Dual Panel1Attu iato ma’kadami tu Elisa nakua: Perangii te kadanNa PUANG. Inde sia tu kadanNa PUANG nakua: Masiang susite, iatu ta’pung melo sangsea misa’ sikele’ allinna sia duang sea dalle sisikan misa’ sikele’ allinna dio to’ babangan Samaria.
2Apa mebali tu kamandang, tu nanii datu sissare takia’na, lako taunNa Puang Matua, nakua: Moi Napadadi PUANG tu pentiroan dao langi’, umba nakua la dadi tu iannato? Apa nakua tu Elisa: Manassa la natiro matammu, apa tae’ mukande lenni.
3Dio salian babangan kota den a’pa’ muane golenan. Sipa’kadami nakua: Apara gai’ta torro inde te sae lako mateta?
4Ianta ma’kada kumua: La maleki’ tama kota, karorian lan kota iato, manassa la mateki’ lan; na ianta la torro bang inde te, manassa la mate dukaki’. Iamoto malekomi mai, tasorong kaleta lako to’ inan surodadu to Aram. Ianna la umpatuoki’, manassa tuoki’, ianna la umpateiki’ manassa la mate dukaki’.
5Ke’de’mi tu tau iato mai tonna kasisalan taumo bongi, anna male lako to’ inan surodadu to Aram. Iatonna rampomo lako tampakna to’ inan surodadu to Aram, mangngami, moi misa’ tau tae’mo dio.
6Belanna Napa’perangiammo Puang lako surodadu to Aram tu ongngo’na, ba’tu pira-pira kareta sia gumaluntu’na darang sia arrakna sangtuntunan kapua surodadu, naurungan pantan sipa’kada tau iato mai: Manassa nasaroi datu to Israel tu datu to Het sia datu to Misraim unneaki’ sia la ullaoiki’.
7Iamoto anna pada ke’de’ male mallai tonna kasisalan taumo bongi, anna tampei tu mai tendana sia mintu’ darangna sia keledainna, sia mintu’ inan surodadu susi bangsiato nanii, anna pada mallai tu tau iato mai ullendokan kalena.
8Iatonna rampomo tu to golenan lako tampak to’ inan surodadu iato, tamami misa’ tenda anna kumande sia mangiru’ lan, anna alai lan mai tu salaka sia bulaan sia tamangkale, anna male umbunii. Mangkato sulemi tu tau iato, anna tama misa’ tenda senga’; inde to nanii unnala apa, namale umbunnii.
9Attu iato sipa’kadami nakua: iate penggauranta tae’ namelo. Allo iamote tu allo kareba melo, anta kappa bang. Ianta peagi masiang, manassa naruaki’ ukungan. Iamoto, maimokomi, anta lao umparampoi te kareba tama tongkonan layukna datu.
10Saemi metamba-tamba tu tau iato mai lako to ma’kampa kota, naparampoi lako nakua: Kilambi’mo tu inan surodadu to Aram, mangngakan, moi misa’ tau tae’mo dio, moi gamara tae’ duka, sangadinna darang mannamo ba’tu pira-pira disangkin sia ba’tu pira-pira duka keledai disangkin sia iatu tenda bendan susi bangsiato dinii.
11Iatu mintu’ to ma’kampa babangan metamba-tamba umpokadai te kareba iate, naurunganni iate kareba rampo tama tongkonan layukna datu.
12Millikmi tu datu tonna bongi, nama’kada lako mintu’ to mase’ponna, nakua: La kupokadangkomi, apa mora nagaurangki’ to Aram. Naissan bangmo kumua karoriammoki’, iamoto anna tassu’ lan mai to’ inanna, namale membuni dio lu padang, nakua: Ianna tassu’mo tu tau iato mai lan mai kota, ma’dinmo tatingkan tuo, anta mane tama kota.
13Mebalimi tu misa’ to mase’ponna nakua: Melo ke dialai lima dio mai te mintu’ darang, tu torronapa inde te. Iake dadipi lako darang iato mai susi bilanganna to Israel, tu torronapa lan te tondok, ba’tu la dadi lako darang iato mai susi bilanganna to Israel sanggangmo, da’ito tasuami male untiroi.
14Naalami tu kareta da’dua sola darangna, nasuami datu tu tau iato mai undi urrundu’ surodadu to Aram nakua: Malekomi untiroi.
15Narundu’mi sae lako Yordan, belanna mintu’ tu lalan nanii ponno pakean sia parea pa’buno, tu napentibean bangmo to Aram tonna tiramban anna mallai sule. Sulemi tu to disua umparampoi tu apa iato lako datu.
16Tassu’mi tu to buda anna mangrampa dio lu to’ inan surodadu to Aram. Lalomi tu sangsea ta’pung melo misa’ sikele’ allinna, sia duang sea dalle sisikan misa’ sikele’ allinna, susitu kadanNa PUANG
17Iatu kamandang, tu nanii datu sissare takia’na, nasua datu ungkampai babangan tondok, nasilullu’i tau lan to’ babangan iato, anna mate, susitu kadanna tauNa Puang Matua, tu napokada, tonna sae tu datu lako kalena.
18Lalomi susitu kadanna taunNa Puang Matua lako datu, kumua: Masiang susite duang sea dalle sisikan misa’ sikele’ allinna sia sangsea ta’pung melo misa’ sikele’ allinna dio to’ babangan Samaria.
19Apa mebali tu kamandang lako taunNa Puang Matua nakua: Moi Napadadi PUANG tu pentiroan dao langi’, umba nakua la dadi tu iannato? Apa nakua tu Elisa: Manassa la natiro matammu, apa tae’ mukande lenni.
20Narampoimo susito, belanna nasilullu’i to buda lan babangan kota anna mate.