Dual PanelBatu Pardingatan na i Gilgal
1Dob salpu idipari ganup bangsa ai Jordan, nini Jahowa ma dompak si Josua,
2“Buat hanima ma bannima humbani bangsa in sapuluh dua halak, sahalak bei humbani ganup marga,
3anjaha parentahkon ma hubani sidea, ʻBuat hanima ma hunjon, hun tongah-tongah ni Jordan on, humbani hajongjongan ni nahei ni malim, sapuluh dua batu, anjaha boan hanima ma ai hu dipar ai anjaha tibalhon hanima ma ai bani parbornginannima saborngin on.ʼ”
4Dob ai idilo si Josua ma na sapuluh dua halak ai, na pinilihni humbani halak Israel, sahalak bei humbani ganup marga,
5anjaha nini si Josua ma dompak sidea, “Mandipar ma nasiam i lobei ni poti ni Jahowa Naibata nasiam hu tongah-tongah ni Jordan an, iporsan bei ma bani abarani sada batu mangihutkon bilangan ni marga ni halak Israel,
6ase gabe sada tanda ma in i tongah-tongah nasiam. Anggo isungkun anak nasiam magira, ʻAha do arti ni batu on bani nasiam?ʼ
7Jadi hatahonon nasiam ma bani sidea, na rotap do bah ni Jordan i lobei ni poti parpadanan ni Jahowa. Sanggah na mandipar poti parpadanan ai, rotap ma bah ni Jordan, anjaha batu on ma bahen pardingatan bani halak Israel sadokah ni dokahni.”
8Jadi ibahen halak Israel ma songon na hinatahon ni si Josua hubani sidea. Iangkat sidea ma sapuluh dua batu hun parsitongahan ni Jordan, songon na hinatahon ni Jahowa hubani si Josua, mangihutkon bilangan ni marga ni Israel; iporsan sidea ma ai hu parbornginan ni sidea, anjaha ipajongjong ma ijai.
9Ipajongjong si Josua ma homa sapuluh dua batu i parsitongahan ni Jordan, bani ianan hajongjongan ni nahei ni malim siusung poti parpadanan ai, anjaha lanjar ijai ope ronsi sadari on.
10Tapi anggo malim na mangusung poti parpadanan ai, jongjong do i parsitongahan ni Jordan ai, paima saud haganup tonah ni Jahowa hubani si Josua, sihatahonon-Ni hubani bangsa ai, romban hubani na tinonahkon ni si Musa hubani si Josua. Jadi tarolos ma bangsa ai mandipar.
11Jadi dob salpu ganup mandipar bangsa ai, mandipar ma poti ni Jahowa pakon malim ai inonoi bangsa ai.
12Mandipar ma pakon halak Ruben, halak Gad pakon satongah marga Manase marsinjata bei mambobahon halak Israel, songon na hinatahon ni si Musa hinan hubani sidea,
13hira-hira ompat puluh ribu siimbang munsuh mandipar i lobei ni Jahowa hu parporangan i pamah Jeriko.
14Bani ari ai ipatimbul Jahowa ma si Josua i lobei ni ganup Israel, gabe mabiar ma sidea mangidahsi, songon pangkabiari ni sidea bani si Musa sadokah manggoluh ia.
15Dob ai nini Jahowa ma dompak si Josua,
16“Hatahon ma malim, na mangusung poti hasaksian ai, ase manaik sidea hun Jordan.”
17Jadi nini si Josua ma dompak malim ai, “Manaik ma nasiam hun Jordan in.”
18Anjaha dob manaik malim, na mangusung poti parpadanan ni Jahowa hun parsitongahan ni Jordan ai, dob ionjolhon malim ai tapak-tapak ni nahei ni sidea bani na horah, suang ma bah ni Jordan ai bani iananni hinan, sampur bani ganup pasirni.
19Tangkog ma bangsa ai hun Jordan bani ari sapuluh bulan sada, anjaha marsaran ma sidea i Gilgal, bani parbalogan hampit hapoltakan ni Jeriko.
20Anjaha batu na sapuluh dua na binoan ni sidea hun Jordan ai, ipajongjong si Josua ma ai i Gilgal.
21Jadi nini ma dompak halak Israel, “Anggo isungkun anak nasiam magira bapa ni sidea, ʻAha do arti ni batu on?ʼ
22Jadi patugah nasiam ma bani anak nasiam, ʻMardalan bani na horah do Israel mandipari Jordan,
23halani ipahorah Jahowa Naibata nasiam do bah ni Jordan i lobei nasiam, paima mandipar nasiam, songon na binahen ni Jahowa Naibata nasiam bani Laut Sigerger, na pinahorah-Ni i lobeita, paima mandipar hita,
24ase haganup bangsa ni tanoh on mananda tangan ni Jahowa na gogoh in, ase tongtong nasiam mabiar mangidah Jahowa Naibata nasiam.ʼ”