Dual PanelDiona Azarya, datu to Yehuda
1Iatonna taun ma’penduangpulo mpitu kadatuanna Yerobeam, datu to Israel, dadimi datu tu Azarya, anakna Amazia, datu to Yehuda.
2Iatonna dadi datu sangpulo annanmo taunna, anna ma’parenta limang pulo ndua taunna dio Yerusalem. Iatu indo’na disanga Yekholya, to Yerusalem.
3Napogau’mi tu apa malolo dio pentiroNa PUANG, susitu mintu’ penggauranna Amazia, ambe’na.
4Ia mannamo tu inan madao, tae’ nadiratoi; na iatu to buda tontong siapa mantunu sia memala’ dao tu inan madao.
5Naparuai parri’ PUANG tu datu, naurunganni golenan sae lako allo kamateanna, anna ma’banua torro senga’, na Yotam anakna datu, umpangului tu tongkonan layuk sia umparenta mintu’ pa’tondokan.
6Iatu tang dipokadannapa tu mintu’ tuna’na Azarya sia mintu’na apa napogau’, tang tisura’moraka lan sura’ ossoranna mintu’ datu to Yehuda?
7Iatu Azarya malemo tama batu dilobang sola nene’ to dolona, anna dipeliang dipasola nene’ to dolona lan kotana Daud. Anna Yotam, anakna muane ussondai dadi datu.
Diona Zakharia, datu to Israel
8Iatonna taun ma’pentallungpulo ngkarua kadatuanna Azarya, datu to Yehuda, dadimi datu tu Zakharia, anakna Yerobeam, umparenta to Israel, dio Samaria; anna ma’parenta annan bulanna.
9Napogau’mi tu apa kadake dio pentiroNa PUANG susi mintu’ penggauranna nene’ to dolona; tae’ naboko’i tu mintu’ kasalan napa’pesuan Yerobeam, anakna Nebat, lako to Israel umpogau’i.
10Umpadenmi kasipakulu-kuluan tu Salum, anakna Yabesh, unneai napatei dio tingayona to buda. Na ia ussondai dadi datu.
11Iatu tang dipokadannapa tu mintu’ tuna’na Zakharia, manassa tisura’mo lan sura’ ossoranna mintu’ datu to Israel.
12Susimorato tu kadanNa PUANG tu mangka Napokada lako Yehu, nakua: Iatu mai anakmu muane la unisung dao isungan kapayunganna Israel sae lako osso’ ma’penna’pa’na. Dadi dukami susito.
Diona Salum, datu to Israel
13Iatu Salum, anakna Yabesh, dadi datu tonna taun ma’pentallungpulo ngkasera kadatuanna Uzia, datu Yehuda; anna ma’parenta sangbulan dio Samaria.
14Attu iato ke’de’mi tu Menahem, anakna Gadi, dio mai Tirza, lako Samaria. Anna patei tu Salum, anakna Yabesh, dio Samaria. Anna ia ussondai dadi datu.
15Iatu tang dipokadannapa tu mintu’ tuna’na Salum sia kasipakulu-kuluan napabu’tu, manassa tisura’mo lan sura’ ossoranna mintu’ datu Israel.
16Attu iato nataloi Menahem tu tondok Tifsah, anna pongkoi tu mintu’ pa’tondokan sia iatu mai to lan lili’na randuk dio mai Tirza, belanna tae’ nabungkaranni babangan. Iamoto napongkoi tu tau iato mai sia naballak tu tambukna mintu’ baine ma’tambuk.
Diona Menahem, datu Israel
17Iatonna taun ma’pentallungpulo ngkasera kadatuanna Azarya, datu Yehuda, dadimi datu tu Menahem, anakna Gadi, umparenta to Israel; anna ma’parenta sangpulo taunna dio Samaria.
18Napogau’mi tu apa kadake dio pentiroNa PUANG; tae’ naboko’i lan mintu’ allo katuoanna tu mintu’ kasalan napa’pesuan Yerobeam, anakna Nebat, lako to Israel umpogau’i.
19Ke’de’mi tu Pul, datu to Asyur, la ullaoi tondok Israel, apa nasorongan Menahem, sangsa’bu talenta salaka tu Pul, kumua anna tundui umpabantangi tu kadatuan iato lan limanna.
