Dual PanelI. Ogaoga na so marnosan dompak Debata dohot dompak Messiasna i 1-6. II. Sangkap ni Debata taringot tu Messiasna i 7-9. III. Sipaingot manosoi mangoloi Ibana 10-12
1(I.) Boasa sai ogaoga angka parbegu, jala sai na so marniula dipingkiri roha ni angka bangso?
2Hehe martahi do angka raja ni tano on rap dohot angka na begu, mangalo Jahowa dohot Messiasna i.
3"Tarapui ma angka ihotnasida, jala taambolongkon ma angka talina i," ninna.
4Alai diengkelengkel Ibana na marhabangsa di banua ginjang i do nasida, jala dielesi Tuhanta i do nasida.
5Songgahanna do nasida sogot di rimasna, jadi martimpalan ma nasida mida parpiarpiar ni murukna.
6Hape anggo Ahu, hupabangkit do Rajangku di dolok Sion, dolok habadiaonku.
7(II.) Jamitahononku ma na gabe patik, didok Jahowa do mandok ahu: Anakku do Ho, sadarion do Ho hutubuhon.
8Pangido ma sian Ahu, asa hulehon tu Ho angka parbegu bahen jambarmu, jala gok di Ho angka ujung ni tano on.
9Ropuhanmu ma nasida dohot batahi bosi jala songon hudon do nasida taporanmu.
10(III.) On pe, hamu ale angka raja, sai olo ma hamu parrohaon, jala hamu ale angka panguhum ni tano on, sai olo ma hamu paingoton.
11Oloi hamu ma Jahowa dohot biar ni roha, jala marolopolop ma hamu, huhut angka hitir.
12Umma hamu ma Anak i, asa unang ro rimasna, jadi mago hamu maon ditongan dalan, ai tibu do marpiarpiar rimasna, alai martua ma sude angka na marhaposan tu Ibana.