Alkitab Mobile SABDA
[VER] : [SIMALUNGUN]     [PL]  [PB] 
 <<  Yosua 7 >> 

Dousa ni si Akhan pakon Uhum halani ai; Talu Sidea i lambung ni Huta Ai

1Tapi ilanggar halak Israel do parentah pasal ugas sisiapkonon ai, ai ibuat si Akhan, anak ni si Karmi, tinubuhkon ni si Sabdi, anak ni si Sera humbani marga Juda do ugas sisiapkonon ai. Jadi gajag ma ringis ni Jahowa bani halak Israel.

2Dob ai isuruh si Josua ma dalahi hun Jeriko hu Ai dohorhon Bet-Awen hampit hapoltakan ni Betel, anjaha nini ma dompak sidea, “Tangkog ma nasiam, anjaha kahapi nasiam ma tanoh ai.” Jadi tangkog ma dalahi ai, anjaha ikahapi sidea ma huta Ai.

3Jadi mulak ma sidea hubani si Josua, nini sidea ma dompaksi, “Ulang ma pala ganup bangsa in tangkog, tapi dear ma dua atap tolu ribu halak tangkog, laho manaluhon huta Ai, ulang pala ganup bangsa in loja hujai, ai otik do sidea.”

4Jadi tangkog ma hira-hira tolu ribu halak hujai, hape maporus do sidea ibahen parhuta Ai ai.

5Jadi ibunuh pangisi ni huta Ai ma hira-hira tolu puluh onom halak humbani sidea, anjaha iayak ma sidea singgan horbangan ni huta Ai das hu Sebarim, anjaha ibunuhi sidea bani raboyon ai. Jadi madotei ma atei-atei ni bangsa ai gabe songon bah.

6Dob ai irigati si Josua ma hiouni anjaha manrogop ma ia i lobei ni poti ni Jahowa ronsi bodari, ia pakon pangintuai ni Israel, anjaha inahkon bei ma tanoh bani uluni.

7Dob ai nini si Josua ma, “Ham Tuhan Jahowa, mase ma padiparon-Mu bangsa on hun Jordan ai, laho mangondoskon hanami hu tangan ni halak Amori, ase magou hanami bahenonni? Ambit tading ma namin hanami i dipar ni Jordan ai.

8Ham Tuhan, aha ma hatahononku, dob lintun halak Israel ibahen munsuhni?

9Bogeion ni halak Kanaan pakon ganup pangisi ni tanoh on ma ai, jadi inggotan ni sidea ma hanami, anjaha siapkononni gorannami hun tanoh on; jadi aha ma bahenon-Mu mangkopkop goran-Mu na timbul in?”

10Dob ai nini Jahowa ma dompak si Josua, “Jongjong ma ho, mase ma sai manrogop ho?

11Domma mardousa Israel, ilanggar sidea do padan-Ku, na Huparentahkon ai bani sidea, ibuat sidea do deba humbani ugas sisiapkonon ai, manangko do sidea anjaha marladung, anjaha inahkon sidea ai hu tongah-tongah ni parugas ni sidea.

12Halani ai seng tarbahen halak Israel be martahan i lobei ni munsuh ni sidea, sai na maporus mando sidea i lobei ni munsuh ni sidea, ai sisiapkononkon do sidea. Seng be hasomanan-Ku hanima, anggo seng iboiskon hanima sisiapkonon ai hun tongah-tongahnima.

13Jongjong ma ho, urasi ma bangsa on, anjaha hatahon ma: Urasi hanima ma dirinima bei patar; ai sonon do ihatahon Jahowa, Naibata ni Israel: Adong do sisiapkononkon i tongah-tongahmu ale Israel, seng tarbahen martahan ho i lobei ni munsuhmu, paima ipadaoh hanima sisiapkononkon ai hun tongah-tongahnima.

14Roh ma hanima patar mangihutkon margani; anjaha marga, na tinuduh ni Jahowa, roh bei ma mar sasabapa, anjaha na sabapa, na tinuduh ni Jahowa, roh bei ma mar sasahalak.

15Anjaha halak, na tinuduh sisiapkonon ai, tutungon ma ia ibagas apuy, ronsi ganup na adong bani, halani na nilanggarni ai padan ni Jahowa, anjaha halani na binahenni ai habadoron bani Israel.”

16Jadi ipagirah si Josua ma puho patarni ai, anjaha ihatahon ma roh bei halak Israel mar sasamarga, anjaha tartuduh ma marga Juda.

17Dob ai ihatahon ma roh bei ganup ompung ni Juda, gabe tartuduh ma ompung Serah, dob ai ihatahon ma roh bei ginompar ni ompung Serah mar sasabapa, gabe tartuduh ma si Sabdi.

18Dob ai ihatahon ma roh bei ginompar ni mar sasahalak, gabe tartuduh ma si Akhan, anak ni si Karmi, anak ni si Sabdi, anak ni si Serah humbani marga Juda.

19Dob ai nini si Josua ma dompak si Akhan, “Ale ambia, sai pasangap ma Jahowa, Naibata ni Israel, anjaha bere ma puji-pujian Bani; patugah ma bangku aha na binahenmai, ulang porsou hu bangku.”

20Jadi nini si Akhan ma mambalosi si Josua, “Tongon do, domma mardousa ahu hubani Jahowa, Naibata ni Israel, anjaha sonon do na hubahen ai:

21Huidah i tongah-tongah ni taban-taban ai sada baju Babilon na jenges pakon dua ratus sekel pirak pakon sangkibul omas lima puluh sekel boratni; gabe impol ma matangku mangidah ai, lanjar hubuat, anjaha tonggor ma, tartanom do ai ibagas tanoh i tongah-tongah ni lampolampongku, anjaha pirak ai i toruhni.”

22Dob ai isuruh si Josua ma suruhanni, marlintun ma sidea hu lampolampo ai; tonggor ma, tartanom do ai ibagas tanoh bani lampolampo ai, anjaha pirak ai i toruhni.

23Dob ai ibuat sidea ma ai humbagas lampolampo ai, anjaha iboan ma hubani si Josua hubani ganup halak Israel anjaha itibalhon ma ai i lobei ni Jahowa.

24Jadi iboan si Josua ma si Akhan, anak ni si Serah ai, pakon pirak, baju ampa omas na sangkibul ai, ronsi anakni pakon boruni, lombuni, halodeni pakon biribirini, lampolamponi pakon sagala na dong bani, anjaha ganup halak Israel hasomanni mangodorhon sidea tangkog hu habungan Ahor.

25Dob ai nini si Josua ma, “Mase ma iagou ho hanami? Agouon ni Jahowa ma ho sadari on.” Jadi ipargijig ganup halak Israel ma ia bani batu; itutung ma sidea bani apuy, anjaha ipargijig bani batu.

26Jadi ipajongjong sidea ma i atasni sada timbunan batu na bolon, na adong ope ronsi sadari on. Jadi marpangulaki ma uhur ni Jahowa humbani pargajag ni ringisni. Halani ai targoran do ianan ai habungan Ahor ronsi sadari on.


  Share Facebook  |  Share Twitter

 <<  Yosua 7 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel