Dual PanelSi Gadalya Tarbunuh Ibahen si Ismael
1Papitubulankon roh ma si Ismael, anak ni si Netanya, anak ni si Elisama, ai ma sada halak humbani ginompar ni raja in, sada halak humbani kopala-kopala bani raja in, odor rap pakon sapuluh halak, marayak Gedalya, anak ni si Ahikam, hu Mispa; rap mangan ma sidea ijai i Mispa.
2Jadi jongjong ma si Ismael, anak ni si Netanya pakon na sapuluh halak hasomanni ai, gabe ibunuh sidea ma si Gedalya, anak ni si Ahikam, anak ni si Sapan, marhitei podang; ibunuh sidea do ia, na pinabangkit ni Raja Babel ai manggomgomi nagori in.
3Ibunuh si Ismael do homa haganup halak Juda na rap pakon si Gedalya i Mispa, ampa tentara ni halak Kasdim na tudu adong ijai.
4Patarni ai, dob hona bunuh si Gedalya, sanggah seng dong ope atap ise na mambotoh ai,
5roh ma dalahi hun Sikem, hun Silo ampa hun Samaria, ualuh puluh halak bueini, isuhur bei miseini anjaha marigat pakeianni, irariki angkulani, mamboan galangan sipanganon ampa dahupa, laho manggalangkon ai i rumah ni Jahowa.
6Jadi roh ma si Ismael, anak ni si Netanya hun Mispa manjumpahkon sidea, tangis-tangis do ia mardalan. Dob jumpah sidea, nini ma dompak sidea, “Laho ma hita marayak si Gedalya, anak ni si Ahikam.”
7Tapi dob das sidea hubagas huta ai, ibunuh si Ismael, anak ni si Netanya, rap pakon hasomanni ai ma sidea lanjar igijigkon hubagas parigi.
8Tapi sapuluh halak humbani sidea mangkatahon humbani si Ismael, “Ulang bunuh hanami, dong do iponopkon hanami i ladang gandum, jagul, manisan ampa minak.” Jadi ipaturut ma sidea, seng saud ibunuh rap pakon hasoman ni sidea ai.
9Ia parigi ai, pambuangan ni si Ismael bani sagala bangkei ni halak na binuhunni ai, ai ma parigi na banggal ai, na tinombei ni Raja Asa bahen partahanan dompak si Baesa, raja ni Israel; igoki si Ismael, anak ni si Netanya do ai bani halak na binunuh ai.
10Jadi itangkap si Ismael ma haganup na tading humbani bangsa in, na adong i Mispa, ai ma boru ni raja ai, ampa haganup halak na tading i Mispa, ai ma na dob niondoskon ni si Nebusaradan, kopala ni parjaga ai, hubani si Gedalya, anak ni si Ahikam. Haganup do sidea iboan si Ismael, anak ni si Netanya, anjaha misir ma sidea, marbalik hubani halak Amon.
11Tapi dob ibogei si Johanan, anak ni si Kareah ampa haganup kopala ni tentara hasomanni ai pasal haganup hajahaton na binahen ni si Ismael, anak ni si Netanya,
12jadi iarahkon sidea ma haganup tentara ni sidea, anjaha laho ma sidea mamorang si Ismael, anak ni si Netanya. Jadi dapot sidea ma ia dohorhon bah bolag na i Gibeon.
13Dob ididah bangsa ai, na rap pakon si Ismael ai si Johanan, anak ni si Kareah, ampa haganup kopala ni tentara, na mangkasomanisi ai, jadi malas ma uhur ni sidea.
14Haganup halak ai, na binoan ni si Ismael hun Mispa, marbalik ma anjaha mulak marayak si Johanan, anak ni si Kareah.
15Tapi anggo si Ismael, anak ni si Netanya, sompat do maporus humbani si Johanan rap pakon hasomanni ualuh halak, anjaha laho ma ia hubani halak Amon.
16Jadi iarahkon si Johanan, anak ni si Kareah ampa haganup kopala ni tentara na mangkasomanisi ai ma haganup bangsa na tading ai, ai ma na binoan ni si Ismael, anak ni si Netanya, hun Mispa, dob binunuhni ai si Gedalya, anak ni si Ahikam. Tentara, parinangon, dakdanak ampa juakjuak do na binoan ni si Johanan ai mulak hu Gibeon.
17Jadi laho ma sidea, lanjar marsaran i Gerut Kimham dohorhon Betlehem; marsura-sura do sidea laho hu tanoh Masir
18halani halak Kasdim; ai mabiar do sidea mangidah sidea, halani ibunuh si Ismael, anak ni si Netanya si Gedalya, anak ni si Ahikam, na pinabangkit ni Raja Babel manggomgomi nagori in.