Dual PanelTanoh na So Italuhon ope
1Jadi dob sayur matua si Josua, nini Jahowa ma hu bani, “Domma sayur matua ho, anjaha buei tumang ope tanoh in sipatundukon.
2On do tanoh, na tading ai ope: Ganup nagori ni halak Palistim pakon ganup tanoh Gesuri,
3hun bah Sihor nari, na i hapoltakan ni Masir, das hu parbalogan ni Ekron na hampit utara -- masuk hubani halak Kanaan do hiraon ai --, na lima raja ni halak Palistim ai ma raja hun Gaza, Asdod, Askalon, Gad pakon na hun Ekron; ambah ni ai halak Awi,
4na i Dangsina, ganup tanoh ni halak Kanani, pakon Meara. Na masuk hubani halak Sidon, das hu Apek, hu parbalogan ni halak Amori,
5ambah ni ai tanoh ni halak Gibli, pakon ganup Libanon, dompak hapoltakan, hun Baal-Gad na i bona ni Dolog Hermon nari, das hu Hamat,
6ganup pangisi ni tanoh dolog, hun Libanon nari das hu Misrepot-Maim, ganup halak Sidon. Ahu pe mangusir sidea i lobei ni halak Israel. Ruji-rujihon tumang ma in bahen parbagianan ni Israel, songon na dob huhatahon bam.
7On pe bagihon ma tanoh on bahen parbagianan bani na siah marga pakon bani na satongah marga Manase.”
Parbagianan ni na Tongah Tolu Marga i Dipar ni Jordan
8Rap pakon marga Manase na satongah nari, domma ijalo marga Ruben pakon Gad parbagiananni bei, na binere ni si Musa hubani sidea i dipar ni Jordan hampit hapoltakan, songon na binere ni si Musa, juakjuak ni Jahowa hubani sidea,
9Hun Aroer, na i topi ni habungan ni bah Arnon, pakon huta na i tongah-tongah ni habungan ai, pakon haganup pamah Medeba das hu Dibon;
10pakon ganup huta ni si Sihon, raja ni halak Amori, na manggomgomi Hesbon das hu parbalogan ni halak Amon;
11pakon Gilead ampa tanoh ni halak Gesuri pakon Maakati, pakon ganup Dolog Hermon ampa ganup Basan das hu Salka;
12ganup gomgoman ni si Og i Basan, na manggomgomi i Astarot pakon i Ederei, ia ma na tading humbani tading-tadingan ni ginompar ni si Refaim, na tinaluhon anjaha na niusir ni si Musa.
13Tapi seng iusir halak Israel anggo halak Gesuri pakon halak Maakati; marianan i tongah-tongah ni halak Israel do halak Gesuri pakon Maakati ronsi sadari on.
14Pitah hubani marga Levi do na so ibere parbagianan; galangan situtungon bani Jahowa, Naibata ni Israel do parbagianan-Ni, songon na hinatahon-Ni hinan bani sidea.
15Ase domma ibere si Musa hinan parbagianan hubani marga Ruben mar sasapangku!
16Ia tanoh ni sidea, ai ma hun Aroer na i topi ni habungan ni bah Arnon pakon huta na i tongah-tongah ni habungan ai, pakon ganup na i lambung ni Medeba,
17Hesbon pakon ganup huta na i pamah ai, Dibon pakon Bamot-Baal ampa Bet-Baal-Meon,
18Jahas, Kedemot pakon Mefaat,
19Kiriataim, Sibma, Zeretsahar na i dolog ni habungan ai,
20Bet-Peor, raboyon ni Pisga pakon Bet-Jesimot,
21ai ma ganup huta na i pamah ai, pakon ganup harajaon ni si Sihon, raja ni halak Amori, na manrajai i Hesbon, na tinaluhon ni si Musa, ia pakon kopala-kopala ni Midian, ai ma si Ewi, Rekem, Sur, Hur pakon Reba, raja wakil ni si Sihon, marianan i tanoh ai.
22Sonai homa si Bileam, anak ni si Beor, partondung ai, ibunuh halak Israel do marhitei podang, rap pakon hasomanni na tarbunuh ai.
23Jadi parbalogan ni tanoh ni halak Ruben, ai ma Bah Jordan pakon topi-topini ai. Ai ma parbagianan ni halak Ruben mar sasapangku, huta pakon dusun.
24Anjaha domma ibere si Musa parbagiananni hubani halak Gad, hubani ginompar ni si Gad mar sasapangku.
25Tanoh ni sidea, ai ma: Jaeser pakon ganup huta na i Gilead, pakon satongah ni tanoh ni halak Amon, das hu Aroer patontang pakon Rabba,
26anjaha hun Hesbon das hu Ramot-Mispa pakon Betonim anjaha hun Mahanaim das hu parbalogan ni Debir,
27anjaha i pamah ai Bet-Haram, Bet-Nimra, Sukkot pakon Zafon, teba-teba hun harajaon ni si Sihon, raja hun Hesbon, Jordan pakon topi-topini, das hu ujung ni Tao Kinneret i dipar ni Jordan hampit hapoltakan.
28Ai ma parbagianan ni halak Gad mar sasapangku, huta pakon dusun.
29Domma ibere si Musa parbagianan hubani satongah marga Manase, on ma parbagianan ni na satongah marga Manase ai mar sasapangku.
30Tanoh ni sidea ai mulai hun Mahanaim: ganup Basan, ganup harajaon ni si Og, raja hun Basan, pakon ganup huta ni si Jair na i Basan, onom puluh huta bueini,
31pakon satongah ni Gilead, Astarot, Ederei, huta-huta ni harajaon ni si Og, na i Basan; ibere ma ai hubani si Makir, anak ni si Manase, hubani satongah anak ni si Makir mar sasapangku.
32Ai ma na binagihon ni si Musa i pamah Moab i dipar ni Jordan, hampit hapoltakan ni Jeriko.
33Tapi hu marga Levi, seng dong ibere si Musa parbagianan; Jahowa Naibata ni Israel do parbagianan ni sidea, songon na hinatahon-Ni hubani sidea.