Dual PanelParbagianan ni si Manase pakon si Efraim
1Parbagianan ni anak ni si Josep mangihutkon ruji-ruji, ai ma: Hun Jordan na i lambung ni Jeriko, hampit hapoltakan ni Bah Jeriko, laho hu halimisan, tangkog hu Jeriko, laho hu dolog dompak Betel.
2Hun Betel laho hu Lus, dob ai mandipar hu tanoh ni halak Arki hu Atarot,
3anjaha tuad dompak hasundutan hu tanoh ni halak Japleti, das hu tanoh ni Bet-Horon parkehen, dob ai hu Gezer, anjaha marujung i laut.
4Ijalo anak ni si Josep ma parbagiananni, ai ma si Manase pakon si Efraim.
5Ia tanoh ni anak ni si Efraim mar sasapangku, ai ma: Parbalogan ni parbagianan ni sidea hampit hapoltakan: Atarot-Adar das hu Bet-Horon parhuluan,
6dob ai laho ma parbalogan ai hu laut; hampit utara ai ma Mikmetat; dob ai hampit hapoltakan marlegot ma parbalogan ai hu Taamat-Silo, anjaha mandipar hunjai hampit hapoltakan hu Janoah,
7dob ai hun Janoah tuad hu Atarot pakon hu Naarat, dob ai ihonai Jeriko, anjaha marujung i Jordan.
8Hun Tapuah laho ma parbalogan ai dompak hasundutan hu Bah Kana anjaha marujung i laut. Ai ma parbalogan ni marga Efraim mar sasapangku.
9Ambah ni ai huta na pinapulig bani halak Efraim, i tongah-tongah ni parbagianan i halak Manase, haganup huta-huta rap pakon dusunni.
10Tapi seng iusir sidea halak Kansan na marianan i Geser. Jadi marianan ma halak Kanaan i tongah-tongah ni Efraim das ronsi sadari on, tapi hona rodi do sidea.