20Iatu mintu’ doi’ napalaku Menahem dio mai to Israel, iamotu dio mai mintu’ to sugi’, anna benni datu Asyur, silimangpulo sikele’ salaka ke misa’oi tau. Mangkato sulemi tu datu Asyur tae’ natorro lan tondok iato.
21Iatu tang dipokadannapa tu mintu’ tuna’na Menahem sia mintu’ tu apa napogau’, tang tisura’moraka lan sura’ ossoranna mintu’ datu to Israel?
22Iatu Menahem tamamo batu dilobang dipasola nene’ to dolona. Anna Pekahya, anakna muane ussondai dadi datu.
Diona Pekahya, datu Israel
23Iatonna taun ma’pellimangpulo kadatuanna Azarya, datu Yehuda, dadimi datu tu Pekahya, anakna Menahem, umparenta to Israel dio Samaria; anna ma’parenta duang taun.
24Napogau’mi tu apa kadake dio pentiroNa PUANG; tae’ naboko’i tu mintu’ kasalan napa’pesuan Yerobeam, anakna Nebat, lako to Israel umpogau’i.
25Iatu Pekah, anakna Remalya, kamandangna, sipakulu-kulu limangpulo tau dio mai Gilead unnea datu, anna patei dio Samaria, lan tambakukunna tongkonan layuk sola Argob sia Arye; napateimi anna ia ussondai dadi datu.
26Iatu tang dipokadannapa tu mintu’ tuna’na Pekahya, sia mintu’ tu apa napogau’, manassa tisura’mo lan sura’ ossoranna mintu’ datu Israel.
Diona Pekah, datu Israel
27Iatonna taun ma’pellimangpulo ndua kadatuanna Azarya, datu Yehuda, dadimi datu tu Pekah, anakna Remalya, umparenta to Israel dio Samaria; anna ma’parenta duangpulo taunna.
28Napogau’mi tu apa kadake dio pentiroNa PUANG; tae’ naboko’i tu mintu’ kasalan napa’pesuan Yerobeam, anakna Nebat, lako to Israel umpogau’i.
29Iatonna linona Pekah, datu Israel, saemi tu Tiglat-Pileser, datu Asyur, untalo kota Iyon. Abel-Bet-Maakha, Yanoah, Kedesh sia Hazor, Gilead sia Galilea, sia mintu’ tondok Naftali; napali’i tu pa’tondokan lako Asyur.
30Iatu Hosea, anakna Ela, umpadenmi kasipakulu-kuluan unnea Pekah, anakna Remalya; napateimi anna ia ussondai dadi datu tonna taun ma’penduangpulo kadatuanna Yotam, anakna Uzia.
31Iatu tang dipokadannapa tu mintu’ tuna’na Pekah, sia mintu’ tu apa napogau’, manassa tisura’mo lan sura’ ossoranna mintu’ datu to Israel.
Diona Yotam datu Yehuda
32Iatonna taun ma’penduan kadatuanna Pekah, anakna Remalya, datu to Israel, dadimi datu tu Yotam, anakna Uzia, datu Yehuda.
33Duangpulomo llima taunna tonna dadi datu, anna ma’parenta sangpulo annan taunna dio Yerusalem. Iatu indo’na disanga Yerusa, anakna Zadok.
34Napogau’mi tu apa malolo dio pentiroNa PUANG, umpeolai mintu’ tu napogau’ Uzia ambe’na.
35Ia mannamo tu inan madao tae’ nadiratoi; na iatu to buda tontong siapa mantunu sia memala’ dao tu inan madao. Sia datu duka unggaragai tu Babangandaonalu banuanNa PUANG.
36Iatu tang dipokadannapa tu mintu’ tuna’na Yotam, sia mintu’ tu apa napogau’, tang tisura’moraka lan sura’ ossoranna mintu’ datu to Yehuda?
37Napatiakka’mi PUANG tu Rezin, datu to Aram, sia Pekah, anakna Remalya, la ullaoi tondok Yehuda.
38Mangkato iatu Yotam tamamo batu dilobang dipasola nene’ to dolona, anna dipeliang dipasola nene’ to dolona lan kotana Daud. Na Ahas, anakna muane, ussondai dadi datu.