Dual PanelApoh-apoh ni Naibata bani Bangsa-Ni, na Tarbuang ai
1Apohi, apohi hanima ma bangsang-Ku! nini Naibata nasiam.
2Hatahon hanima ma ibagas halamlamon bani Jerusalem, anjaha dilohon ma hu bani, paboa marpunsa ma parjabolonan bani, domma isasap salahni, domma ijalo humbani tangan ni Jahowa lompit dua gantih ni ganup dousani.
3Sora na dilo-dilo, ʻPasirsir dalan ni Jahowa i halimisan, bahen pintor dalan na bolon bani Naibatanta i tanoh dorging-dorging!ʼ
4Ganup lombang pagijangon do, anjaha patoruhon ganup dolog ampa buntu-buntu; tanoh na marholbung-holbung padosdoson do, anjaha gabe pamah dolog batu.
5Jadi talar ma hamuliaon ni Jahowa anjaha sagala daging do mangidah ai, haganup ai pamangan ni Jahowa do mangkatahon ai.
6Sada sora mangkatahon, ʻDilohon ma!ʼ Jadi ningku ma, ʻAha ma dilohononku?ʼ Poyon-poyon do sagala daging anjaha ganup hinajengesni ai usih bani bunga na i talun.
7Melus do poyon-poyon ai, marurus bungani, anggo mangombus Tonduy ni Jahowa hunjai; tongon, poyon-poyon do bangsa in.
8Melus do poyon-poyon ai, marurus bungani, tapi anggo hata ni Naibatanta totap do ronsi sadokah ni dokahni.
9Bani dolog na gijang ma ho tangkog, ale Sion, siboan ambilan malas ni uhur! Pamaling ma soramu, ale Jerusalem, siboan Ambilan Na Madear, sai pamaling ma, ulang ho mabiar! Hatahon ma bani huta ni Juda, ʻTonggor ma, andin do Naibatanima!ʼ
10Tonggor ma, Tuhan Jahowa, roh ibagas hagogohon, anjaha tangan-Ni sandiri do na mandalankon kuasa Bani; tonggor ma, irik do hubani upah-Ni anjaha na sinari-Ni mardalan i lobei-Ni.
11Parmahanon-Ni do hulanan-Ni songon parmahan, marhitei tangan-Ni ipatumpu sidea; iusung do anak ni biribiri ibagas abingan-Ni, anjaha nanget do itogu-togu na marmurik.”
Timbul Anjaha Pargogoh Na So Tarimbang do Naibata Sipaluah Israel
12Ise do na boi manuhati sagala bah marhitei nangging-nanggingni? Ise do na boi manibar langit marhitei jongkal-jongkalni? Ise do na boi marsuhat orbuk ni tanoh on, anjaha ise do na boi manimbang dolog marhitei timbangan atap buntu-buntu marhitei dasing?
13Ise do na boi manibar Tonduy ni Jahowa, anjaha songon sada halak panuturi iajari Ia?
14Ise panungkunanni laho mambere uhur bani, anjaha na patuduhkon bani dalan ni uhum, na mangajarhon bani habotohan anjaha dalan ni pangarusion ipabotohkon bani?
15Tonggor ma, sagala bangsa usih do bani santektek bah na bani ember, anjaha ihira doskon orbuk na longkot bani timbangan; tonggor ma, ijomput do pulou-pulou doskon sangkamata horsik.
16Hayu ni Libanon seng sungkup bahen soban, anjaha sagala binatangni seng sungkup bahen galangan situtungon.
17Sagala bangsa doskon na lang do i lobei-Ni, hurang humbani na lang do sidea ihira, sabonar na lang do.
18Bani ise do pausihon nasiam Naibata, atap hubani aha do pausihon nasiam Ia?
19Gana-gana ai! Tuhang do na manuang ai, anjaha tuhang omas manlampiskon omas hujai, anjaha marrantei-rantei pirak do ai ibahen.
20Halak na so boi mambere sisonai, ipilih ma hayu na so ra masik bani, ipindahi ma sada tukang na pandei laho patureihon sada gana-gana na so ra miut bani.
21Ai seng ibotoh nasiam? Ai seng ibogei nasiam? Ai lang domma ipatugah ai bani nasiam humbani mungkahni? Ai lang domma iarusi nasiam ai humbani parjonam ni tanoh on?
22Ia do marhotak i babou ni tanoh on, anjaha na mangiankon on doskon balang do. Ia do na paherbang langit songon hiou anjaha na paamparhon ai songon lampolampo bahen siianonkon;
23Ia do na manlangkon raja-raja, panguhum ni tanoh on gabe sisoya-soya ibahen.
24Ai pe sidea isuan, ai pe itidahkon, ai pe mamungkah marurat hubagas tanoh, anggo roh Ia manompul sidea, mintor melus do sidea, anjaha habang sidea ibahen haba-haba songon lamlam.
25Bani ise do pausihonnima Ahu, anjaha usih hu hujai, nini Na Ma Pansing in?
26Kawahkon nasiam ma hu babou, anjaha tonggor ma, ise do na manompa in? Ia do na padarat balani marbilangan, na mandilo sidea ganup bani goran-Ni. Halani hinagok ni kuasa-Ni, anjaha habanggalon ni gogoh-Ni, sada pe lang ai magou.
27Mase ma isahapkon ham, ale Jakob, anjaha ihatahon ham, ale Israel, “Ponop do dalanku humbani Jahowa, anjaha Naibatangku seng parduli bani parkarangku?
28Ai seng ibotoh ham, atap seng ibogei ham, Naibata sisadokah ni dokahni do Jahowa, sitompa ujung ni tanoh on? Seng ra loja Ia atap ngayotan, seng tarsibar pingkiran-Ni.
29Ia do na mambere gogoh bani halak na loja, anjaha halak na so margolle ibahen do hinsah.
30Loja pe garama anjaha ngayotan, anjaha mangkatompas halak na maposo,
31tapi halak na martenger ni uhur bani Jahowa jumpahan gogoh mardapot-dapot, anjaha marhabong ni haluhuy do sidea naik; marlintuni pe sidea tapi seng marnaloja, mardalani pe sidea, tapi seng marnangayotan.”