambere panginuman apoh-apoh halani na matei bapani atap inangni.
8Ulang ma masuki rumah parpestaan laho hundul rap pakon sidea, sihol mangan ampa minum.
9Ai sonon do hata ni Jahowa Zebaot, Naibata ni Israel, Tonggor ma, pasohon-Ku do bani ianan on, i lobeinima ampa sanggah panorangnima, sora malas ni uhur, sora olob-olob, sora ni siparunjuk ampa sora ni tunangan.
10Anjaha anggo ipadas ho ganup hata on bani bangsa on, anjaha ihatahon sidea bam, ʻMase ma ilumbahon Jahowa bennami ganup hasedaon banggal on? Aha do salahnami ampa dousanami, na binahennami dompak Jahowa Naibatanami?ʼ
11Jadi hatahon ma bani sidea, ʻHalani itadingkon ompungnima Ahu,ʼ” nini Jahowa, “Anjaha iihutkon sidea naibata na legan, ibalosi anjaha isombah sidea ai, tapi anggo Ahu itadingkon sidea, anjaha itadingkon titah-Ku seng idalankon.
12Anjaha halani samboran ope pambahenannima marimbang ompungnima ai, tonggor ma, ganup do hanima mangihutkon uhurnima na hengkeng anjaha na jahat in, manjua ia manangihon Ahu:
13Halani ai buangkonon-Ku do hanima hun nagori on hu tanoh na so tinandanima ampa na so tinanda ni ompungnima; balosannima ma ijai naibata na legan, arian pakon borngin, ai seng idop be uhur-Hu bannima.”
Uhum ampa Hatuahon na Sihol Parohon ni Jahowa bani Bangsa Israel ampa Bangsa Parbegu
14“Halani ai, tonggor ma, na roh ma panorangni,” nini Jahowa, “Seng be hatahonon ni halak ijai, ʻSongon sintongni manggoluh Jahowa, na mambobahon halak Israel tangkog hun tanoh Masir,ʼ
15tapi sonon do, ʻSongon sintongni manggoluh Jahowa, na mambobahon halak Israel tangkog hun tanoh parutara ampa humbani haganup tanoh pambuangan-Ku bani sidea. Ai paulakon-Ku do sidea hu tanoh, na dob Huberehon hubani ompung ni sidea.ʼ
16Tonggor ma, suruhon-Ku ma buei panjala,” nini Jahowa, “Jadi jaloonni ma sidea; dob ai suruhon-Ku ma buei parburu, jadi buruonni ma sidea humbani sagala dolog-dolog, humbani sagala buntu-buntu ampa ronggang-ronggang ni dolog batu.
17Ai kawah do panonggor-Hu bani haganup dalan ni sidea; seng lingod sidea hun lobei-Hu, anjaha hajahaton ni sidea seng ponop i lobei ni matang-Ku.
18Tapi sihol balaskonon-Ku do lobei lompit dua hajahaton ni sidea ampa dousa ni sidea, halani na dob ipabutak sidea tanoh-Ku marhitei sisombahon ni sidea na matei-matei ai, anjaha gok ibahen sidea parbagianan-Ku bani sihagigihononkon.
19Ham Jahowa, gogohku ampa batar-batarhu, haporusan bangku bani ari hasosakan! Bamu do sihol roh bangsa sipajuh begu-begu humbani ujung ni tanoh on, anjaha hatahononni ma, ʻSipaoto-oto tumang do hape na adong bani ompungnima, sisombahon na lang, na so margogoh mangurupi.ʼ
20Ai tarbahen jolma do mambahen Naibata bani? Sedo naibata ai!
21Halani ai, tonggor ma, pabotohkonon-Ku ma santorap on bani sidea pasal kuasang-Ku ampa hagogohon-Ku; jadi botohon ni sidea ma, Jahowa do goran-Ku.”