Alkitab Mobile SABDA
[VER] : [SIMALUNGUN]     [PL]  [PB] 
 <<  Yeremia 1 >> 

Pandiloon ni Jahowa bani si Jeremia

1Hata ni si Jeremia, anak ni si Hilkia, sada humbani malim na i Anatot, na i tanoh Benjamin;

2roh do hata ni Jahowa bani, bani panorang ni si Josia, anak ni si Amon, raja ni Juda, pasapuluhtolu-tahunkon dob raja ia.

3Roh do homa bani panorang ni si Joyakim, anak ni si Josia, raja ni Juda, das bani pasapuluhsada-tahunkon dob raja si Sedekia, anak ni si Josia, raja ni Juda, das bani na tarbuang Jerusalem bani bulan lima.

4Roh do hata ni Jahowa hu bangku, mangkatahon,

5“Paima Hutompa ho ibagas partapaan, domma Hutanda ho, anjaha paima itubuhkon inangmu ho, domma Hupapansing ho, anjaha Hupabangkit ho gabe nabi bani bangsa-bangsa.”

6Dob ai ningku ma, “Ham Tuhan Jahowa! Seng hubotoh naha marsahap, ai poso ope ahu.”

7Tapi nini Jahowa ma dompak ahu, “Ulang ihatahon ho, ʻPoso ope ahu.ʼ Atap huja pe ho Husuruh, maningon laho ho, anjaha atap aha na Hutonahkon bam, ai do hatahononmu.

8Ulang ho mabiar i lobei ni sidea, ai Ahu do hasomanmu, laho paluahkon ho,” nini Jahowa.

9Jadi isurdukkon Jahowa ma tangan-Ni, anjaha ijamah ma pamanganku; nini Jahowa ma dompak ahu, “Tonggor ma, domma Hunahkon hatang-Ku hubagas pamanganmu.

10Tonggor ma, Hupabangkit do ho sadari on mardiateihon bangsa-bangsa ampa harajaon-harajaon, laho mangumpat ampa manreongkon, laho parsedahon ampa mangagouhon, laho padearhon ampa manuan.”

11Dob ai roh ma hata ni Tuhan Jahowa hu bangku mangkatahon, “Jeremia aha do ididah ho?” Jadi ningku ma, “Huidah do dangkah ni hayu na dulas marbanggal.”

12Jadi nini Jahowa ma hu bangku, “Sintong do pangidahmu, ai puho do Ahu marjaga-jaga, laho pasaudkon hatang-Ku.”

13Dob ai roh ma hata ni Jahowa hu bangku paduahalihon, mangkatahon, “Aha do ididah ho?” Jadi ningku ma, “Hudon na gurgur do huidah, lunsat gurgurni, roh hun utara.”

14Dob ai nini Jahowa ma bangku, “Hun utara do roh ni hasedaon bani sagala pangisi ni nagori on.

15Ai tonggor ma, diloon-Ku do sagala bangsa, harajaon na i utara,” nini Jahowa, “Jadi roh ma sidea, anjaha ganup sidea pajongjong paratasni i lambung ni horbangan ni Jerusalem, laho manlawan tembokni inggot ampa sagala huta ni Juda.

16Jadi dabuhon-Ku ma uhum bani sidea, halani hajahaton ni sidea, ai ma na tinadingkon ni sidea ai Ahu, laho manggalang bani naibata na legan, anjaha marsombah bani jadi-jadian ni tangan ni sidea.

17Tapi anggo ho, gonditi ma binongeimu; misir ma ho, anjaha hatahon ma hubani sidea haganup na Hutonahkon bam. Ulang ma ho tarsonggot mangidah sidea, ase ulang bajoraon ho Hupaturut ibahen sidea.

18Tapi Ahu sandiri mambahen ho sadari on gabe huta na toguh, gabe basikah bosi, gabe tembok tombaga, laho mangimbang haganup nagori in, mangimbang raja-raja ni Juda, pangintuaini, malimni ampa pangisi ni nagori in.

19Porangon ni sidea do ho, tapi seng tartaluhon sidea, ai Ahu do hasomanmu,” nini Jahowa, “na paluahkon ho.”


  Share Facebook  |  Share Twitter

 <<  Yeremia 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel