Dual Panel1Wali yako ri propinsi Siria pasi Kilikia i Paulus sira dua i Silas polas wo’u yau njo’u kota Derbe pasi Listra. Nja’u kota Listra etu re’e samba’a anaguru i mPue Yesu, sanganya i Timotius. Ngkai etu indonya to Yahudi to mangaya i Pue Yesu, pei pa’anya to Yunani, si’a to Yahudi.
2Wali i Timotius, ane ewa panto’o nu pua’inya to samba’a pangaya to nja’u Listra pasi Ikonium, ia tau to matao.
3Wali i Paulus rani i Timotius mangalulu ia ri raya mpalinjanya. Pei to Yahudi to maroo ri lipu-lipu danakanjo’u etu, sira paka mangansani pa’a i nTimotius ia tau Yunani, si’a to Yahudi, wali ia taa mangansui ananya. Wali see naka i Paulus mangansui ruyu i Timotius naka ne’e mampakasusa raya nto Yahudi to danapotunde nsira etu.
4Wali yako etu i Paulus sira togo i Silas pasi Timotius, sira meyoko yako kota Listra pei malinja wo’u rata ri kota-kota to nja’u tana etu. Ponto kota nakarata nsira togo etu, sira mamporata resi tau ri kota etu gombo mpomakau i mPue Yesu pasi ketua-ketua ntau to mangaya ri Yerusalem to natulis nsira seore resi tau Antiokhia. Naka pei sira mamporata gombo etu see tau ri kota-kota etu damangaluluka seja porenta-porenta to nato’o nsira.
5Wali tau to mangaya i Pue Yesu to siromu nja’u kota-kota etu sira rapakaroso pangayanya pasi ponto eo sira to mangaya etu tiduga-dugang wo’u kaborosinya.
6Wali yako etu i Paulus sira togo rani yau mampakarebaka tuntu i mPue nja’u propinsi Asia, pei sira taa nawaika i Nosa Mapasing yau njo’u ria. Wali sira togo yau mangalinjak tana Prigia pasi Galatia.
7Ri raya mpalinjanya etu, sira rata nja’u ungka mpropinsi Misia panewa sira rani polas wo’u njo’u propinsi Bitinia, pei sira taa seja nawaika i Nosa mPue Yesu yau njo’u ria.
8Wali sira togo ojo liu polas ri propinsi Misia panewa yau lo’u kota Troas to la’u wii ntasi.
9Wali tempo sira togo la’u ria, ri raya mburi etu, i Paulus ia re’e pangkitanya. Ri raya mpangkitanya etu ia re’e mangkita samba’a tau yako ri propinsi Makedonia. Ngkai etu makore pei mamporapika resi i Paulus, to’onya, “Pawote rima pei sawang kami.”
10Wali ojo karoonya i Paulus mangkita pangkitanya etu, ia mangansaritaka resi kami. Wali manasa resi kami i Pue Allah mampokau kami yau njo’u Makedonia damampakarebaka tau nja’u ria kareba matao, see naka kami mansaka mampakaroso dayau njo’u Makedonia etu.
11Wali yako ri Troas etu, kami mapone ri bangka pei malayag rata nja’u pulo Samotrake, panewa yako etu eo rao wo’u kami malayag wo’u rata nja’u kota Neapolis.
12Yako ri Neapolis etu kami malinja rata ri kota Pilipi. Pilipi etu semo kota ri propinsi Makedonia to nansani kojo ntau boros. Pasi tau to maroo nja’u kota Pilipi etu, kaborosinya to Roma. Wali kami maroo-roo bara sawei mbengi nja’u ria.
13Wali ri rayanya kami maroo-roo nja’u kota etu, ojo karatanya Eo Rapandoo, kami yau ri sambali mbombo ngkota, yau mampago nja’u towo nue. Naka pei kami mampago nja’u ria apa kami mampondayaka nja’u ria semo tampa to napago nto Yahudi yau damakaikai resi i Pue Allah. Wali ojo karata mami nja’u ria, kami matunda panewa mamula mampogomboka tau we’a to siromu nja’u ria.
14Tau we’a to mangandonge gombo mami etu, samba’a sanganya i Lidia. I Lidia etu ia yako ri kota Tiatira, pasi ia tau to mampobalu kain to makamumu to masuli olinya. I Lidia etu ia tau to si’a to Yahudi pei ia mampue mampakabae i Pue Allah. Wali i Pue mangalokasika ia pampobuukanya see ia mampodongeka kojo gombo to nato’o i mPaulus.
15Wali yako etu i Lidia pasi tau to maroo ri banuanya sira rabaptis. Ojo karoonya sira rabaptis, i Lidia mangansale kami, to’onya, “Ane monso pu’u komi mampobuuka aku tau to mangaya i Pue, ane ewa see yau maroo ri banuangku, aku damampalinggona.” Wali ewa see to’onya mamporapika resi kami sampe kami yau mangalulu ia njo’u banuanya.
16Wali yako etu re’e seore kami yau mampago wo’u tampa rapokai-kai. Tempo kami ri jaya etu kami mangarata samba’a tau we’a to napowatua ntau. Tau we’a etu naposuak measa, wali yako ri kuasa measa etu ia nansani manganto’o yami palaong to damawali. Wali pue ntau we’a etu bae kasugi to narata nsira apa yako ri palaong to naika mbatuanya etu, apa tau mangawaika sira doi see tau we’a etu damanganto’oka sira palaong to damawali resi sira.
17Wali tempo kami yau njo’u tampa rapokai-kai etu, tau we’a etu mangalulu-lulu payu i mPaulus pasi kami. Panewa tau we’a etu maroso loonya kaboo-boo manganto’oka tau, “Tau si’i to papolaong i mPue Allah anu Makuasa! Sira mampakarebaka resi komi ewa wimba jaya see komi darapalaes!”
18Wali tau we’a etu bara sawei eo mangika palaong to etu, see naka i Paulus ia mosam rayanya apa ia mangansani kamonsonya measa semo to mangika palaong to etu. Wali ia mangalekoka tangonya resi tau we’a etu panewa mampogomboka measa to re’e ri rayanya, ia manganto’o, “Yako ri kuasa i Yesu Kerisitu aku manganto’oka korom piyai yako resi tau we’a si’i!” Wali tempo etu semo measa etu masuwu muni yako ri tau etu.
19Pei ojo pangkita ntau pue ntau we’a etu tamo re’e measa resi ia, sira mangansani tamo re’e jaya mangarata doi apa ia tamo nakoto manganto’o yami palaong to damawali resi tau. Wali sira mangansoko i Paulus sira dua i Silas. Sira mangaditi yau tau dua etu njo’u pasar damampotango to pobotus.
20Wali ojo karata nsira nja’u tango nto pobotus etu, sira manganto’o, “Tau dua si’i to Yahudi pasi sira mangarotai kota ngkita si’i,
21apa sira mampotundeka tau ada, pei ada etu taa masipato kita to Roma mampodongeka pasi mangaluluka.”
22Wali ojo karoonya tau etu magombo, tau boros to nja’u pasar etu sira mula seja mangampoja’a i Paulus sira dua i Silas. Pasi to pobotus etu sira manganto’oka tau mangansiat yau pake ntau dua etu, panewa mangawotu-wotu sira dua.
23Wali tau etu mapari kojo naika mangawotu-wotu i Paulus sira dua i Silas, panewa roo see sira mangantarungku tau dua etu. Sira manganto’oka tau to mangajagang tarungku, to’onya, “Jagai kojo tau dua si’i.”
24Wali tau to mangajagang tarungku etu mampalaika to nato’o ntau etu. Ia mampaposua tau dua etu nja’u songi to ri tongonya kojo, pasi ia mangarumputika seja kaju to mabeu kojo ri witinya.
25Yako etu, bara ntongo wuri, i Paulus sira dua i Silas sira tongonya makai-kai pasi manyanyi nyanyi to mangabarong i Pue Allah. Pasi samparia tau to ri raya ntarungku etu mampodongeka sira dua.
26Wali tempo etu kodi majoli re’e lengko tana to maroso kojo. Wali lengko tana etu mangalengko yau tundasi ntarungku etu. Pasi tempo etu ponto wombo nu ntarungku mansaka tiloka, pasi rante-rante pungu ntau to ratarungku etu tilapa samparia.
27Wali yako etu tau to mangajagang tarungku etu mangendo muni yako kayorenya pei mangalo’a ba’a mbombo ntarungku etu samparia tiloka. Wali ia mampondayaka tau to rata’amaka ri raya ntarungku etu bara niyai muni, wali see naka ia mangarebu wadanya damanoo.
28Pei i Paulus mangkita ia mangarebu wadanya, wali ia maroso loonya kaboo manganto’oka tau etu, “Ne’e manoo! Kami samparia paka re’iwa rire.”
29Wali ojo pangandonge ngkai etu gombo i mPaulus, ia mampokio mamporapi suyu resi yununya, panewa ia maripo masua ri raya ntarungku. Pasi tongo ngkarongkonya ia madungku yau ri wawo ntana ri tango mbiti i mPaulus sira dua i Silas saba manga’angga sira.
30Roo see ia makore pei mangkeni yau sira dua ri sambali ntarungku etu, panewa ia mampotanaka resi sira dua, to’onya, “Pa’a-pa’a, kesaa dakuika see aku darapalaes?”
31Wali sira dua mangansonon, sira manganto’o, “Aya i Pue Yesu. Apa ane korom damangaya Ia, korom darapalaes, pasi ewa see seja samparia tau to maroo ri banuamu.”
32Wali yako etu sira dua mampakarebaka tuntu i mPue resi ngkai etu pasi samparia tau to maroo ri raya banuanya.
33Pasi ri tempo etu seja ngkai etu mangkeni sira dua pei mamposo’i yau wakanya rawotu-wotu etu. Panewa roo etu ia sindara-ndara pei samparia tau to maroo ri banuanya, sira mansaka rabaptis.
34Ojo karoonya sira rabaptis, ngkai etu mangkeni wo’u i Paulus sira dua i Silas mapone nto’u banuanya. Rata ndate ria ia mangawaika sira dua pangkoni. Wali samparia tau ri banuanya etu ndende kojo rayanya apa saba sira mangayamo i Pue Allah.
35Wali ojo karoonya i Paulus sira dua i Silas mangkoni, ngkai to mangajagang tarungku mangkeni muni sira dua lo’u raya ntarungku etu. Pei ojo kaeonya rao, to pobotus sira mampokau polisi yau njo’u tarungku damanganto’oka tau to mangajagang, “Lapa muni tau dua to ratarungku wengi etu.” Wali sira yau manganto’oka ia.
36Wali ia mamporata resi i Paulus gombo ntau etu, to’onya, “To pobotus room mampokauka tau manganto’oka aku mangalapa muni komi dua yako ri tarungku. Wali inta komi dua pei pakasanang.”
37Pei i Paulus mamporapi magombo resi polisi to nama’i etu, panewa ia manganto’oka sira, “Kami si’i to Roma seja pei tau taa mangabotus kami ewa to masipato raika. Kasimbalinya yako etu kami mansaka nawotu-wotu ntau ri tango mata ntau boros pasi ratarungku. Pei si’i-si’i sira ojo mampokau komi ma’i damangalapa muni kami dua tempo tare tau boros mangkita. Bo’ongku ewa wetu! Inta to’oka sira to tao-tao sira semo ma’i mampaposuwu muni kami dua.”
38Wali polisi etu sira yau muni resi to pobotus pei mamporata resi sira gombo i mPaulus etu. Wali tempo to pobotus etu mangandonge i Paulus sira dua i Silas to Roma seja, sira meka rayanya apa taa kojo masipato palaong to naika nsira resi tau dua etu ane ewa porenta nto Roma.
39Wali to pobotus etu yau njo’u tarungku pei mamporapika resi i Paulus sira dua, to’onya, “Ne’e rakitanaka sala mami si’i.” Roo see sira mangkeni muni sira dua yako ri raya ntarungku pei mamporapika resi sira dua see sira dameyoko muni yako ri kota etu.
40Wali ojo pasuwu muni i mPaulus sira dua i Silas yako ri raya ntarungku, sira yau ruyu ri banua i Lidia. Nja’u ria sira siromu sindara-ndara pei pua’inya to samba’a pangaya. Sira dua mampakaroso raya ntau etu, roo see sira dua meyoko yako ri kota etu.