Dual Panel1Iatu to kalala’ unnola kamaloloan mandu melo na iatu to ma’kada leko’ sia natompoi kabagan.
2Moi natutuki’ ke tang unnampuiki’ tangnga’ melo, tae’ gai’na, naminda-minda lumingka tarru’ matira’, madomi’ bang tilende’.
3Iatu kabaganna kalena tau ussanggang lalanna, moi susito, ma’paropo’ duka lako PUANG.
4Iatu kasugiran umpabuda sangmane, apa iatu to kalala’ natampe sangmanena.
5Misa’ sa’bi tang tongan tae’ nala tang diukung, sia minda-minda umpenaan buttok tae’ nala tilendok len.
6Buda tau undaka’ bang kamaturu-turuanna to la’bi’, sia pantan la sisangmane minda-minda umpa’bengan pa’kamasean.
7Iatu to kalala’ nakabiri’ mintu’ siulu’na, ondong pissanpi iatu mintu’ sangmanena untoyangan kalena dio mai. Iake napaula’i kadanna, – ta’deomi tu tau iato.
8Minda-minda unnappa’ tangnga’ kinaa, iamo ungkatirinnai katuoanna, minda-minda ungkaritutui pa’inaan, ungkabu’tui kamauparan.
9Misa’ sa’bi tang tongan tae’ nala tang diukung, sia minda-minda umpenaan buttok, la sanggang.
10Iatu kamalaboan tae’ nasipatu lako tobaga, ondong pole’pi tang sipatu tu misa’ kaunan umparenta arung.
11Iatu tanga’ kinaanna misa’ tau iamo umpopassuka’ kalandoi, sia iatu kamala’biranna umpagarri’ to patodo tinting.
12Iatu kasengkeanna datu susito burrungna singa mangura, apa iatu kamasokananna susito ambun dio to’ riu.
13Iatu pia muane baga napomandasa ambe’na, sia iatu baine passigagan susito papa rutu’.
14Iatu banua sia ianan iamo mana’ta dio mai to matua, apa iatu misa’ baine unnampui tangnga’ kinaa, iamo misa’ pa’kamasean dio mai PUANG.
15Iatu kamatukkunan umpaden mamma’ kalupi-lupian, sia iatu to maga’gun la umperasai katangdiaran.
16Minda-minda umpalan penaai tu pepasan iamo ungkarimmanni katuoanna, apa minda-minda tang ungkanandai penggauranna, manassa la mate.
17Minda-minda ungkamasei tobongko, ma’peindan lako PUANG, Puangmo la umpakkanni tu kameloanna.
18Pa’dikki tu anakmu muane, su’ding murannuan siapi, apa da’ maro’ mula umpatei.
19Iatu to arasan la umperasai pa’dik, iake la mutundui, la mupasalangngan-langnganna tu kasengkeanna.
20Perangii tu pa’patudu sia tarimai tu pa’pakilala, ammu dadi kinaa undinna.
21Buda tu natangnga’ tau lan penaanna, apa iatu NapantokNa PUANG tang leluk.
22Iatu unnala penaanta, iamotu kamasokananna tau, mandu melo tu to bongko na iatu misa’ to buttok.
23Iatu kamatakuran lako PUANG umpabu’tu katuoan; iatu tau iato ma’pedia’ ke mamma’i sia tae’ narampoi kamandasan.
24Iatu to tukkunan umpadiong bang kandian limanna, apa tang unnangka’ limanna ma’suak.
25Iake mulonga’i tu to pabe’se, la manarang tu to tang unnampui tangnga’ melo, iake muada’i tu to unnampui tangnga’ kinaa, la napopaissan tu iannato.
26Minda-minda umpandasa ambe’na sia ussuale indo’na, iamo misa’ pia muane ma’pakasiri’ sia sipatu disayu.
27E anakku muane, da’imi to muperangii tu pa’pakilala, iake tontongko umboko’i tu kada tongan.
28Iatu to sa’bi bulituk untelle bang tonganna, sia iatu puduk to tang mekaaluk unnamma’ bang kakelokan.
29Iatu ukungan diparandanan to pabe’se sia pelonga’ dio boko’na to baga.