Dual PanelBagah-bagah Pasal Parmulak hun Habuangan
1On do hata na roh hubani si Jeremia, humbani Jahowa,
2“Sonon do hata ni Jahowa, Naibata ni Israel, ʻSuratkon ma haganup hata na dob Huhatahon bam bani sada buku!
3Ai tonggor ma, na roh ma panorangni,” nini Jahowa, “Pasuangon-Ku ma ijai bangsang-Ku, ai ma Israel pakon Juda, nini Jahowa, anjaha boanon-Ku do sidea mulak hu tanoh na dob Huberehon bani ompung ni sidea, anjaha teanon ni sidea ma ai.
4On do hata, na hinatahon ni Jahowa pasal Israel ampa Juda.
5Sonon do hata ni Jahowa, Ibogei hanami do sora doruh-doruh; biar do na masa, seng dong hasonangan.
6Sungkun anjaha tonggor ma! Ai boi do paramangon tubuhan anak? Mase ma Huidah sagala paramangon manungkolhon tanganni bani binongeini songon naboru na mangarou? Mase ma marposi ganup bohi?
7Aih! Jangin ni ari on, seng ongga dong na sonai; panorang hasosakan do ai bani Jakob, tapi maluah do ia hunjai.
8Jadi masa ma bani panorang ai,” nini Jahowa Zebaot, “Ponggolhonon-Ku ma pasangan humbani tangkuhuk ni sidea, anjaha rotapon-Ku tali panangkut ni sidea, anjaha seng be parjabolonon ni halak na legan sidea.
9Tapi balosan ni sidea ma Jahowa, Naibata ni sidea, ampa si Daud, raja ni sidea, sipabangkiton-Ku bani sidea.
10Tapi anggo ho, ulang ma mabiar, ale Jakob juakjuak-Ku,” nini Jahowa, “Anjaha ulang ma tarsonggot, ale Israel; ai tonggor ma, paluahon-Ku do ho humbani tanoh na madaoh ampa ginomparmu hun tanoh habuangan ni sidea. Maningon mulak do Jakob, marsonang-sonang ma ia anjaha mardamei-damei, ise pe lang be na manonggotisi.
11Ai Ahu do mangkasomani ho laho paluahkon ho,” nini Jahowa, “Boiskonon-Ku do tongon sagala bangsa-bangsa pambuangan-Ku bannima, tapi anggo ho seng bois bahenon-Ku. Tongon Huajar do ho domu hubani na patut, seng paturuton-Ku ho lang hona pinsang.
12Sonon do hata ni Jahowa, ʻSeng tartambari naboritmu, parah do ugahmu.
13Seng dong tambar bani bayohmu, anjaha seng ra suang ugahmu.
14Haganup na mangkaholongi ho lupa do bam, seng parduli sidea bam; songon pambogbog ni munsuh sonai do pambogbog-Ku bam, songon panguhum ni munsuh na so maridop ni uhur; ai ma halani banggal ni salahmu, halani buei ni dousamu.
15Mase ma doruh-doruh ho halani ugahmu ampa halani naboritmu na so tartambari in? Halani banggal ni salahmu do, halani buei ni dousamu do, ae Hubahen na sonai bam.
16Tapi sagala na mamondut ho, maningon hona bondut do; anjaha sagala na manosak-nosak ho, maningon tarboan do hu habuangan; sagala halak na manrampok ho, maningon hona rampok do; anjaha sagala halak na manrampas ho, maningon hona rampas do.
17Tongon, pasuangon-Ku do ho jorgit, anjaha pamalumon-Ku do ugahmu,” nini Jahowa, “Halani na dob igoran sidea ho, ʻNa niambukkonʼ ampa: ʻSion, na so adong mampardulihon.ʼ
18Sonon do hata ni Jahowa, ʻTonggor ma, pasuangon-Ku do lampolampo ni si Jakob, anjaha marulak-ulakan uhur-Hu mangidah iananni; paulion do use huta ai i atas buntu-buntuni, anjaha rumah bolon ai bani iananni hinan.
19Kaluar do hunjai sora puji-pujian ampa sora ni na marmalas ni uhur. Pabueion-Ku do sidea, seng manginsurut be sidea; bahenon-Ku do sidea marmulia, seng be mahiri sidea.
20Gabe songon sapari ma anak ni sidea, anjaha kuria ni sidea totap do i lobei-Hu; uhumon-Ku do sagala na mangodoh-odoh sidea.
21Humbani sidea do raja bani sidea, anjaha hun tongah-tongah ni sidea do roh na manggomgomi sidea; lopason-Ku do ia roh dohor hu Bangku, ai ise ma na pag marmara goluhni laho mandohori Ahu,” nini Jahowa.
22“Hanima do bangsa Bangku, anjaha Ahu gabe Naibatanima.
23Tonggor ma haba-haba humbani Jahowa. Luar do gila-Ni, ai ma haba-haba sibungkar hasowor; dorabon-Ni do ulu ni parjahat.
24Seng surut ringis ni Jahowa, paima idalankon anjaha ipasaud sura-sura ni uhur-Ni. Arusannima do ai bani dokah-dokah ni ari.”