Alkitab Mobile SABDA
[VER] : [TORAJA]     [PL]  [PB] 
 <<  Amos 3 >> 

Nabi umparampo kadanNa PUANG

1Tananni talinga te kada, tu Napokada PUANG diona a’gammi e to Israel, iamotu diona mintu’ pa’rapuan tu mangka Kusolan lan mai tondok Mesir, tu nakua:

2Mintu’na tu pa’rapuan dao kuli’na padang kamu manna tu Kutandai, iamoto angKu ukungkomi belanna mintu’ kakadakeammi.

3Ma’dinraka tu tau sola dua lumingka, ke tae’i nasituru’?

4Ma’dinraka tu singa umburrung-burrung lan lu pangala’, ke tae’i tu kandena? Ma’dinraka tu singa mangura gumarau-rau lan mai lo’ko’na, ke tae’i apa nadammak?

5Ma’dinraka tu manuk-manuk male rokko poya ba’tikan, ke tae’i pea’pan lan? Ma’dinraka tu poya ba’tikan tisintak diong mai padang, ke tae’i apa naala?

6Iake dipannonii tu napiri tanduk lan kota, tae’raka nala tiramban tu pa’tondokan? Ma’dinraka tu kota narampoi kamandasan, ke tae’i na PUANG umpasaei?

7Manassa tae’ Napogau’i Puangta PUANG tu mintu’ apa, ke tae’pi Napasamboi tu pa’timbanganNa lako taunNa, iamotu mintu’ nabi.

8Iake umburrung-burrungi tu singa, mindara tang mataku’? Iake ma’kadami tu Puangta PUANG, mindara tang ma’nubua’?

To Israel narampoi ukungan, belanna kakadakeanna

9Pa’perangianni tu apa iate dao lu mintu’ benteng lan Asdod sia dao lu mintu’ benteng lan tondok Mesir, ammi ma’kada kumua: Sirampunkomi dao mintu’ buntunna Samaria, ammi tiroi tu kamarukkan kapua lan tu tangnga-tangngana sia pa’pakario-rio lan kotana.

10Ondongpi tae’ naissanni umpogau’ malambu’na, kadanNa PUANG, iamo tu to umpasipapa’ pa’pandasa sia pa’pakario-rio lan mintu’ bentengna.

11Iamoto, inde sia tu kadanNa Puangta PUANG, Nakua: Iatu uali untikui tondok! Iatu kamabukuammu napalurokkomo, dialaimo dio mai kalemu sia iatu bentengmu dilo’do’imo lan mai.

12Inde sia tu kadanNa PUANG Nakua: Susi ke misa’ to manglaa unnalai da’dua buku bi’ti’ ba’tu sangira’ talinga lan mai sadang singa, susi dukato tu to Israel la dirampanan, iamotu to torro dio Samaria, tu unno’ko dao tetuk inan katindoan sia dao sambo malamma’na bale-bale.

13Tananni talinga sia titanan sa’bikomi lako bati’na Yakub, kadanNa Puangta PUANG, Kapenombanna mintu’ ma’dandan maritik.

14Tonganna iangKu ukungi tu Israel belanna kapatodo-tintinganna, manassa la Kuparampoi duka kasanggangan tu mai inan pemalaran Betel, naurungan dita’takki tu tanduk inan pemalaran, anna tipessambak rokko padang.

15Attu iato Kuro’pokan tu banua pentionganan sola banua pentuanginan sia la sanggang duka tu banua gading, ondongpi la buda banua mangsan, kadanNa PUANG.


  Share Facebook  |  Share Twitter

 <<  Amos 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2023
Alkitab.SABDA.org

Android.SABDA.org
SABDA.mobi
Bantuan
Dual Panel Dual Panel

Laporan Masalah/Saran