Dual PanelTarboan si Jeremia hu Masir
1Jadi dob ihatahon si Jeremia hubani na mabuei ai haganup hata ni Jahowa, Naibata ni sidea, ai ma songon na tinonahkon ni Jahowa, Naibata ni sidea hu bani, sipadasonni hubani sidea,
2gabe roh ma si Asarya anak ni si Hosaya, ampa si Johanan anak ni si Kareah, ampa sagala dalahi na jungkat, nini sidea ma dompak si Jeremia, “Ladung do na hinatahonmu; sedo Jahowa, Naibatanami marsuruh ho mangkatahon, ʻUlang hanima laho hu Masir laho marianan ijai!ʼ
3tapi si Baruk, anak ni si Neriya do marsuruh ho mangimbang hanami, laho mangondoskon hanami hu tangan ni halak Kasdim, ase ibunuh hanami, atap iboban hanami tarbuang hu Babel.”
4Ase seng ra si Johanan, anak ni si Kareah, ampa haganup kopala ni tentara ampa haganup simbuei ai manangihon sora ni Jahowa, ase totap marianan i tanoh Juda.
5Jadi roh ma si Johanan, anak ni si Kareah, ampa haganup kopala ni tentara mangarahkon haganup teba-teba ni Juda, na roh mulak marianan i tanoh Juda humbani haganup bangsa-bangsa pambuangan ni sidea,
6paramangon, parinangon, boru ni raja ampa haganup halak, na tinadingkon ni si Nebusaradan, kopala ni parjaga ai mangkasomani si Gedalya, anak ni si Ahikam, anak ni si Sapan; sonai homa Nabi Jeremia ampa si Baruk, anak ni si Neriya.
7Jadi laho ma sidea hu tanoh Masir, ai seng ra sidea manangihon sora ni Jahowa. Das ma sidea hu Tahpanhes.
Ilumbahon si Jeremia Parroh ni si Nebukadnesar Patunduk Masir
8Dob ai roh ma hata ni Jahowa hubani si Jeremia i Tahpanhes,
9“Boan ma bani tanganmu batu banggal anjaha ponopkon ma ai ibagas tanoh bani dalan masuk hu rumah ni Parao i Tahpanhes, ididah dalahi-dalahi na hun Juda,
10anjaha hatahon ma bani sidea: sonon do hata ni Jahowa Zebaot, Naibata ni Israel, ʻTonggor ma, suruhon-Ku ma na mangalopi si Nebukadnesar, raja ni Babel, juakjuak-Kai, anjaha pajongjongonni ma paratasni i atas batu na Huponopkon on, anjaha paherbangonni do lampolampo harajaonni i atas ni.ʼ
11Maningon roh do ia anjaha patundukonni do tanoh Masir; ondoskononni do hu hamatean na dob tinontuhon hu hamatean, hu habuangan na dob tinontuhon hu habuangan, hubani podang na dob tinontuhon bani podang.
12Nahitanni do apuy ibagas rumah ni sisombah-sombahon ni Masir; tutungonni ma ai atap boanonni deba hu habuangan; hutuanni ma Masir, songon pangkutui ni parmahan bani hiouni; anjaha marsonang-sonang do ia mulak hunjai.
13Ropukonni do tiang batu na i Betsemes na i tanoh Masir, anjaha tutungonni do rumah ni naibata-naibata ni Masir.”