Alkitab Mobile SABDA
[VER] : [TORAJA]     [PL]  [PB] 
 <<  Amos 5 >> 

Bating diona Israel

1Tananni talinga te kada la Kusaurangkomi, iamo misa’ bating, e bati’ to Israel:

2Iatu anak dara Israel songkamo, tang nakullemo milik sule, tipessambakmo rokko padangna, namoi misa’ tau tae’ umbangunanni.

3Belanna inde sia tu kadanNa Puangta PUANG: Iatu tau lan kota sun massa’bu, la saratu’mora tinampe, na iatu to sun ma’ratu’, la sangpulomora tinampe dio lu bati’na to Israel.

Lalan lako katuoan

4Belanna inde sia tu kadanNa PUANG lako bati’na to Israel, Nakua: Daka’Na’, ammi tuo.

5Apa da midaka’ Betel, sia da mimale lako Gilgal, sia da mike’de lako Bersyeba. Belanna iatu Gilgal inang la male dipali’ sia iatu Betel la diputtai.

6Daka’i tu PUANG, ammi tuo, da narampoi bati’na Yusuf susi tu api ma’kande pu’pu’, anna tae’ misa’ tau untundui tu Betel umpa’deanni.

Upu’ allona tu tau umpoka kamalamburan

7O! tu to umpopembali apsantin tu kamalamburan sia umpentibean kamaloloan rokko padang.

8Puangmo, tu ungkombong Bunga’ sia Orion. Puangmo tu umpopembali malillin dadi arrang melambi’, sia umpamalillin masiang dadi bongi; Puangmo, tu unnongli’ uai tasik, anNa patibarrakki dao kuli’na padang – PUANG iamo to tu sanganNa.

9Puangmo, tu umpata’pai kasanggangan tu kota ditambakuku, naurunganni narampoi kasanggangan tu benteng.

10Nakabiri’ tau iato mai tu tau untuntun apa tongan lan lu babangan sia natapa’ tu tau umpokada salunna.

11Belanna ullullu’komi to bongko sia miparuku la umbenkomi pamengan, iamotu gandung, iamoto moi ammi bangun banua batu dipa’, tae’ duka ammi la unnii, moi ammi garagai pa’lak anggoro’ ballo, tae’ duka ammi la unniru’i tu uai anggoro’na.

12Belanna Kuissan, kumua tumbai budanna tu kapatodo tintingammi sia tumbai makambanna tu kasalammi; mipapussak tu to malambu’, ungkandekomi pappe’ sia mitumpu tu to mase-mase lan lu babangan.

13Iamoto nakappa tu to unnampui tangnga’ kinaa lan attu iato, belanna attu iate kadake.

Diona katuoan sia kamatean

14Daka’i tu melona, da na iatu kadakena, ammi tuo; ianna susito la Narondongkomi PUANG, Kapenombanna mintu’ ma’dandan maritik, susitu mipokada.

15Kabiri’i tu kadakena, kabarii tu melona, patunannangi tu salunna lan lu babangan, den sia manii upa’ anNa katuru-turui PUANG, Kapenombanna mintu’ ma’dandan maritik, tu to tinampena Yusuf.

16Iamoto, inde sia tu kadanNa PUANG, Kapenombanna mintu’ ma’dandan maritik, iamotu Puang, nakua: Dio lu mintu’ tana lapang nanii tau umbating, sia dio lu mintu’ batatta ma’kada tu tau nakua: A’a, a’a! Natambai tau tu to ma’pa’lak anna ma’pote dibolong sia nakua lako to manarang umbating: la unnurruk-urrukkomi.

17Ondongpi la umbating tu tau lan lu mintu’ pa’lak anggoro’, ke lendu’Na’ lan lu tangngami – kadanNa PUANG.

Diona alloNa PUANG

18Upu’ allona tu to ungkabarii alloNa PUANG. La matumbari tu alloNa PUANG lako kalemi? Iamo kapittukan, tangia kamasiangan!

19Susi, ke den misa’ tau mallai dio mai singa, la nadammak beruang; iake rampomi lako banuanna, anna merremme’ lako rinding tembo’ la natotokki ula’.

20Inang la kapittukan tu alloNa PUANG, tangia kamasiangan, ondongpi la malillin, tae’ naparrang.

Iatu PUANG ungkabiri’ kamenombanna Israel

21Kukabiri’ sia Kupamatuna tu pa’gaurammi sia tang Kuporai unnudukki tu bau allo kapuammi.

22Ondongpi, moi ammi pennoloan pemala’ ditunu pu’pu’ lako Kaleku, sia kande dipemalarammi, tae’ kuporai sia iatu pemala’ kasalamarammi, iamotu sapi malompo inang tae’ duka Kula untiroi.

23Patoyangi dio mai Kaleku tu arrak naniammu, tae’ Kuporai urrangii tu oni dandimmu.

24Sangadinna iatu salunna la tikalulun-lulun susi uai sia iatu kamaloloan susi salu’-salu’ tontong lolong.

25Mipennoloammoraka tu pemala’ pangrere’ sia kande dipemalaran lako Kaleku lan padang pangallaran patangpulo taunna, e bati’ Israel,

26sia mibulle dukaraka tu Sakut, datummi sia Kewan, bintoen mipa’deatainna, iamo rapang-rapang dipodeatammi tu mangka migaragai?

27Iamoto la malekomi Kupali’ – ullendu’i Damsyik – kadanNa PUANG, Kapenombanna mintu’ ma’dandan maritik, iamoto tu sanganNa.


  Share Facebook  |  Share Twitter

 <<  Amos 5 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran