Dual PanelLumba-lumba Pasal Habuangan Sipitupuluh Tahun ampa Parseda ni Babel
1On do hata na roh hubani si Jeremia, pasal haganup bangsa Juda, paompat-tahunkon dob raja si Joyakim, anak ni si Josia, raja ni Juda, bani tahun na parlobei dob raja si Nebukadnesar, raja ni Babel,
2ai ma ihatahon Nabi Jeremia bani haganup bangsa Juda ampa bani haganup pangisi ni Jerusalem, nini,
3“Mulai humbani pasapuluhtolu-tahunkon dob raja si Josia, anak ni si Amon, raja ni Juda, das bani sadari on, dua puluh tolu tahun dokahni, sai roh do hata ni Jahowa hu bangku, anjaha husahapkon do ai bannima marulak-ulak, tapi seng itangihon hanima.
4Tongtong do isuruh Jahowa sagala juakjuak-Ni, ai ma nabi-nabi ai, bannima, tapi seng ra hanima manangihon, anjaha seng ra hanima paeleng pinggolnima laho mambogei ai.
5Nini sonon, ʻMulak ma hanima ganup humbani parlahouni na masambor ampa pambahenanni na jahat in, ase totap hanima marianan bani tanoh, na dob binerehon ni Jahowa bannima ampa bani ompungnima, humbani sapari ronsi sadokah ni dokahni.ʼ
6Ulang ma ihutkon hanima naibata na legan, laho mambalosisi ampa marsombah hujai, anjaha ulang ma puhoi hanima ringis-Ku marhitei horja-horja ni tangannima, ase ulang Huparoh hasedaon bannima.
7Tapi seng itangihon hanima Ahu,” nini Jahowa, “Gabe ipuhoi hanima do ringis-Ku marhitei pambahenan ni tangannima, na gabe hamagouan bannima sandiri.
8Halani ai sonon do hata ni Jahowa Zebaot, ʻHalani na so itangihon hanima hatang-Ku,
9tonggor ma, parohon-Ku ma bangsa-bangsa par utara,ʼ” nini Jahowa, “Ampa si Nebukadnesar, raja ni Babel, juakjuak-Kai, boanon-Ku ma sidea mandorab tanoh on ampa sagala pangisini ampa dompak ganup bangsa-bangsa inggot; boiskonon-Ku do sidea, bahenon-Ku do sidea gabe songgot-songgot, sipahirion ampa siapason tongtong.
10Ambah ni ai, padaohon-Ku do hun tongah-tongah ni sidea sora malas ni uhur ampa olob-olob, sora ni siparunjuk ampa sora ni tunangan, sora ni panduda ampa sinalsal ni suluh.
11Anjaha tanoh on ganup maningon do tarulang anjaha lungun, anjaha maningon balosan ni bangsa-bangsa on do raja ni Babel pitu puluh tahun dokahni.
12Tapi dob salpu na pitu puluh tahun ai,” nini Jahowa, “Marlulu do Ahu dompak raja ni Babel, dompak rayatni ampa dompak tanoh ni halak Kasdim, halani hajahaton ni sidea, anjaha bahenon-Ku do tanoh ai tarulang lalab.
13Parohon-Ku do hubani tanoh ai domu hubani haganup hata na dob Hulumbahon dompaksi, ganup na tarsurat bani buku on, na dob nilumbahon ni si Jeremia dompak sagala bangsa.
14Age sidea, buei do bangsa ampa raja-raja na banggal marjabolonkon sidea; balaskonon-Ku do bani sidea romban hu bani pambahenan ni sidea ampa horja ni tangan ni sidea.”
Panginuman na Marisi Ringis ni Jahowa bani Haganup Bangsa
15Sonon do hata ni Jahowa, Naibata ni Israel hu bangku, “Buat ma humbani tangan-Ku panginuman on, na gok bani anggur ni ringis-Ku, anjaha bahen ma minum hunjai sagala bangsa, na Husuruh siparayakonmu.
16ase minum sidea gabe rebad-rebad, anjaha podoan halani podang na Husuruh hu tongah-tongah ni sidea.”
