Dual Panel1Wali aku nempo magombo ri raya basa-basa nto lino pasi basa mpomakau i mPue Allah yako saruga, pei taa mamporayang sa’e, tare batuanginya. Apa ane ewa see, gombongku ojo ewa nggongi to kanjengu-njengu pasi ewa bolong to matino apa taa kojo re’e batuanginya.
2Pasi nempo aku nawaika i mPue mawali to pantuntu tuntuNya pasi rawaika mangansani anu to taa nansani ntau, pasi nempo bae kanasanya to nawaika i mPue aku, pasi nempo aku maroso kojo pangayangku see kukurang mangalimba tongku, nempo ewa see ane aku taa mamporayang sa’e, tare batuanginya katuwungku.
3Pasi nempo aku mangawaika yau samparia ngaya-ngayangku resi tau to masiasi, pasi mangawaika yau korongku damate ratunju, pei ane aku taa mamporayang sa’e tare batuanginya resi aku.
4Wali tau to mamporayang sa’e, tau etu bae sabaranya pasi manoto. Tau etu taa timopo rayanya resi yununya. Ia taa tibaro pasi taa seja mangei.
5Tau to mamporayang sa’e etu, ia taa makasar gombonya pasi lengkonya. Pasi ia taa ojo mampobuuka pamporani to si iaja. Ia taa majoli maja’a rayanya resi yununya pasi taa seja mangendo sala nu yununya.
6Pasi tau to mamporayang sa’e etu taa masanang ane yununya mangika palaong to taa singkonong pei i Pue Allah, pei ia masanang ane yununya mangalulu jaya to monso.
7Pasi tau to mamporayang sa’e etu taa mangkitanaka sala nu yununya. Pasi ia sangkani ojo rani mangaya anu to matao mangkonong yununya. Pasi nempo maja’a lengko nu yununya, ia tare pandoonya mansarumaka i Pue see yununya etu damajea yako lengkonya etu. Pasi tau to mamporayang sa’e etu sangkani inso rayanya ane mangarata kasusa.
8Wali pamporayang tare kapuranya. Pei tau to re’e kapandenya mamporata tuntu i mPue, pasi tau to pande magombo ri raya basa-basa to taware igurunya, pasi tau to bae kanasanya, sora to rawaika sira etu samparia dapaya yau.
9Apa tempo si’i kita tawa mangansani samparia, ojo singga’a to nansani ngkita pasi gombo nto pantuntu tuntu i mPue Allah gombonya etu tawa samparia to i Pue Allah damanganto’oka kita.
10Pei ane ratamo temponya i Pue Allah damampasilonga samparia, tempo etu dapaya yau sora to taa masilonga etu.
11Rapanya tempo aku dakodiwa. Tempo etu gombongku ewa gombo nu ana kodi pasi pangansaningku ewa ana kodi pasi pampobuukangku ewa ana kodi. Pei tempo aku mawali bae aku mamposaka yau lengko nu ana kodi.
12Wali si’i-si’i kita ewa tau to mangalo’aka lengkenya nja’u sami to mawaraus, wali taa mayoas. Pei ri tempo to darata kita damayoas mangkita ewa tau to mangalo’aka lio nsa’e. Pasi si’i-si’i anu to kunsani ojo sangga’aja, pei ri tempo etu dasewaju ewa wimba kanasanya i Pue Allah mangansani aku.
13Wali si’i-si’i togo ngaya lengko to taa dapura yau. Etu semo pangaya pasi pansarumaka pasi pamporayang. Pei lengko to togo etu, to bae kojo batuanginya, etu semo pamporayang.