Dual PanelPanonggoran na Paompatkon: Sintua ni Malim Josua
1Dob ai ipataridahkon ma hu bangku si Josua, sintua ni malim ai, jongjong i lobei ni malekat ni Jahowa, anjaha setan ai jongjong i siamunni, manukas-nukasisi.
2Tapi nini Jahowa ma dompak setan ai, “Papaan ni Jahowa ma ho, ale Setan! Jahowa, na manodoh Jerusalem ma na mamapai ho! Ai lang sipu-sipu do ia on, na nidokdok humbani apuy?”
3Tapi marhiou na mabutak do si Josua jongjong i lobei ni malekat ai.
4Jadi nini malekat ai ma dompak halak na jongjong i lobeini ai, “Tanggali ma baju na butak ai hun bani.” Tapi hubani sandiri, nini ma, “Tonggor ma, domma hupadaoh hun bamu panlanggaronmu, anjaha sorungkononku ma bamu pakeian pesta.”
5Jadi ningku ma, “Mahua inahkon sidea ma sada gotong-gotong bani uluni ai.” Jadi inahkon sidea ma sada gotong-gotong na borsih hu atas uluni, anjaha isorungkon ma homa hiou bani; anjaha malekat ni Jahowa ai jongjong i lambungni.
6Dob ai nini malekat ni Jahowa ai ma palumbahon si Josua,
7“Sonon do hata ni Jahowa Zebaot, ʻAnggo mardalan ho bani dalan-Ku, anjaha idalankon ho horja na Huondoskon in bam, jadi ho ma na manggomgom rumah-Ku ampa na manjagai alaman-Ku, anjaha lopason-Ku ma ho marparsaoran ampa sidea na jongjong on ijon.ʼ
8Tangihon ma, ale Sintua ni Malim Josua, ho ampa hasomanmu na jongjong i lobeimin, ai tanda pasal na sihol roh do hanima, ʻTonggor ma, parohon-Ku ma juakjuak-Ku, si Tumbor.
9Ai tonggor ma, bani batu na dob Hutibalhon ai i lobei ni si Josua (bani batu na sasada ai adong pitu mata), hujai ma uhirhonon-Ku suratni ai,ʼ nini Jahowa Zebaot, ʻanjaha Ahu manasap hajahaton ni tanoh in ibagas na sadari.
10Bani ari ai,ʼ nini Jahowa Zebaot, ʻganup hanima marsiontangan ma marlinggom hu toruh ni hayu anggurni ampa hu toruh ni hayu arani.ʼ”