17Jadi hubuat ma panginuman ai humbagas tangan ni Jahowa, anjaha hupainumkon hubani bangsa, na sinuruh ni Jahowa siparayakonku:
18Ai ma hubani Jerusalem pakon hubani huta-huta ni Juda, hubani raja-rajani ampa hubani na sangap-sangapni, ase gabe tarulang anjaha lungun sidea, gabe songgot-songgot, sipahirion ampa siburaan, songon na masa sadari on;
19hubani Parao, raja ni Masir, gamot-gamotni, na sangap-sangapni ampa haganup rayatni,
20ampa haganup bangsa na legan, na i tongah-tongah ni sidea; hubani haganup raja ni tanoh Us ampa hubani haganup raja ni tanoh Palistim, ai ma Askalon, Gasa, Ekron pakon teba-teba ni Asdod;
21Edom, Moab ampa halak Amon;
22hubani ganup raja ni Tirus, haganup raja ni Sidon, raja-raja na i dipar ni laut;
23hu bani Dedan, Tema, Bus ampa haganup halak na ilepong jambulanni inggot;
24hubani ganup raja ni Arab ampa haganup raja ni marga-marga, na marianan i halimisan;
25hubani haganup raja ni Simri, haganup raja ni Elam ampa haganup raja ni Madai;
26hubani haganup raja na i utara, na daoh ampa na dohor, marjojor, ampa hubani ganup harajaon na i dunia on, na adong i sisik ni tanoh on. Anjaha dob salpu sidea, raja ni Babel ma minum.
27Dob ai hatahon ma bani sidea, “Sonon do hata ni Jahowa Zebaot, Naibata ni Israel, ʻMinum ma, mabuk ma anjaha mutah-utah, tompas ma anjaha ulang be jongjong, halani podang na Hutongos hu tongah-tongahnima.ʼ
28Tapi anggo manjua sidea manjalo panginuman ai humbagas tanganmu laho minum hunjai, hatahon ma bani sidea: Sonon do hata ni Jahowa Zebaot, ʻManingon inumonnima do!ʼ
29Tongon, tonggor ma, bani huta na targoran bani goran-Ku do Hupungkah mambahen hamagouan, mintor hanima ma lang hona uhum? Seng boi lang hona uhum hanima, ai domma Hudilo podang dompak haganup na mangiankon tanoh on,” nini Jahowa Zebaot.
30“Tapi anggo ho, lumbahon ma bani sidea haganup hata on, anjaha hatahon ma bani sidea, ʻMorom do Jahowa hun babou, anjaha humbani ianan-Ni na ma pansing ai do ipabogeihon sora-Ni. Maling do morom Ia dompak sampalan-Ni; marsurak do Ia songon halak sipangkorja ibagas kilang dompak haganup pangisi ni tanoh on.ʼ
31Maraloling do ai das hu ujung ni tanoh on, ai marpakara do Jahowa dompak bangsa-bangsa; roh do Ia manguhum sagala na mardaging, anjaha parjahat ai ondoskononni do bani podang,” nini Jahowa.
32Sonon do hata ni Jahowa Zebaot, “Tonggor ma, manrarat do hamagouan humbani bangsa hu bangsa, anjaha roh do haba-haba banggal hun ujung ni tanoh on.
33Bani panorang ai rasei do bangkei ni na binunuh ni Jahowa, martibalan humbani tampakan ni tanoh on das hubani tampakan na sada nari. Seng sitangisan sidea, atap sipatumpuon, atap sitanomon; gabe napu do sidea bani sisik ni tanoh on.
34Mandoruh ma hanima, ale parmahan, anjaha tangis ma; margulu ma bani abuan, hanima pambobai ni hulanan in, ai roh ma ari pambunuhon ampa pangerapan bannima, anjaha marosak ma hanima songon hudon na maharga.
35Seng dong be haporusan bani parmahan barang haluahon bani pambobai ni hulanan in.
36Bogei ma, partangis ni parmahan ampa doruh-doruh ni pambobai ni hulanan in! Ai Jahowa do na parsedahon sampalan ni sidea,
37anjaha harang na marsonang-sonang ai domma iparseda, halani gajag ni ringis ni Jahowa.
38Itadingkon do parlingodanni, songon pambahen ni sada singa poso-poso, ai domma tarulang tanoh ni sidea halani podang ni Jahowa ampa halani gajag ni ringis-Ni.”