Dual PanelParseda ni Parkuasa i Dunia on ampa Parsuang ni Israel
1Bani ari ai, uhumon ni Jahowa ma marhitei podang-Ni na morsik, na banggal anjaha na gogoh ai, Leviatan, ai ma ulog na lingkat ai, Leviatan, ulog na mangarpei ai, bunuhon-Ni ma naga na i laut ai.
2Bani ari ai hatahonon ni halak ma, “Pohon anggur na jenges, dodingkon ma in! Ahu, Jahowa do na marramotkon in, tongtong do Husiram in.
3Ase ulang dong na mansedahonsi, Hujaga do in arian pakon borngin.
4Gila seng dong Bangku, tapi anggo jumpah Ahu suga-suga barang hupi-hupi pe, marhitei hamunsuhon, dorabon-Ku ma sidea, mosogkonon-Ku sidea rap-rap,
5anggo seng marsijoloman sidea bani pangondingon-Ku, ibahen sidea pardameian Bangku, pardameian ibahen sidea Bangku.
6Bani panorang na roh marurat ma Jakob, marbunga Israel anjaha martumbor, gokanni ma sab dunia on bani buah.
7Ai ipukul Jahowa do Israel songon pamukul-Ni bani imbang ni sidea? Ai ibunuh do sidea songon pamunuh-Ni bani munsuh ni sidea?
8Lang! Marhitei na palahohon, na marsuruh misir sidea, iparingorhon Ham sidea; iusir do sidea marhitei logou-Ni na mapor ai bani panorang ni logou hapoltakan.
9Halani ai marhitei on do hona sasap dousa ni Jakob, anjaha on do buahni hasasapan ni dousani: Iropuki ganup batu ni anjapanjap songon batu hapur na nilumatan; seng dong be na tading jongjong gana-gana ni Asera ampa tiang panumbahan bani mata ni ari.
10Ai huta na pinatoguh domma lungun, gabe ianan na tarulang anjaha na tinadingkon songon halimisan; ijai do manggagat lombu, ijai do ia manggompang anjaha igagati ranting-ranting.
11Anggo masak rantingni, iponggoli ma ai; marrohan ma naboru marsobankon ai. Ai bangsa na so maruhur do on; halani ai, Ia na manompa sidea seng maridop ni uhur bani sidea, anjaha Ia na manjadihon sidea, seng marholong ni uhur bani sidea.
12Bani ari ai, dogeion ni Jahowa ma buyur hun Eprat nari das hu Bah Masir, anjaha patumpuon ma nasiam marsada-sada, ale ginompar ni Israel.
13Bani ari ai sompulon ma tarompit na banggal, jadi mulak ma sidea na magou i nagori Assur ampa sidea na nierap hu Masir, roh marsombah bani Jahowa i dolog na ma pansing i Jerusalem.”