Dual PanelParentah ni Naibata hubani si Josua Laho Patunduk Tanoh Kanaan
1Jadi dob matei si Musa, juakjuak ni Jahowa, nini Jahowa ma dompak si Josua, anak ni si Nun, suruh-suruhan ni si Musa,
2“Domma matei si Musa, juakjuak-Kin, on pe bingkat ma ho, dipari ma Jordan on, ho pakon haganup bangsa on, hu tanoh siberehonon-Ku hubani sidea, hubani halak Israel.
3Ganup ianan sidogeian ni tapak ni naheinima, domma Hubere bannima, songon na dob Huhatahon hubani si Musa hinan.
4Humbani halimisan ai pakon Libanon das hu bah bolon ai, ai ma Bah Eprat, haganup tanoh ni halak Het das hu laut na bolag ai hampit hasundutan, ai ma parbalogannima.
5Seng dong barang ise na tahan jongjong i lobeimu sadokah ho manggoluh; songon pangkasomaning-Ku bani si Musa, hasomanan-Ku do ho; seng anjai paturuton-Ku barang tadingkonon-Ku ho.
6Pir ma tonduymu anjaha totap uhurmu, ai maningon ho do marbagi tanoh on bahen parbagianan ni bangsa on, na dob Hubulawankon hubani ompung ni sidea, laho mamberehon ai bani sidea.
7Asal ma pir tonduymu anjaha totap tumang uhurmu manramotkon anjaha mangkorjahon romban hubani ganup titah in, na dob tinonahkon ni si Musa, juakjuak-Kin, bam. Ulang ho manlembang hunjai, hu siamun atap hu sambilou, ase martuah ho barang huja pe ho laho.
8Ulang ma mosor buku ni titah on hun pamanganmu, sai pingkir-pingkiri ma in arian pakon borngin, ase iramotkon anjaha ihorjahon ho romban hubani na tarsurat ibagas in, jadi marulih ma ho bani sagala dalanmu anjaha mardohar ma ho.
9Ai lang domma Huhatahon bam, ʻPir ma tonduymu anjaha totap uhurmu, ulang gobir anjaha mabiar, ai Jahowa Naibatamu do hasomanmu, barang huja pe ho laho?ʼ”
10Dob ai iparentahkon si Josua ma hubani pambobai ni bangsa ai,
11“Bontas nasiam ma tongah-tongah ni parsaranan in, anjaha hatahon nasiam ma hubani bangsa in, ʻPasirsir nasiam ma bohal nasiam, ai ibagas tolu ari on ope diparan nasiam ma Jordan on, ase imasuki anjaha isoluk nasiam tanoh sibereon ni Jahowa Naibata nasiam in bani nasiam, bahen parbagianan nasiam.ʼ”
12Jaha hubani halak Ruben, Gad pakon satongah marga Manase nini si Josua ma,
13“Ingat nasiam ma hata na tinonahkon ni si Musa, juakjuak ni Jahowa bani nasiam, na mangkatahon, ʻDomma sonang nasiam ibahen Jahowa Naibata nasiam, anjaha ibere bani nasiam tanoh on.
14Tading ma parinangon nasiam, anak nasiam pakon pinahan nasiam i tanoh, na dob binere ni si Musa bani nasiam i dipar ni Jordan; tapi sagala siimbang munsuh i tongah-tongah nasiam maningon mandipar ma marsinjata bei i lobei ni sanina nasiam, laho mangurupi sidea,
15paima sonang ibahen Jahowa sanina nasiam songon nasiam, anjaha dihut sidea manoluk tanoh, sibereon ni Jahowa Naibata nasiam bani sidea; dob ai mulak ma nasiam hu tanoh parbagianan nasiam, ase nasiam simada ai, ai ma tanoh na binere ni si Musa, juakjuak ni Jahowa, hubani nasiam i dipar ni Bah Jordan hampit hapoltakan.ʼ”
16Dob ai nini sidea ma mambalosi si Josua, “Ganup na pinarentahkonmu bennami sai bahenonnami do, anjaha barang huja pe hanami suruhonmu, parayakonnami do.
17Songon panangihonnami bani si Musa, sonai do tangihononnami ham, asal ihasomani Jahowa Naibatamu ham, songon na hinasomanan-Ni si Musa.
18Barang ise na mangimbang parentahmu, anjaha seng itangihon hatamu, sagala na pinarentahkonmu bennami, maningon marutang hosah ia; pir ma tonduymu anjaha totap uhurmu.”